黃鼠狼特務Agent of Weasel(搬家原故,本站停止更新): 章十二:漁人的漁夫

        下午兩點半,噴水池旁站滿了參觀的學生,在我們背後的就是前甄集團旗下的珀金假日酒店.
      據情報指,這酒店的行政酒廊一直藏著前甄集團高層會議一些不能公開的文件,所以我才報名參加今次的參觀活動,名正言順地溜入調查.
   
「同學仔,Say cheese~」黃東慶老師握起相機,為我們拍張群體照,為今日的參觀活動留下紀念.
「死開啦!!俾我排前面!」想排第一行的洪勇哲狠狠的把我拉向後方,我一失足就撞到燈柱.
「傻閪!!!!有冇眼㗎你??」
        要不是為了任務,我一早已經幹掉他了.....
耳機𥚃的宅聰問:「嘩秦世樂!!呢下好似好痛咁喎!」
「梗係啦....」我細聲吐糟著.
「秦世樂,今次任務..有少少難度,你要喺自由活動時間嗰時上去行政酒廊做嘢,然後返落嚟集合.」范探員說.




「自由活動時間得嗰45分鐘,好趕下喎....」我說.

有個職員走了上來:「Hey!同學仔好!!我係珀金假日酒店嘅管理及陪訓總監jimmy,今日會做你地嘅導賞員~想必大家一定係對酒店行業好有興趣先至喺度㗎啦,係唔係丫?」
「當然啦!!」麥烈寧毫無顧忌地坐上詢問處的檯上,囂張的道:「假以時日,呢間酒店將會係我麥烈龍嘅.我嚟係視察一下環境,準備迎接我將來輝煌嘅人生!!!」
「呀......」導賞員不知如何回答,呆了好幾秒.

「喂秦世樂.」黃虹拍拍我的肩膀:「你又會報名參加嘅?」
「好...好奇怪咩..?」我答.
「你不嬲都對呢D冇興趣㗎啦,又會嚟嘅?」
「咁你點解又嚟嘅?酒店呢D嘢你又有興趣?」我反問她.




「我嚟嘅原因係.....」黃虹說.
「你嚟嘅原因係?」
「黃虹!秦世樂!留心D聽導賞員講嘢.」黃sir跟我們説.
     我們只好乖乖的聽那悶蛋的講解.

------------------------------------------------------------------------------------------------------------------------------------------------
    導賞員帶我們遊走酒店的咖啡廳,酒吧,泳池等等設施.還要給我們聽一大段的講座...屌....真的很悶.
「同學仔!希望今日嘅活動可以令你地更加了解酒店嘅運作啦!有緣再見!跟住就交俾阿sir喇.」導賞員道.
「大家四圍行下,45分鐘後就喺大堂集合.」黃sir又跟導賞員來個合照.





    眾人散去後,洪勇哲就目光兇狠的瞪著我:「攞銀包嚟!!!今個月嘅保護費你都未交呀!!」
  時間關係,我趕快從錢包掏出二百蚊,他卻一手搶走我的錢包.
「今個月開始,加價!!」洪勇哲把我所有的錢也奪走.
「唔好拎走哂呀!我要搭車呀...」
「搭車!?行路返屋企啦你!!!」他還把我的錢包狠狠地丟到泳池𥚃:「白痴仔!!嘿嘿嘿!!!!!!」
      待我處理好所有事之後,我必定要洪勇哲為他作過的事而後悔.
「屌那閪,比條仆街搞到我少左時間行動.楊澤聰,話我知行政酒廊係邊.」
「搭𨋢上到65樓向右轉就見到有個通道,入去就係喇.」楊澤聰説.

--------------------------------------------------------------------------------------
    65樓,一個保安正在守著行政酒廊的通道,不讓外人進入.
我背著書包,直接走向那位保安.
「你係嚟參觀嘅學生?唔好意思呀呢度係唔比入去㗎.」保安説.
「保安叔叔,頭先我喺後樓梯度見到有人痾尿呀!」我說.
「唔係呀嘛??邊度??」




「我帶你去睇丫!!」
     我帶那保安走到後樓梯,趁他不為意時劈暈了他,再取去他的職員證,穿上他的西裝服.
 偽裝成保安後,我便順理成章地溜入行政酒廊查個究竟了.

