女神從Online Game走出來了: 02 魔法師伊語
為甚麼伊語會從遊戲裡跑了出來？難道是我在做夢？還是因為喝太多紅牛而產生幻覺？？
「唔．．．？你係邊個？依度係邊度？」女子如夢初醒，看來她自己也不知道自己為甚麼會在我家．．．
「妳．．．係伊語．．．？妳咩都唔知．．．？」我問
「妳點知我係邊個架？依度係邊度呀？你係咩嘢人呀？？」她開始緊張起來
「我都唔係好識講．．．依度係我屋企．．．」我說
「你屋企？你做咩捉我嚟依度呀！你衣著奇怪，唔通你係蝗族嘅間諜！？」她說著，手中開始冒出火焰！
「哇哇哇！妳冷靜啲先！我係人類嚟架！而且．．．衣著奇怪嘅係妳囉！」我十分慌張
「人類就唔可以係蝗族間諜咩！？」她手上的火焰慢慢變成一個火球！
「哇！唔好燒我呀！妳係我創造出嚟，我點會害妳呀！而且我都唔知發生咩事架！！」我拿起枕頭作僅有的保護
「你話．．．係你創造我出嚟？」她一臉疑惑
「你收起個火焰球我再慢慢解釋過妳聽啦．．．」我嘗試冷靜她
她想了一想便把手放下，手中的火球果然便熄滅了。
「其實我都唔係話好肯定，但係妳應該真係「伊語」．．．係我喺一隻遊戲《奢華online》入面創造嘅角色．．．」我解釋說
「你呃人！」她手上又再出現火球了！
「我無呃妳架！嗱．．．妳叫伊語，係精靈族魔法師，妳著住嘅係蝗族殺手法師套裝，係做蝗族抵抗任務拎架嘛，係咪？妳最後log out．．．休息嘅地方係日王之角旅館呀嘛，係咪？」我慌忙回憶著遊戲裡的情況說
「咁．．．點解我會喺度．．．」她有點吃驚說
「依樣我都唔清楚．．．但係依度係現實世界．．．」我說
「現實．．．世界？咁我即係．．．只係一個虛構人物？」她驚訝問道
「係呀．．．一直以嚟都係我控制妳喺遊戲入面打怪做任務．．．」我說著，心裡總算鬆口氣，她好像把事情弄明白了
此時，她突然雙手掩面，便猛地哭起來了！！我嚇得手忙腳亂！甚少女性朋友的我，根本不知道要怎麼招架．．．我要像電影般有型地抱著她來博取好感嗎？
我坐在她的身旁說：「妳．．．無事呀嘛．．．無啦啦做咩喊呀．．．？」不過始終沒有膽抱著她．．．
她哇哇大哭說：「我原來只係一個唔存在嘅精靈！我所做嘅一切都係你安排嘅．．．我嘅人生意義究竟係咩嘢？依度係邊度我又唔知！我應該要點做呀！我想返去呀！！」
聽到她的說話，我的心裡不禁一沉。我完全沒有想過事情對她有多大的打擊．．．我根本想像不到，如果自己的人生原來一直是受別人控制會是甚麼感覺．．．剛才還只想到如何耍帥．．．我真是幼稚．．．
「我會諗辦法送妳返去．．．」我許下一個不知道如何去實現的承諾
不過她情緒依然激動：「返去有咩用？嗰度只係一個虛構嘅世界．．．我只係一個虛構嘅精靈！」
「唔．．．咁既來之則安之．．．宜家妳可以做返自己，唔使再受我控制．．．可能仲好呢．．．」我說
「嗚．．．但係我唔知可以點．．．以前每當有事發生我都會好自然知道要點做．．．宜家好似突然間無晒頭緒．．．」她哭著說，不過情緒好像平伏了些許
「我．．．既然創造左妳出嚟，我就會照顧妳，妳唔使擔心任何嘢，自由自在咁去做自己就得架啦！」我竟然說出這種有型的說話，我自己也不禁嚇了一跳．．．
然後她淚眼汪汪看著我：「你．．．真係會照顧我．．．幫我？」
「當然啦！妳放心啦．．．」看著她漂亮的雙眼，不禁臉紅心跳起來
這晚，我陪著她在床上哭著睡去．．．原來許志安的那首《女人之苦》是真的．．．「若見女人淚眼模糊，男人都感到痛苦」．．．現在她可以依靠的就只有我，我一定要好好對待她．．．
一定要．．．
鈴～鈴～鈴～
電話的響聲把我鬧醒了，媽的我還未睡夠啊．．．
我拿起手提電話，不耐煩說：「喂．．．邊個呀．．．」
「Apple。」對方說
Apple？大件事！我看一看牆上的掛鐘，原來已經十時多了！！
「仆街！」我嚇得臉也青了
「你仆我街呀？」Apple說
