【為左老友，我將佢女神變成我女友】: 【第二十一回：神秘】

※※※※※※※※※※※※※※※※※※※※※※※※※※※※※※※※※
【第二十一回：神秘】

「喂，今晩出黎飲番杯。」肥龍透過電話約我出來。

但是我真的對什麼事也毫不起勁。

三天之前，我仍然某某的男友。然而只是一頓飯，我由天堂跌落地獄，失去了入讀醫科的理想，也失去了所愛的人。

真真正正的一無所有。





「不如下次先喇，我呢排好忙喎。」我不想肥龍感到難過，要聽我這個「雙失青年」發牢騷。更何況，倘若他知道我和小玲分手後，應該會是十分的氣憤。

肥龍忽然破口大罵：「咪以為扮忙就可以避開我！你又冇打暑期工，又冇約會人，扮乜鬼野呀你！」

看來我已經沒有退縮的空間。

「你啱，咁你想點約？」

「老地方，九點鐘。」





九時正，我在肥龍家附近的公園等候着他。可是眀明已是九時零五分，肥龍仍然未出現。

印象中，肥龍並非那種會遲到的人。

或許有句話說得對：紀錄是用來打破的。

九時三十分，肥龍終於出現。

「又話九點鐘既肥龍，做乜遲到呀？」我調侃着肥龍，可是肥龍一點反應也沒有。





「啪！」

我倒地了。

我摸着疼痛的胸口，對肥龍説：「你搞乜呀？同你講下笑係咪都唔得先？」

「邊個咁得閒同你講笑呀！」話畢，肥龍一腳踢前，把我的身軀當作發洩的沙包。

「我明明叫左你好好對佢㗎，陳英傑！你攪乜野呀！」

「我都唔想㗎。」

「你收聲！明明就係你自己唔開心，仲要發洩係小玲身上！」





「我同左佢講……」忽然我被踢中了肚，痛得連本來想説出口的話也呑回肚子裡。

「你個死仔，如果唔係小玲怕你有事通知我，我都唔知你攪到咁。其實成績係咪真係咁重要？入唔入到醫科又係咪咁重要？全世界幾十億人都唔係讀醫啦，但都係照舊生活。你陳英傑係咪讀唔到醫就乜都做唔到先？為左一件咁既事就唔開心？讀唔成醫咪讀第二科囉，係香港讀唔掂咪出外國讀囉，想讀番醫咪搏trans科又或者first hon post grad囉。使唔使咁灰？使唔使對小玲出氣呀？」肥龍罵着，每句話也打進我的心坎。

我好像一個小孩，愛上了那個胖乎乎的小木偶，愛惜得不願意離開小木偶。感覺小木偶像是我生活的一部分，亦正正是我的一部分。但在我看見了一直夢寐以求的遊戲機瞬間，我放下了手上的小木偶，任由它被踐踏，甚至自己也摻了一腳。

只可惜我得不到夢想中的遊戲機，也一手摧毀了本來極愛惜的小木偶。

小木偶從來沒有拒絕我的愛，但我卻把它唾棄。

無奈錯已鑄成，試問我又可以如何是好？

「對唔住。」鑄成大錯的我，除了坦白承認過錯，已經別無他擇。

我垂頭，等待肥龍的最後審判。





「總算你講番句人話。」

我詫異地舉目一望，眼前並不是拳頭，也不是怒髮衝冠的判官，而是帶着微笑的財神爺。

肥龍聳聳肩道：「如果唔係小玲鍾意你，我真係一把二把打死你。見你都有啲悔意，等我幫你哄番小玲啦。不過只此一次，下不為例。夠膽有下次既話我就打扁你！」

看看肥龍碩大的拳頭，我對挽回這段愛情的熱枕又堅定了些。

「得。咁你有乜好計先？」

「嗱，我幫你約佢出黎，之後就……」肥龍一直用手比劃，向我解釋他的計劃。

「好，一於咁話。但你介唔介意我問你幾個問題？」





「問喇。」

「你點解會鍾意佢嘅？」

「天意卦，我點知啫？」我不禁連連點頭。好比我與小玲間的一切，根本也就是命運大魔王的惡作劇。

「咁點解你依加又唔去畀個機會你同佢發展啫？」

他抬頭，輕掃鬚根，嘆道：「你信唔信呢個世界有命運？」

「我信。」

「我都信。我相信你同小玲係上天既安排。」

「吓？點解你咁肯定？」





肥龍輕撥鬚根，笑了一笑，沒有回答。

「肥龍？」我好奇着肥龍的答案。

「因為我知道。」

「懶神秘。」

肥龍輕嘆一聲，遙望天上的月光，暗道：「世界並唔係你所諗咁簡單。」

「扮哂野。」我暗罵肥龍的神秘。