我和阿瑜非一般的兄妹情: 8
報名過後，就要投票決定地點為長洲還是梅窩。
「好啦！依家點人數啦，長洲最多人投喎，咁我地哩次兩日一夜就去長洲啦～」會長點算票數後說道。
「好啦，各位同學可以放學啦～」在旁不停打瞌睡的秦SIR說道。
接著，我便和鴻哥一起離開，去到校門時，我見到鴻哥的妹妹阿欣竟然站在校門外。
「死…死毒撚！捨得出嚟啦咩？」阿欣開口便罵。
「我想咖？咁要留下傾嘢有乜計～」鴻哥應道「不過你做咩係到嘅？」
此時，阿欣沒有回應，而且瞪了我一眼，我馬上識趣說道：「鴻哥，我走先啦，拜拜～」
到底他們兩個搞什麼鬼……而且我走遠後轉頭一望，見到竟然還有另一個我不認識的漂亮女子，搭著鴻哥的膊頭說話……雖然鴻哥異性緣一向都不差，但見到他可以左擁右抱，真是有點眼紅，這些機會……
而這亦是令我覺得，鴻哥不是真的那麼緊張周芷彤的原因，因為他身邊總是有很多美女圍著他。
回到家後，阿瑜改經換好衣服坐在大廳溫書了。作為一個好哥哥，我當然沒有打擾她，我入房關上門後，便開展我信長之旅。
「阿哥，你仲唔溫書呀？你今日考成點呀？」阿瑜在大廳大叫道。
我最怕踏入考試週期的原因不只是因為要考試，阿瑜此時會化身成嚴母的角色，雖然她不會毒打我毒罵我什麼的，但是會將「溫書」二字常常掛在嘴邊。我都明白阿瑜這樣做沒有錯，但是我又真的不想溫習，所以阿瑜的話聽也不是，不聽也不是。這些矛盾尷尬的複雜情緒令我好生苦惱，只希望考試快快過去。
「就溫啦！今日ＯＫ啦～」我刻意用含糊不清的方式應道。
「ＯＫ啦呀！？即係唔得啦！阿哥呀！你快啲出嚟同我溫書啦！」阿瑜用更響亮的聲線道。
「哎呀！阿哥好攰呀！哇！仲有啲頭暈咁呀～」我裝出虛弱的聲線道。
「咔～」房門被阿瑜打開了……
「扮嘢！！！頭暈仲會打機咖咩！？」阿瑜似乎真的有點生氣了，強行把我拉起道「快！啲！同！我！出！嚟！溫！書！呀！」
面對阿瑜的強硬攻勢，我只好棄械投降，隨意從書包裡拿出幾本課本，就跟著阿瑜到大廳溫習。
「阿哥，專心啲啦！」阿瑜見我發呆便板起臉督促我道。
「阿妹，溫書好悶呀！睇極都唔知佢做乜嘅～」我哀道，沒精打采地亂翻幾頁書本。
「阿哥呀～你就快DSE咖啦，再唔比啲心機就入唔到大學咖啦。」阿瑜苦口勸道。
當我仍想反駁的時候，忽然想起先前阿瑜的聖誕願望……
「啊！仲有仲有！希望阿哥可以入到大學。」
「唔…唔係掛…我呀…算啦…」
「如果阿哥肯努力，我覺得你可以嘅。」
於是，我把反駁的話全都吞進肚子裡，盡我最大的努力專注沉淪書海之中……
「阿妹，溫到好肚餓啦～食得飯未呀？」我向廚房方向叫道，我的肚子都發出「咕咕」聲了。
「得啦得啦！」阿瑜從廚房端出飯菜。
「正呀！」我立刻放低書本，去到飯桌拿起筷子便開動了「食飯食飯～！」
「係呀！阿妹，今日係學校呢，傾好咗去邊啦旅行！仲要係兩日一夜呀！」我慣常地一邊吃飯一邊跟阿瑜聊天。
「吓！？兩日一夜？」阿瑜的樣子消沉了一下就回復正常「咁…咁係去邊呀？」
就算阿瑜消極的樣子只要顯露一剎，我都已經可以即時察覺了，起初我都不明白她為何這樣……
「做咩呀？你都想去長洲咩？」我以為阿瑜是因為她沒份去所以不開心。
「唔嘢呀，唔係呀……」阿瑜低頭扒著飯道。
我又想了一想……啊！多年來，我一直都會在家睡覺，所以每日都是和阿瑜一起睡，這次我去了兩日一夜的旅行後，將會是第一次阿瑜自己一個睡……
「阿哥唔係到訓一晚姐，你係咪怕自己一個訓呀？」我溫柔地道。
「嗯……」阿瑜紅著臉道。
「哈哈！你都大個女啦～遲早都要試吓自己一個訓咖啦！」我微笑道，然後放低飯碗，伸手去摸一摸阿瑜的頭。
「知…知道，但係阿哥之後都要繼續陪…陪我咖喎…」阿瑜說道，沒想到阿瑜這樣膽小，或者可能是之前恐佈片的關係吧。
「咁我緊係會啦！傻嘅～」我應道。
「阿哥，話說呢，我今日見到學校歌唱比賽嘅宣傳，我想去試吓～」阿瑜說完後便望著我，等待我的反應。
「哇哇哇！蕭家大小姐，竟然會想玩比賽呀！？」我真的覺得難以置信。
「你話好唔好呀？我好驚但係又好想試吓咁……」阿瑜詢問我的意見。
雖然阿瑜並沒有接受過任何歌藝的訓練，但她天生就有一把好嗓子，至少她的歌聲會使我回味。所以我覺得這比賽是值得一試，反正輸了都不會損失什麼。