「唔係唔係．．．我意思係．．．哎呀仆街啦原來我病左喎．．．哈哈．．．哈．．．」看來我是瘋了
「原來你病左。」Apple說
「咪係囉．．．真係衰．．．」我垂死掙扎
「．．．算啦，無咩嘢就得啦，星期一補返醫生紙比我。」Apple說完便掛線了
對啊，伊語她來了，看來今天請假是對的．．．我看一看伊語，她竟然沒有被我吵醒．．．而且還睡得很甜。我細心欣賞著她．．．她真的很漂亮．．．睡覺的模樣看來就像一個小女孩．．．微微張開的嘴邊還流著口水．．．尖尖的耳朵也不時跳動著．．．既漂亮又可愛．．．．．．
此時，她突然一手抱著睡在旁邊的我！一隻手放在我的胸口，一條腿壓在我的大腿！
「喂．．．喂．．．伊語．．．」你說我見識少也好，道德撚也好，我此刻真的非常尷尬．．．既不敢碰她，又不敢動彈．．．我就這樣子不知持續了多久．．．
然後，伊語慢慢醒來，她眼睛半開，些許凌亂的金髮，配合那性感的絲質魔法師袍，還有那落在我鎖骨上的口水絲．．．
「早晨．．．主人．．．」伊語呆呆看著我說
主甚麼人！？這是甚麼意思！妳在挑戰我們健康人類男性的意志力嗎？妳這個不知天高地厚的精靈族！這個模樣，這句對白．．．我真的心動了．．．身也動了！
「咦．．．有啲嘢頂住我大脾嘅．．．？」伊語好奇說
「緊係啦！妳．．．壓住我隻手呀嘛！」我當然是在找藉口
「啊．．．對唔住．．．」伊語立即尷尬地坐起來說
「話時話，妳做咩叫我做主人？仲壓住我訓．．．」我不太敢正視她，因為天光了視野變得很清楚
「對唔住．．．訓著左覺．．．不知不覺就．．．而且你個身暖呀嘛．．．仲有呀，我都唔知你叫咩名．．．咁以前一直都係你控制住我嘅，我咪叫你做主人囉．．．」伊語扁著嘴巴用手指在床上畫著圓圈說
「唔．．．我叫流主．．．」我略感無奈說
「咁一樣啫，你叫流主，係人類，叫主人都無問題呀。」伊語微笑說
「．．．」我無話可說
「等我再正式介紹一次自己先，我係精靈族魔法師伊語！以後多多指教！」伊語笑說
「啊．．．我係人類文員仔流主．．．多多指教．．．」我有點不好意思說
伊語因為剛來到我們的世界，所以就像一隻小貓般對甚麼都很好奇。她那藍色晶瑩剔透的一雙大眼睛定定看著我．．．看著我刷牙．．．
「好好睇咩．．．？」我有點不自在
「其實刷牙有咩用架？」伊語問
「刷牙．．．就唔會口臭囉．．．好似係．．．」我想了想說
「咁無謂嘅．．．你地無更重要嘅嘢要做咩？無敵人要對付嘅咩？」伊語不解問
「都有嘅．．．同妳地一樣要抵抗蝗族囉．．．」我開玩笑說
梳洗後，我決定隨便煮些甚麼吃。暫時最讓我意想不到的是，原來精靈也要上廁所的．．．遊戲裡明明都沒有．．．．．．不過也罷，不深究。
「哇！好好食呀！主人好叻呀！」伊語吃著公仔麵驚喜地說
「公仔麵好難唔好食個喎．．．」我無奈說
「我煮嘢食都好叻架！」伊語笑著說
「我知．．．就嚟練滿添。」我說：「係啦，我想同妳講一下依個世界生活嘅規則。」
「規則？」伊語說
「係呀，因為我地依度唔同妳地個世界。首先第一樣，亦係最重要嘅一樣，就係唔可以比人知妳識魔法。」我說
「吓．．．啊．．．」伊語有點不願意
「因為我地依度無魔法依樣嘢，啲人會比妳嚇死．．．」我續說：「第二樣，唔好比人知妳係精靈。」
「又話可以自由自在．．．」伊語扁著嘴巴說
「唔．．．最多返到嚟屋企，妳鍾意點都得啦．．．」我有點為難說
花了一整天時間去解釋現實世界的生活，伊語好像有懂沒有明．．．不過，慢慢來吧。
我簡單教了她如何使用熱水爐，便讓她先去洗澡，好讓我有時間整理和安排一下以後的生活。我二十多年來都沒有和人類女性交往過，現在突然便要我跟一個精靈族女性同居．．．我真的想像不到往後的日子會是怎樣．．．
「主人，沖完啦．．．我無衫換．．．」伊語抱著毛巾僅遮掩著小孩子不可以看的地方便跑出來
鼻血奔流的我面對的第一個難關便是．．．衣服．．．