[屍故] 完sem後被迫留在科大玩一場生存遊戲: 第７章—計劃
「嗚嗚…」門外的叫聲和拍門聲愈來愈大，相當影響我們討論。
「我地係時候要執嘢走，出面積咗太多喪屍，我地轉去第二個lab，再討論之後要點做。」阿明說。
我們馬上收拾好行裝，便由後門前往到另一個實驗室，途中聽到不知由那麼傳來的聖詩歌聲，不過我們沒有多加理會。但他們這樣做一定會引來很多喪屍，這反而減低了我們可能會遇上喪屍的機會。
入到另一個實驗室，我地坐在地上，阿明又開始引導大家討論。
「好啦，咁依家首先第一樣嘢，我地到底應該真係係科大死守五日，定係諗辦法逃走，或者諗辦法聯絡外面嘅人救我地呢？」阿明問。
「其…其實我地三個LAB走來走去，守五日應該都得掛，如果仲搞咁多嘢，咪仲危險。」高威仍然顯露出他膽小的本色。
「我又唔係咁睇，依家我地睇落好似有三個基地好安全咁，其實係因為有其他人存在，分散咗喪屍嘅分布，再過多幾日，喪屍多咗，人少咗，我地一樣都係走唔甩。」阿俊說。
阿俊認真思考時，和平時嘻皮笑臉的模樣分別真的很大。
「我都覺得係，咁係咪即係……」阿明的說話被外面傳來的拍門聲打斷。
「救命呀！開門呀！我啱啱見到你地入咗去咖！比我地入嚟啦！」外面數把聲音同時叫囂。
我聽到後，本能意識就打算起身開門，當我企起來的時候，阿明一手拉住我，然後搖搖頭。
「點解？一開始你唔係都肯放人入嚟咖咩？」我咬一咬牙輕聲問道。
「咪係囉！」沅婷似乎也同意我的看法。
「個陣係因為個團隊唔夠人，依家已經好夠，人再多就會手腳亂。」阿明回應。
「但…但係人命嚟咖喎」由於先前阿明表現出他驚人的分析能力，令人十分佩服，所以我現在都不敢直接說他的判斷是錯的，只敢質疑一下。
「我地哩到都係人命嚟，如果比更多人入嚟，我認為會降低我地嘅生存率。」阿明堅定地說。
「咁…咁…」我無言以對。
眼看其他人都默不作聲，應該也是因為阿明的分析能力，認為佢的斷判不會有誤而沒有出聲反對他。
「你地走啦，我地唔會開門，我勸你地快啲走，一陣有喪屍嚟無人幫到你。」阿明大聲對外面的人說。
「你好嘢！你地因住嚟呀！」外面一個男人凶惡地叫道，再用力拍一下門。
然後他們就走了，而我們都繼續討論。剛才那個男人最後的一句話，一直在我腦海中回轉，使我心緒不寧。
「好啦！我地繼續，咁到底我地諗辦法走出科大，定係搵辦法聯絡出面啲人呢？」阿明問。
「其實我有諗過係seafront個面游水走，但係你之前都話四周都有嘢監視我地，我驚未落水無啦啦就比人射低，所以我諗逃走庋該無咩可能。至於咩聯絡出面嘅人，又可以點聯絡？」我說。
「ＥＲ…哩層我…如果可以去到科大嘅保安系統，我可以試下hack入去個網絡試吓同外界聯絡。」阿俊說。
「唔撚係掛，乜你識哩啲嘢咖咩？」我驚訝地說。
「我無同你講姐，你平時都唔講哩啲嘢嘅，咁我同你講做乜姐？」阿俊說。
「又好似係。但係保安部係atrium，啲屍又由個面入嚟，好難去到個到喎。」我說。
「辦法唔係無嘅，如果由我地引開班喪屍，之後比阿俊入去保安部，咁…」阿明說。
「傻咖！用自己嚟做餌！萬一我地引完比班喪屍圍困住咁點算？」高威說。
