【英雄系列1】廢鳩俠: 4
4.
兩位柔道部主將以猛虎之勢跳向阿彩，想一拳打爆佢
阿彩好撚冷靜，用輕巧既步法避開兩人攻擊
面對住其中一人，阿彩先用日字衝拳打中心口，再一腳將踢到幾米外
阿彩完全冇比剩低一人有喘氣既時間，捉住佢右手，用掙批擊佢既格勒底
「呀！！！！！！！！！」條友叫到成個籃球場都聽到
唔撚係掛？咁撚勁？
接落黎跆拳道部既兩人亦使用連環腿攻擊
阿彩用雙手格開佢地
接左幾技後，阿彩睇準時機
用手刀劈中兩人頸部
成套動作，最吸引我既，唔係阿彩既超強身手
而係，阿彩對波fing下fing下
淨低既兩個泰拳部成員，見到阿彩咁撚勁，依然唔撚驚
用快速節奏既連擊夾攻阿彩
阿彩先用邊擋邊攻既策略，將兩個泰拳仔既攻擊一一化解
佢既速度竟然可以同時抵擋兩人既夾擊，仲可以佔到上風
睇佢細細粒，佢既功夫分分鐘仲勁過我老豆
佢先用排雲掌將一人擊倒，再用葉問式連續拳狂轟另一人既小腹
只係一分鐘，阿彩就將七個人打低哂
在場既人，無一個人唔比佢嚇撚死
「屌，你係咪癲架？」我問
阿彩執返起地上支可樂:「我係癲就唔會留力啦，佢地呢d傷抖一日冇事架啦」
「唔係講呢樣呀，我係問你做乜鳩無啦啦打人呀？」
「咁你話要我證明比你睇我係夠料做你拍擋..」
我馬上拉住佢走:「你細聲d得唔得呀？」
「喂，咪撚咁大力拉住我呀！」
成個球場，就只係剩低比阿彩打到訓低哂既學會主將，同一群被嚇呆既人
阿彩一用力就輕鬆甩開我:「捉夠我隻手未呀屌你！」
「你係咪痴線架！冇啦啦打鳩人？」
阿彩仲好似懶懶閒咁:「有咩問題呀？我中學都已經係咁樣打鳩d狗公mk架啦」
「我三歲練洪拳，四歲學詠春，十歲拎空手道黑帶，十四歲開始學kickboxing到依家啦，你估我會唔夠頭先果班廢柴打？」
佢仲好似唔知件事有幾嚴重咁:「你..先唔講打人岩唔岩，你咁樣打法唔驚比人告咩？有cctv架」
「告條毛呀？如果你知道我老豆係邊個，你一定唔會夠膽串我囉！」
「邊撚個咁巴閉呀？」
「その幻想のままで終わって行って
良いわけないだろう
伴う傷 厭わず 恐れを 木っ端みじん」
原來係阿彩電話響
不過...首歌咁撚熟既
「喂，老野，做乜鳩呀？吓咁快有人投訴？！你幫我搞掂佢咪得囉..........唉屌咁好啦，麻撚煩」
老野？
阿彩:「我依家就帶你去見我老豆，咁你就明點解我乜鳩都唔驚啦」
「吓，唔係咁快就見家長下話」
阿彩一拳打落我個肚度:「見你老母呀！佢響附近黎咋」
附近？呢頭薄扶林黎架喎
阿彩帶左我去一hku入面一棟不知名既建築物
上左去8樓之後，lobby果個小姐見到阿彩，就話:「Professor Lau等緊你架啦」
「一早知啦，唔係都唔會上黎呢d鬼地方啦下話」阿彩對住外人把口都仲係咁臭，只係少D粗口咁解
「喂呢度咩地方黎架？」我忍唔住問
「你好撚煩呀，10秒後你咪知囉」
阿彩打開走廊盡頭，前面係一道大得誇張既木門
我望一望右上角既名牌
「Professor Lau， Peter Ting Kin 劉定堅教授」
哦...原來佢老豆係Profess...