「你想試嘅咁就緊係好啦～反正都無蝕底嘅！」我應道。
「但係我……」阿瑜看似有所顧慮般的。
「咁阿妹你第一次上台，實會驚咖啦～不過哩啲經驗難得。而且講真呀，阿妹唱歌都係幾好聽嘅，我覺得真係可以試下。」我鼓勵阿瑜報名參加。
「咁…咁好啦～」阿瑜聽到我讚她的歌聲動聽，顯得有點害羞。
不要問我為何不說什麼「阿哥會係台下支持你」之類的說話，因為我校的歌唱比賽是分高年級和低年級的，而且是在週會時候進行。簡單說，進行低年級比賽的時候，高年級的全部都只會留在課室上課，不會有份觀賞的，所以就算我想都不可行。
往後考試的日子，同樣地我每天都被阿瑜強迫我溫書，可是「臨急抱佛腳」的溫習成效根本不大。所以，到了派卷的日子，差不多每個老師都把我罵得狗血淋頭。不過這些我都習慣了，根本都不以為意，除了我的化學老師吳SIR的訓話外……
「阿仔！做咩咁今次你都係咁咖？你係咪無溫書呀？做咩唔溫書呀？」吳SIR在課室外的走廊指著一份寫著廿分的試卷問道。
吳SIR和其他老師的訓話真是大不同，首先，他不會大聲罵道，而是用著感到痛心的聲線，其次他會叫我出走廊才將我訓話，免得我難堪。
「CHEM好難呀，都唔知做乜嘅……」我低聲應道，面對這位老師的一番苦心，我心裡的確會感到有點愧疚。
「仔呀仔，就快DSE啦，你仲係咁樣點得咖……」吳SIR勸道「你再HEA就無時間啦～」
「我下次會努力咖啦～」其實就連阿瑜都只是勉強可以叫動我，所以吳SIR只是幾番訓話又怎可能真的勸得動我呢。面對其他老師的訓話，我多數左耳入右耳出，唯獨對吳SIR我才會說一些他想聽到的說話。
「你睇吓，你連最基本個啲都唔識做呀～」吳SIR指著試卷上的問題說道「趁仲有時間，你快啲追返上嚟啦～」
「得咖啦，我會咖啦～」我應道。
「你係至好呀仔……」吳SIR拍一拍我膊頭，示意叫我返回課室。
我拿著廿分的化學試卷返回我的座位，望著試卷上大大小小的交叉，或多或少都有些感概……
「喂！阿豪，你CHEM幾多分呀？」鴻哥笑著問道，千萬不要因為笑便以為他一定拿得好成績，其實只因他不太把成績這東西放入眼裡。
我沒有回應他，只是對他舉起兩隻手指。
「吓！？得兩分？哈哈哈！我都起碼有十三分啦，哈哈哈！」鴻哥指著我大笑道。
「廿分呀！點會得二分呀！撞MC都唔止啦！」雖然取二十分並不是光彩的事，都總好過被人誤會只得兩分吧……
此時，鴻哥得知事實上是我比他還要高分，面上一紅道：「頂你，裝我彈弓！？」
「就快學校旅行啦，我知大家考完試都想玩下輕鬆下，但係記住DSE就到啦！唔好玩創咗個心呀！」吳SIR剛才在走廊將我訓話後，回到課室亦不忘向全班同學再次訓話一番。
當然大部分同學聽到都是點點頭，那顆心早就飛到旅行那頭去了……
「仲有！！」吳SIR又叫道，看來又要做那件事了……
我和鴻哥對望一下，不約而同都搖搖頭。
「最低分個兩個，今日要掃乾淨個操場先好走呀！」吳SIR的眼光在我身上停留一下，再移到去鴻哥身上。
打掃操場其實都不算是太辛苦，但是可以的話當然不想做……誰叫我倆是個學渣…
放學後，我和鴻哥便到儲物室拿走掃把，就走到操場開始掃地……此時其他放學離開的同學們，望見我倆便跟身邊的朋友竊竊私語，又會掩咀偷笑……
「唉頂，點解要我掃地，比人笑到面黃啦屌～」鴻哥一邊低頭掃地避開眾人的目光，一邊埋怨道。
「你話最低分個一個掃咪算囉，點解要係最低分個兩個……唉頂！」我都跟著埋怨幾句，其實我最怕的並不是被其他同學恥笑，而是……
「阿哥！！」阿瑜在遠處慢慢走過來，神色不悅。
幹！我就是最怕這個時間碰見阿瑜了……
「阿哥呀！你又比吳SIR罰呀！？」吳SIR亦有教阿瑜的班別，所以阿瑜也認識吳SIR。
「ER……」我支吾以對，欲言又止，肚子裡沒有任何讓我可以說出來的句子。
「叫咗你要溫書咖啦～今次又拎幾多分呀！？」阿瑜真的生氣了…雖然她生氣的樣子仍是很可愛…
「ER……」我仍然搭不上話，此時鴻哥搶著替我回答：「佢得廿分咋！！」
這個混蛋是在報剛才課室出醜的仇……我心裡氣得想用紅毛泥堵住他那張臭口，但當然我當下根本不敢發作。
阿瑜聽到後表現出有點失望，她望著我的目光中還帶點無奈……