「阿俊，你覺得你要用幾耐時候先hack到入去？」阿明問。
「好難講，不過我諗最少都要一頭半個鐘。」阿俊苦惱地說。
「一頭半個鐘呀，仲要係最少，點捱呀？」高威持反對態度。
「但係咩都唔做係到白白等死咪仲衰！我覺得有機會就可以搏一搏！」我說。
「咁係咪你嚟做餌呀？」高威叫道。
我不想被高威這個比我更懦弱的人看扁，但是早前我已經負責出外找物資，為團隊冒過險，若果現在因一時之氣就衝口而出說「好」，感覺太不花算。
「點解係我？我同沅婷之前已經出過一次去幫你地搵嘢食啦。」我說。
「好啦，唔好嘈啦，我想問吓，哩到最好打係咪軒少？」阿明說。
其實一看體型就知道軒少是最健碩的一個，而且之前軒少救沅婷的一幕足以證明他是最強的一個。所以在場的人都和應。
「嗯嗯，咁我大約知道可以點做。不過首先，我地投票決定咗到底做唔做哩件事先。」阿明說。
肥波和高威想也不想就異口同聲說反對，而我，阿明和軒少都認為可以一試。至於阿俊，他覺得這件事他所負的責任實在太大因而選擇棄權，交由我們決定。最後只剩下沅婷仍未表態，眾人望向沅婷等待他的決擇。
「沅婷，你仲考慮緊啲咩？」我問道。
「我…我…我好驚你地會有事。」沅婷又眼泛淚光。
「吓…咁…咁你反對咪得囉。」我真的很怕女仔哭。
「但係你…」沅婷似乎又有其他顧慮。
「不過既然你都贊成，咁…咁我都贊成啦。」沅婷擦一擦眼淚，面上一紅又道。
這…這是什麼感覺，是軒少，他的眼神，好像要把我殺死一樣，剛才我有得罪過他嗎？真是奇怪，由一開始已經不停針對我，難道是因為……
「放心啦，唔會有事嘅。」我伸手彈一彈沅婷的額頭。
「好痛呀！咁大力！」沅婷想向我的額頭回擊，但都被我通通隔開。
「衰人！」沅婷鼓起泡腮。
其實剛才的一切都是故意做給軒少看，果然他的眼神就更加銳利，這次更加像要把我千刀萬剮般的。看來，軒少是對沅婷是有意思的，而且妒忌心也相當重。不知道沅婷怎麼想呢？不過軒少那麼優秀，正常都……
「哈哈哈！好啦玩夠啦，我地講返正經嘢先。」阿明說。
「我地哩次嘅計劃，主要係首先引走喪屍，等阿俊可以去到保安部,而且有足夠時間hack入網絡，咁頭先阿俊都話要一段時間，咁我打算等軒少幫阿俊守住門口，比佢專心去搞佢啲嘢。至於引走班喪屍嘅，最好係由我地其餘嘅人都一齊去做。」阿明接著說。
「要引成個幾鐘，邊可能得呀…」高威說
「風險一定會有……我地唯一可以做嘅就係相信阿俊可以盡快完成到。」阿明也無奈地說。
但這樣說好嗎？未免會給阿俊太多壓力吧。
「嗯！我會盡力！」阿俊展現出他的信心。
「咁好啦，不過啱啱我地搞完一大輪嘢，不如我地休息三個鐘，之後我會再同大家講大概要點做。」阿明說。
大家都明白這次危險性很高，這三小時隨時是我們人生的最後三小時，所以我們都捨不得用作休息。而我則和阿俊靠著牆坐聊天。
「喂，阿俊，哩次真係靠哂你啦！不過你會唔會好大壓力呀？頂唔頂得順呀你？」我問道。我好像從未試過同這種口吻跟阿俊說話，一直都是唇槍舌劍居多，可能是因為這可能是最後的談話，所以格外珍惜吧。
「屌！男人老狗咁婆媽，輕輕鬆鬆啦！咪話我話你啦，你唔同沅婷講多幾句？我驚你後悔。」阿俊說。