「Vice-President and Pro-Vice-Chancellor (Teaching and Learning)」
「吓！！！！你老豆係副校長？！！！！！！！！！！！！！」我忍唔住大叫
阿彩打開門:「你咁大聲做乜鳩呀？未見過大蛇屙尿咁！」
嘩，副校長室係唔同d，竟然同我間屋差唔多大
仲有個超大既玻璃窗可以望到中環甚至維港
「老野，做乜鳩叫我上黎呀？！」
「阿彩你搞咩黎呀？無啦啦打人都有既？！」房內一個貌似徐錦江既光頭佬一見到阿彩，即刻問:「頭先保安室d人話睇cctv見到你響籃球場果度搞事喎，仲打低哂柔道學會果d人tim」
呢個睇黎就係佢老豆，不過成個徐錦江既佢一d都唔似校長，仲好撚滑稽
「班友做表演嘛，我見佢地廢咪落場教下佢地野囉，我塞緊錢入佢地袋呀！」
「唉..今次真係比你激死啦，以前你響中學打人果d我都可以幫你拆丫，依家你入到黎hku都要打，仲要打成7個人咁多？」
「果陣我係睇唔過見d mk周圍蝦蝦霸霸，先打鳩佢地嘛」阿彩搭住副校長膊頭，奸笑:「教埋你啦老野，你咪話我係街外唔知邊個武術聯盟既人，係黎測試佢地，咁咪過到骨囉」
「唉，阿彩你次次都整d大獲野我，早知果陣唔比你出去學功夫」
阿彩:「我呢d叫現代俠客，就緊係做super hero打壞人架啦！係你死都要逼我讀大學之嘛」
「呢個年代仲做乜野super hero呀.....係喎」副校長指住我:「呢個後生仔係..邊位呀？」
我點個頭:「副校長你好，我叫慕容兆琪..」
「佢就係近期生果報成日講果個blackman呀！」阿彩打斷我既話
「喂屌你又話唔同人講！？」
「哦原來你就係果個懲治罪犯既blackman，哈哈果然英雄出少年」副校長拍拍我:「咁阿彩你帶佢上黎做乜呀？」
阿彩:「因為...佢由今日開始，就係我既拍擋！我要同佢一齊做super hero」
一聽到呢句，副校長成個人失平衝，差d跌低
我扶住副校長:「小心呀..」
「阿彩你唔係下話？平時都仲以為你講下笑姐，估唔到你真係黎真架？」
「緊係唔係啦，我不知幾認真，我細個學咁多功夫都係為左做super hero儆惡懲奸架」
呢條女係咪痴撚線架...讀hku e&f竟然話要走去做super hero
我就比個仆街老豆逼鳩我做super hero，我寧願同你調轉呀屌！
副校長已經一頭汗:「你想儆惡懲奸咪去做警察囉！做super hero有咩作為呀？」
「做乜撚野警察呀！？你唔記得阿媽就係跟個仆街差佬著草咩？！！！！」
一講到呢度，副校長即刻冇聲出
阿彩拍拍心口:「放心啦老野，我咁撚好打，點會死呀...」
「唉..我冇眼睇你啦！」
阿彩拉住我走:「我走啦，今晚我唔返黎食啦...你食自己啦！」
副校長問:「你又去邊呀阿彩？」
阿彩指住我:「我上呢條柒頭個屋企度，睇下佢係咪真係咁有料到！」講完就同我一齊出左去
屌，雖然我個樣唔係十分靚仔姐，都未至於柒下話
從副校長果度落到去之後
「嘩，真係估唔到阿彩你老豆係副校長,咁你入到hku..」
阿彩凶神惡煞咁:「你on9！我真材實料經jupas入架屌你！」
「sorry囉...咁你今晚係咪真係黎我度食飯架？」
「係呀，希望你d屋企人唔好好似你咁on9啦...我上堂呀,一陣call你」
「哦..好丫」
仆街，比阿彩搞左成個鐘，拿拿聲返去上堂先
一入到去
「嘩，你條友仔去左邊黎呀？」肥良問
「冇...冇野呀...個fd搵我姐..」
賢仔又笑鳩我：「咁又係，唔通出去屌女咩」
仆你個街，比我溝到露露你地就仆街
係喎，唔知道露露依家好返d未呢？
放學時已經係四點半，阿彩叫我去地鐵站等佢
我特登駛開肥良同賢仔「喂，我忽然急屎呀，你地行先啦」
「唉，懶人多屎尿」
一落到地鐵站，就已經見到阿彩坐響月台等緊我
「屌你老味，快d丫嘛！」阿彩又西口西面
「大佬..唔駛上堂咩阿姐」
「大學要上堂既咩，我走左一半堂啦」阿彩企起身:「行啦..」