[屍故] 完sem後被迫留在科大玩一場生存遊戲: 第１２章—情報

「咁又係……」我在想，若果阿明還在，一定可以想出一個辦法來。

「咁依家點算好？」沅婷問道。

「等一等，比我諗吓先。」我需要一些時間思索一下，不敢再好像之前胡亂說對策。

我在腦中開始整理現在我所知的情報作分析。

第一阿明高威生死未卜，還記得他們引走喪群是向著ＬＳＫ的方向，而我們則是在停車場帶著屍群遊花園。若果阿明他們真的還生存著，他們現時的位置最大機會必然是ＬＳＫ，但即使如此，我們都不可能前到ＬＳＫ找他們，因為一來現時的屍群大多已經不像一開始的那麼弱，愈遠離入口，所遇的屍群將會愈強，而且就算我們冒了這樣大的風險，都不一定會找到他們。所以找阿明作為下一步是不可行。





第二還記得我去到第二實驗室，當時我所見的食物已經少了一大半。若果是阿明他們拿走的話，這根本不合理，他們為什麼要拿走？既然都回到實驗室，留到那裡不是更安全嗎？更不可能是沅婷拿的。也就是說，極有可能是肥波那個畜牲，作出獸行後再回到實驗室拿走食物。看來他也不敢再留在實驗室。這畜牲體格奇差，單靠自己一個人，帶著食物如果沒有立腳點，遲早都會死。可惜現在不知道他走到那裡，否則把他的食物搶回來，我們生存的機率就能大增。

但是，我們的食物問題又應該怎麼辦呢？不單止，只有我和沅婷兩個人的團隊，人手根本不足，難道我們要找別的團隊求救嗎？但那有人會肯讓我們加入，無故分出食物給我們。

沅婷一直靜靜地坐在我的旁邊默不作聲望住我，看著我沉思的模樣。

我想得入神，一開始都未有為意，但我一回神過來，見到沅婷托住腮，靠得很近的看著我，嚇了一跳。

「哇～」我全身抽了一下。





「哈哈～做咩呀你？」沅婷大笑道。

「咩…咩做咩姐，我咪比你嚇親囉～做咩咁望住我？」我問道。

「咁你叫我等你諗下先呀麻，我咪等你囉～」沅婷繼績笑道。

突然喇叭傳來廣播，打斷我和沅婷的對話。

「哈佬～各位同學仔，又係我呀，唔知大家玩成點呢～一定係好開心啦。不過呢大家要食得飽先有力氣再玩落去嘅，所以呢，係今晚１０點正，會有一袋食物由atrium嘅天花吊落嚟地面，大家想食就記得嚟拎啦。再見啦咁多位同學仔，記得認住我把聲，隨時又會再有貼士比大家咖。」





「唔係呀麻，咁好死？」我驚訝道。我們正是缺糧，這絕對是個大喜訊。我望一望鐘，現在是下午三時半。

「我仲以為我聽錯添呀！」沅婷喜道「早知頭先你就唔洗咁苦惱啦～」

等等！不可能有這麼花算的事吧？atrium？對了，那頭紅色怪物仍在那裡，他們是想用食物引誘我們去atrium，讓那頭怪物可以擊殺我們嗎？哪到底我們應不應該去冒險拿食物呢？