    我取出職員證,啟動酒廊大門.「嗶————」
開門後見到的,是用餐的地方,這裡比起樓下餐廳還要豪華,果然是VIP級的待遇.
餐廳的東北方,就是會議室.
「呢度睇起嚟好普通咁喎,D文件會收埋喺邊?」我一頭霧水,不知從何處開始搜查.
「枱底?」楊澤聰說.
「冇.」
「牆?」
「摸過哂,唔似有.」
「咁點呀....唔通喺廁所咩!??」楊澤聰有些焦急了.
「廁所?」我靈機一觸,馬上步向西北方的廁所.
「我講笑咋喎!!點會喺廁所度丫??」




范探員説:「世樂估得冇錯,一般人又點會諗到將秘密文件存放喺廁所度呢?」
「所以.....最安全嘅地方就係廁所?」楊澤聰明白了.
「呢D叫逆向思維法.」

「屌..連廁所都咁豪華....」身為平民的我覺得這跟我家的廁所實在是差天共地.
     我摸摸牆壁,有一處是凹進去的,是有機關嗎?
「范sir,睇嚟我冇估錯.」
「仲講,快D睇下啦.」
     我輕輕一推,此時,洗手盆前的鏡子便自動移開,露出一排資料櫃.奇怪的是,整排資料櫃卻只有一份文件.
 我拿起來看看.
      
         ''   這裏沒有東西給你看哦!
                  小朋友,這玩笑開得好嗎?哈哈哈哈~ ''
                                                                         
「仆佢個街!!佢地原來一早已經收走哂D秘密文件......」我不禁罵道.




「中伏喇....班人一早知道我地會嚟.」范探員道.

「秦世樂!!??你點會喺度㗎??」突然,廁所門前走來一個人......是...是黃虹!?
「黃..黃虹?」


                 -------------------黃鼠狼特務Agent of Weasel-----------------------------

                     ----------------------- 章十二:漁人的漁夫--------------------------


/////////////////////////////////////////////////////////////
      昏暗的貨倉裡頭,戴鯨亨在提筆練字.
「傲清,係咪搵我有事?」他留意到站在一旁的韓傲清.
「我嚟睇下你練書法啫.」經過昨晚,韓傲清腦海裏還浮現著秦世樂的説話.




「有嘢就講啦,男人要爽朗一D!!!」戴鯨亨説.
「大佬,當初你收我做手下嘅原因係咩.」
「傲清......你咁打得,又做得嘢,當時全港嘅社團都爭住要你㗎.有你做我嘅右手,我地銀龍先可以越做越大.」
「有傳言話,四月份場天幕事件.......同我地銀龍有關.」韓傲清説.
戴鯨亨頓了一頓:「傳言只係傳言,我唔會利用兄弟去做呢D傷天害理嘅事......傲清,你會相信我㗎嘛?」
「我...相信.」韓傲清説.
「不愧係我嘅好右手.」戴鯨亨點點墨水,揮筆在宣紙上寫出「忠義」兩字:「呢兩隻字,送俾你.」
「吓?」
「忠義呢兩隻字,一直都係一個社團最重要嘅精神,只有忠臣先可以喺殿堂留低,而對君主有懷疑或背叛嘅,只會落得坎坷下場.」戴鯨亨説.
       
        韓傲清望著宣紙的兩隻字,沈默不語.

///////////////////////////////////////////////////////////////////////////
「黃..黃虹?唔通,你就係.......霓虹女!?」
「你....」她皺起眉頭:「你就係喺後巷嗰個....」
「我點都估唔到,娘娘都會係特務....」我說.
「我都一樣估唔到廢青都會係特務.」黃虹笑説.
「你嚟嘅原因,都係同我一樣.」
「係.」黃虹走向資料櫃:「個櫃冇任何文件?」
「喺我地嚟之前已經比人攞走哂.黃虹,既然知道左對方嘅身份,不如同我地並肩作戰啦.」
「你地?」
「除左我,仲有范sir同楊澤聰.」
「我講過,我地互不相干.再見.」黃虹冷酷地拒絕我,然後轉身走.

     外面忽然傳來急促的腳步聲:「佢地喺入面呀!!!!」,有人來對付我們了.
「照情況睇....我地冇得咁快走住喇.」我說.
「係佢地設計好嘅局......秦世樂,仲有幾多時間?」黃虹問.
「仲有22分鐘先集合.」
「時間有少少緊迫.....不過都夠.」
        我們戴起面罩,在廁所門旁埋伏.
   