「可以講咩？」我問道。
「你仲扮嘢？你應該都對人有嘢啦吓話？依家唔講真係隨時以後都無機會喎。」阿俊說。
「仲可以講咩？你睇吓人地兩個傾得幾開心。」我咀角向著沅婷和軒少的方向微揚，暗示要阿俊望過去。
「咁係你唔潦人地姐。」阿俊說。
「喂！沅婷，阿豪話有啲嘢想同你講喎！你過嚟呀！」阿俊在我未有反應前擅作主張叫道。
「吓？做咩呀？」沅婷邊問邊行過來。
「自己醒水啦。」阿俊輕聲說完後便走開，讓我和沅婷獨處。
真的要說嗎？但其實我也不知道人家是怎麼想，我對愛情這方面的觸感接近零，我想還是說別的話題吧。
「ｅｒ…無…無呀！我想同你講一陣間要小心啲，要跟實我。」我勉強說出別的內容。
「吓…我…我會咖啦。」沅婷點一點頭，然後低頭微笑。
此時，軒少又用一對鋒利的眼神盯著我，正因如此，我突然想問一問沅婷和軒少的關係，因為似乎也不像是普通朋友。
「係呢，你同軒少點識咖？」當然我一開始絕不要單刀直入地問。
「係上個月，個陣我自己一個係canteen食飯，之後佢就坐咗落嚟，仲問我拎電話添，之後咪識咗囉。」沅婷說。
「吓，原來係咁樣識咖！」我驚訝地道。
「咁…咁唔係你以為係點識？」沅婷疑惑地道。
「無呀，我見佢好似好中意潦你講嘢咁姐。哈哈！」我刻意假笑兩聲，裝作是隨意一言。
「吓…吓…邊到係。」沅婷的面上彷彿寫上了「隱瞞」兩隻字。
「仲扮嘢喎～係咪有啲不可告人嘅秘密呢？」我用輕佻的語氣說。
「無呀無呀！不過其實…」沅婷緊張地道。
「其實咩？」我問。
「佢…佢之前同我表過白。」沅婷尷尬地道。
「唔係掛！咁快，識得個一個月鬆啲咋喎～」我驚訝地說。
軒少對沅婷有意思，這我經已看出來，但沒想到竟然比我還要快表白。
「咁…咁你點答佢？」我接著說。
「我拒絕咗佢，我同佢認識都唔耐！」沅婷果然是一個好女仔，不會只因為對方條件好就輕易和人拍拖，而我都鬆一口氣。
「咁我同你識得夠耐啦，又唔見你同我一齊？」我開玩笑說。
「……」沅婷低頭默不作聲，滿臉通紅。
我還以為我會被她作勢打一噸，看來我這玩笑開得太大了，弄得她不懂回應。
「哈哈…ＥＲ…」我用假笑來沖淡尷尬的氣氛，想開一個新話題卻不知道說什麼好。
結果誰都沒有再作聲，只是靜靜地坐在一起，用時間沖淡這份尷尬感。
突然沅婷把頭靠到我的肩膊，原來她睡著了。看來先前的行動已經把他的體力透支了。我亦逐漸把頭靠向她，她所傳來的陣陣髮香使我陶醉，看著她熟睡的樣子令我感到很安寧，而我都漸漸閉上眼，入睡了。
分隔線
————————————————————————————————————————————————————————————
「……而科大，生還人數得返６８３人。」一名年輕人讀他手上的報告書。
「點解咁快得返咁少咖？」彼德教授身穿實驗袍，坐在他的坐位上問道。
「因為好多人一開始就自殺。」
「咁MU168試劑嘅成功率？」
「183人中只有3人成功，成功率為1.639%。」
「好啦，你返出去啦。」
彼德教授繼續坐在座位上觀看螢光幕。
————————————————————————————————————————————————————————————