我的如意約定: 第二章
九月的第一天，走進班房，冷冰冰的。陌生的臉孔在互相打探著…
隨意找一個座位坐下
「你叫咩名呀？」旁邊的女同學問我
「榮本鏘，我叫榮本鏘」我含羞地回答
「我叫林霖呀，你地叫我霖霖喇」坐在前座的另一位女同學都答了
「你地叫我小玲喇，咁我地以後就係好朋友」旁邊的女同學對我們說
「咁我叫你小鏘喇」小玲只對著我說
風吹著我的臉頰，風越來越強…
---------------------------------------------
「呼…呼…」「鏘，呀sir望住你喇，醒呀」「呼呼…」林霖一邊吹我塊臉，一邊拍我
「翼生，上我音樂堂都訓得著，你都算勁。同學唱歌考試比足心機準備，你一個訓著就白費曬佢。下一個到你女朋友仔唱呀，好起身聽呀」陳sir用佢個激光筆照住我同林霖
（我姓榮，英文拼音Wing 中文解釋 翼）
林霖走出去個鋼琴道，放好枝咪。
「我今日自彈自唱…首歌對我黎講好有意思…【蒲公英的約定】」
「一起長大的約定，那樣清晰，打過勾的我相信…」林霖情深地唱著每一句歌詞，眼卻看著這邊，我地四目交投。
「而我已經分不清，你是友情，還是錯過的愛情」佢望一望我，唔係，佢眼甘甘咁注視住我，好似期待緊我有所行動…但係我腦海浮現嘅竟然係小玲。我閉目暫時斷絕林霖嘅眼神，回想起記憶中小玲嘅輪廓，雖然好模糊，但係感覺好真實仿佛小玲就係我身邊拖住我係我耳邊輕呼著小鏘這個名字。或許，我真係分唔清，對佢係友情，還是錯過嘅愛情。小玲，你究竟係邊…依刻你又做緊咩野，有冇想起過我這個人…
林霖坐返埋個位度，同我講「唱得好唔好聽呀！做咩合埋眼呀，好感動呢！」
其實我應唔應該講返…我對佢唔住因為個刻我諗起嘅係失去聯絡已久嘅小玲…
佢雙眼充滿期待嘅眼神…我不忍將真相講俾呢個單純可愛嘅小女孩聽…
我惟有將真相藏在心內，擠起一個笑容用讚賞嘅語氣講左句「你把聲真係好溫柔，你知唔知依首係我最鍾意嘅歌黎？」
「你其實係咪有啲野想同我講，例如我地嘅回憶…小學嘅回憶」林霖就係咁樣坐喺我格離，眼尾都無望一望我。我心頭一陣，仿佛被霖霖看穿了我的秘密。
我輕聲道「小玲……」
「林霖，你記唔記得小玲，我地小時候嘅好朋友。」
「你唔係問過我好多次架咩，我都答你無。我記憶中由入學直到小學畢業都無呢個人存在過。鏘，你究竟發生咩事，做咩係咁講呢個名？？」
「係我模糊嘅記憶中裡面，小二個陣曾經有一個女孩同我地挽得好埋，不過之後就再無見過佢。近呢一排，我成日係夢入面浮現出好多零散嘅碎片，全部都係關於佢嘅事，所以先問下你記唔記得小玲。」
「翼生，輪到你唱啦。」陳sir高呼著我的名字。
林霖一面惘然望著我，我同佢講「晏啲再傾。」
話咁快就放學，星期五放學就係咁爽。拎住塊拍，頭都唔轉下就行出門口。
「你今日上山呀，順路喎！一齊行喇」林霖彈出黎我格離，一手就拎走我塊拍。（順帶一提，我學校坐落半山）
我無理佢繼續行，過左一陣，佢好似好驚咁比返塊拍我…
「你唔係講過比女仔掂過塊拍會輸波嘅咩，你聽日打決賽……」
林霖雙手拎住個袋，臉紅紅，眼濕濕，就咁企喺原地。
場比賽佢仲在意過落場打嘅我，佢係唔係太緊張呢
「其實聽日場波輸唔到，我輸一場，仲有隊友做野，團隊賽嘛。我輸左，都係我技不如人，唔關任何人事。塊拍好重呀，幫我拎住先得唔得？」
伸手拉住佢對手，其實咩野會輸波嘅傳說，都係假。如果天要對手贏，佢拎住個球筒打都會贏。
「聽日我會去睇你打，你要拎個冠軍比我睇。如果你真係贏左，你就要做我男朋友，我講嘅係真係男朋友。」
「吓…咩咩呀」
「你唔好理，總之聽日就比心機打」
其實我真係聽唔到佢講咩
到左體育館門口，講左句byebye，我就走入去更衣室換衫。
推開大門，我一身紫襯紫嘅舊隊衫，加純黑球鞋走入三號球場。場外有一個學生妹。
點解我會知佢係學生妹，因為佢著住套學校PE衫。綠色橫紋應該係學社嘅區別色，黑色短褲唔洗咩描述。一頭及下巴嘅黑色短髮（唔係TB嗰種），佢整體上唯一嘅特點係…矮，我唔係高，佢仲矮我一個頭。簡單黎講，如果佢唔係著住中學校服，會以為佢係小學生。
「呀雀咁早呀，早左落堂？」
當年佢喺open day參觀我學校，我身為helper，同佢介紹左一陣，就因為咁識左佢，知道佢叫呀燕，之後就叫佢呀雀。
佢升中想入我學校讀，因為喺男女校容易識男仔，點知入左同區嘅女校。
「話說你聽日唔係打學界決賽咩，唔洗練波仲有閒情約我打波」佢一路同我搓波，一路講
「又話說我聽日輸唔到」我對兩個人講同一句野，不過依次好明顯真心啲…我地睇過對手之前啲比賽，其實我地牌面贏曬。
「鏘哥，你都幾囂張喎！點講都係A grade，對手一定唔會好似我咁弱雞」
「呀玲！！」
我回頭望，個羽毛球黎緊都無理，打到我個身。
原來係格離場打緊分…
「鏘哥，你做咩聽到人大叫，波都唔識打，咁大反應呀」
佢好似笑緊我細膽咁，件事點會係佢咁諗
「鈴…鈴…」一個鐘咁就過左
「呀雀…其實我頭先咁大反應，係因為我一直都揾緊一個小學同學，佢就係叫「玲」…其他就，我剩係記得我係叫佢小玲」
我好希望可以見返小玲，都好想對人抒發我對小玲嘅掛念，可能咁樣做無意思，不過好似感覺舒服左。
呀雀無講任何野，從眼神睇得出佢明白，佢知道我嘅感覺
呀雀換返校服，白色裙加粉紅色波點領巾嘅校服裙，睇幾多次都咁特別
「做咩眼都唔眨咁望著住我」呀雀都係眼都唔眨咁望住我
我無理由真係照直講…我比佢迷住左…15秒
「如果我無睇錯，你好似由中一開始無換過，都應該無改過件校服裙」
呀雀一下打落我個後尾枕道
送到呀雀返佢屋企樓下，講左句byebye，轉個身就走去巴士站…
有人喺背後跑過黎…
「想唔想我聽日去睇你打決賽呀？」
我停低左，我知道係同我講…
「其實如果你唔想…我都會去，我自己學校都打。咁如果你想…我就順便睇下你打喇」
我轉身同佢面對面…
笑一笑
回頭期望遇見你在步近如行人
我數百次轉身站在問
為何還望再見為何還要等