     四,三,二,一,來了————————————我撲出門前,雙手抓住殺手的頸推出去,黃虹趁他未站穩時立刻給他來兩記飛踢.
「你左我右,OK?」我說.
「分得咁清做乜丫.」話未完,她必跑了上去.
      平日趾高氣昂的娘娘竟然是個女特務,是偽裝術嗎?我也是為了任務而故意裝弱男的.
    黃虹使出踼牆跳,纏上另一個殺手的頭上轉幾圈再扭斷他的頸.後方兩個衝前襲向,她緊緊捉住右方那個的左拳,轉到他身後扭斷他的手臼,順道左肶肘切走來自左方的勾拳.動作可謂十分流利.
「專登喺我面前solo?」說罷,我一同上前拼殺.

「同我生摛佢兩個!!!!」指着我和黃虹的,應該就是殺手隊長吧.
     同一時間,幾個殺手向我們殺來.
 我拿起水吧的瓷碟擲擊先來那個,又一個撲前來把我按在地下不停的揍,我兩指插他的鼻孔,把他反過來按,右拳重擊心臟位置把他幹掉.
「啊啊呀呀呀!!!」另一邊的殺手正朝黃虹揮拳,但也被她躲過了.此時,從後來了一個想把我勒死的,我拼命的拉扯頸上的麻繩,把他推後到廁所,把牆也撞崩了.見左右肶肘也沒有用,便用頭撼撃他,誰料這傢伙的頭殼非常的硬.
        我嘗試右腳跳起把身體重心推前,成功地將那殺手整個身軀270度擲到地上.
「想勒死我?」我待他爬起來後,痛快的揍他的下顎,腹部.他還有力氣抓住我的手大力的扭.
「啊呀呀!!!!」手就快被他扭斷了.
        「碰—————」我抓住這傢伙的頭按到洗手盆裡,開盡水喉.水喉水如洪流般沖進他的鼻孔和口內,活生生把他淹死.

 會議室那頭,黃虹正在苦戰中.我掏出小刀跑去救駕.
      殺手隊長連環踢擊黃虹,她雙臂交差格住.小刀擲出刺進隊長的右掌,我再朝他的左右軟肋猛攻,突然,藏在檯下而久的殺手撲了出來直拳把我的頭撼到牆上.
「死屁孩.....我要為我嘅右手取回公道!!!!」殺手隊長前來與另外那個一起毆打我.

「二對一.......好唔公平啫.」躺在地上的黃虹站了起來:「二對二,先至公平丫嘛~」她一個翻斗勾踢殺手隊長的頭顱,接下右邊的拳扯斷————再拿起椅子擋住來自隊長的拳擊,轉身一圈用椅子痛擊他.另一個殺手來記膝擊,黃虹捧住他的膝蓋向上翻把他跘倒.受重傷的隊長忍住痛楚拔走掌上的小刀向我反擊,朝我的頭顱刺來,我及時握住刀刃——————血絲一滴一滴的流下來,就快忍耐不住了.我鬆手的瞬間把頭往右移讓他失去重心扒過來,右膝擊他的肋骨.黃虹奪去小刀把他架在牆上.
「邊個派你嚟,講.」黃虹盤問他.
「嘿嘿.......」
「笑乜嘢?」我給他來多幾拳.
「總有一日.......你地會俾佢地...折磨至死!!!!天....天城萬歲!!!!」然後,他便死去了.

     黃虹放下屍首:「佢體內應該係俾人做左手腳......以防佢暴露組織嘅秘密...」
「組織?你知道係咩人做嘅?」我脫下西裝.
「我喺學校有好大嘅情報網,花左兩年時間知道....」她閉起雙眼,握緊拳頭:「個組織嘅名叫做—————『漁夫』,由教主統領一切嘅邪教組織,佢一直戴住黑色布,從來冇人見過佢嘅真面目.」
「漁夫.......咁方計程,佢喺邊度?」我得到了有用的情報.
「佢死左.」
「方....方計程死左?」
「一次任務之中,有六個特務殉亡,方sir都一樣......死喺同一個地方...」説到這裡,黃虹神色有點難受.
    我無言以對.
       
      回程的校巴上,黃虹一直托著頭望出去窗外,沒有跟朋友説話.