不！而且仍然生還的人，相信很多都和我們一樣，面對糧食問題。也就是說會有其他人跟我們一起搶食物，但我覺得最主要的困難會是那頭怪物。

「唔係咁簡單咖～仲記唔記得個隻怪物，佢仲係atrium咖～」我說道。

「係喎，咁點算呀？到底應該去定唔去？」沅婷問道。

「我地依家都就快無嘢食，其實頂硬上都要去。」我應道。

「但係……」沅婷無從反駁。





「咚！咚！咚！」門外傳來敲門聲。

「係無人係入面呀？」一個男人叫道。

我和沅婷對望一下，一聽這把聲音就知道是阿俊。於是我馬上開門給他。

把門打開一望，果然是阿俊，只見他身上都是血跡，面色蒼白。

「阿俊！你竟然無死到！？」我激動地說。

「你夠無事無幹啦，點解我唔得？」阿俊苦笑道「不過軒少就……」

別怪我無人性，我對於軒少的生死其實不感興趣，甚至沒什麼感覺，因為我跟他相識根本不久。





「你入嚟先講啦～」我一手拉阿俊入來。

「可唔可以比啲嘢我食先？我去過之前個實驗室，一個人都無，啲嘢食又無哂，真係大整蠱～」阿俊說道。

「得得得～」我從背包拿出一個小麵包，阿俊狼吞虎地把它吃掉。

我心想，現在我們又多了一個人，食物則更加不足，也就是說搶物資一事已經沒有轉彎的餘地了。

「我明明之前見到個保安部比隻嘢撞冧哂咖喎，點解你咁都無事嘅？」我問道。

「個陣比舊石屎打暈咗，醒返個陣見到自己訓個個位啱啱好啲石屎又係壓我唔中，咁咪無事囉，總之就好好彩啦～」阿明用兩三句帶過。

「唔…唔好講哩啲住！我有啲更重要嘅嘢要講！」阿俊認真地說「不過阿明佢地呢？」

「我地…我地仲阿明佢地已經失咗聯絡…」我面上帶點失落。





「咁…肥波呢？佢唔係應該同沅婷一齊咖咩？」阿俊問。

糟糕！阿俊不知道肥波的獸行！我已經見到沅婷的面色有變了！

「條仆街背叛咗我地，佢拎走我地一大半嘅食物走咗去。」我說。這番話又可以避過提起沅婷的事，又可以表達出肥波已經不屬於我們的團隊。

「係喎！你頭先又話有重要嘢講嘅？係咩呀？」我再轉移話題。

「係！你過嚟，我用電腦開比你睇！」阿俊連忙開啟在實驗室的電腦。

阿俊插入USB手指，然後開了數個檔案。

「個陣我hack咗入去個網絡到，但係已經比人事前完全封鎖哂同外界聯絡嘅途徑，不過我係佢裡面見到啲咁嘅嘢…」阿俊打一個名叫「game」的file，入面有很多命名為學校名稱的word檔，而其中一個word檔名叫科大，入面正正寫有一千個人名。





「你睇吓…你個名，沅婷個名…我地啲名都係哂入面。」阿俊接道說。

「即係話，入面嘅名應該係今次生存遊戲嘅人。」我猜測。

「唔止，發送日期差唔多係一個月前，即係話我地玩哩場遊戲唔係巧合，應該係有人一定設定好要我地玩。」阿俊說「仲記唔記得阿明之前講過，背後策劃嘅一定係一個好大嘅組織？」

「嗯嗯！咁依家更加證明到阿明之前所講嘅嘢。」我應道。

「無錯，就連學校都同佢地合作，有心將個啲人編到最後一日考試，之後再捉我地嚟玩哩場遊戲。」阿俊說。

「咁點解係選中我地？目的又係咩？」我問道。

「我諗目的應該係哩個。」阿俊又打開一個叫作「MU168」的檔案。

內文大概是寫MU168是一種令人們可以高度控制自身情緒壓力使人體各方效能得到強度提高的藥物，現要透過實驗測試效能，而實驗內容是一班曾注入及未有射入作對照實驗，從而計算出成功率及增幅百分比等等。

由於檔案中所提及內容實在太深奧，即使我是主修化學，單靠現有的大學知識都只能解讀極少部分。

「屌！佢地係咪痴撚線咖？拎我地做實驗。」我看完這些檔案後激動地叫道。

「而且你望下哩句，哩到寫住『實驗過後全部參與者包括生還者都會被處理。』」阿俊指住電腦螢幕上的句子。

「被處理？姐係咩意思呀？」我問道。

「可能…可能佢地由頭到尾都無諗過比我地有命走。」阿俊灰心地說道。

沒打算放我們走嗎？那麼我們在這場遊戲堅持生存下去，又是為了什麼？

「咁姐係點…姐係我地係咪一定會死？」聽到這裡，沅婷同樣感到灰心。

「所以你要應承我，你一定要好好咁生存落去。」

「我相信你係一個會盡全力守承諾嘅人！所以你要應承我！」

阿瑜，你知道我背負對你的這個承諾會有多困難嗎？

「無論點都好，反正我地仲係有太多未知嘅嘢，都未到絕境我都都唔應該認輸，佢地話處理姐，唔表示我地會企定定任佢地舞。」我只是想盡力地生存下去。

「都係嘅，同埋仲有一樣真係好奇怪嘅嘢，就係無論send個個定係收個個，IP都係係科大入面。」阿俊說道。

「吓！？即係話？」我已能猜出八九。。

「嗯！個策劃組織嘅總部話唔定就係係科大入面。」阿俊作出總論。

「咁你知唔知準確嘅位置！？」我接著問。

「唔知，淨係知道係科大入面。」阿俊搖頭道。

「屌！唔撚係呀，讀咗咁多年科大都唔知有啲咁嘅嘢，早知當初就唔撚入哩間。」我不忿氣地道。

結果就算知道多了有關組織和遊戲的事情，我們還是做不了什麼。

不過總好過什麼都不知道，就死得不明不白吧。