[毒撚][少甜]點解我會變左做索女架????: 4
而家既感覺就好似睇緊驅魔人既唔知邊集;隻女鬼係山洞由遠至近咁衝埋黎,你想避都無得避。
由落車開始已經有好多學生哥望到我實一實,我仲見到幾個同學;好彩佢地都唔認得我—從佢地口中:條女好索啊﹗所得知。
如果係一班囡囡對住我講:條友好型啊﹗你話幾好呢﹗
可惜事實係唔會改變,每下一級樓梯;我對胸就微微震一震。
震下震下,面燶燶地無視曬所有目光後;終於黎到籃球場。
籃球場係由兩個全場組成;後面有一個足球場,而旁邊係馬路。
整體都幾新淨,籃球場邊仲有一個更衣室。
兩個籃球場既人各自各打緊3:3,即係分開左四個場。
大部分都係著住我間中學既校服,有d就著住籃球衫;佢地雄霸曬四個籃球場。
望兩望就搵到肥輝既位置;一個肥仔、一個高大男仲有一個矮毒向左走向右走齊齊落場。
三樣完全唔同類樣既人集中埋一齊,個配搭真係好騎呢亦都好顯眼。
奇怪地呢個場靜係得佢地三個,場邊坐左幾個隔離班既同級生睇住佢地打;仲有一班普通模樣既女學生,好明顯係因為白粉師兄。
當中亦夾雜左幾個唔錯既囡囡。咦,條女幾靚喎﹗咪住先,佢咪係阿怡﹖
唉,連阿怡都上埋釣。
白粉師兄著住校服,無zip衫;應該著住件灰色底衫,著住一對黑色vans;右手戴住護腕運球。
肥輝呢就全套高比拜仁既湖人套裝落場,連對鞋都係高比既。
而阿康呢就著住成套校服皮鞋,格格不入地係旁邊走黎走去;佢根本唔識打籃球,平時又唔多見佢打,
做乜咁有勇氣挑白粉師兄啊﹖
睇形勢佢地應該係一肥一瘦vs白粉師兄。
白粉師兄果然係浸過下洋水,輕易就運球兜過肥輝;輕輕一撞仲撞到阿康飛左出場,再上籃得分。
「你無事丫嗎。」瀟灑得分仲要行埋下伸手拉返起阿康,真係乜彩都攞曬。
場外自然散發住一陣囡囡既尖叫聲。
我企係遠遠既場邊觀察呢一切,仲考慮緊行唔行過去好。
如果行過去要用咩做開場白呢﹖呢身look同今朝相差咁大;仲有今朝佢先非禮完我黎…
諗起呢點又滿臉通紅,當中亦夾帶住非禮我既憤怒。
算啦﹗橫掂佢地都開緊波,有無我都唔係重點啦﹗
就係我想轉身走既瞬間,有個籃球跌左係我腳邊;本住人人為我我為人人既精神,我拎起粒波,拋俾隔
離場班同校師兄;點知佢地回應一句:「唔該曬靚女﹗」跟住其他人就哈哈哈左幾聲,早知唔幫你﹗
當我再轉身諗住走既時候,我發覺已經太遲;果種非常熟悉俾人既感覺—白粉師兄的注視又再重現。
我緩緩轉身望向佢既方向,白粉師兄正笑住望住我;一副你今次仲可以走去邊既表情。
睇黎係頭先句靚女同班人既笑聲吸引左佢既注意。
我呆立原地唔知點做好。
因為佢個樣真係想食左我咁﹗
白粉師兄拋低左個籃球,棄肥輝同阿康於不顧—佢地望向我既方向,終於搞清楚發生咩事。
望見白粉師兄一步一步逼近,而我就好似獵物咁等死。
媽﹗我唔要啊﹗
佢對腳咁長,行左陣就到左我面前:「小樂樂你遲到喎。」雙手插袋,笑住望向地下。
「啊…因為塞車﹗」好快地諗到個籍口。
「咁你岩岩因咩事返屋企啊﹖」雙眼向上望住我,眼神異常銳利。
「我…我…」小毒向左走向右走最怕就係同人有視線交流。
「哈哈傻妹﹗你唔駛驚到咁架喎﹗」白粉師兄突然笑起上黎;我驚到點啊﹖雙手抱拳置於胸前,好似隨時想反擊咁。
俾佢咁恥笑,我臉上又紅一紅;雙眼羞愧地望落地下。
「黎啦﹗我等左你好耐啦。」白粉師兄突然地由輕佻既語氣轉用溫柔,真係好唔慣。
佢伸起一隻手想捉住我隻手;我緊係閃啦﹗閃左一下﹗兩下﹗第三下就俾佢捉住左。
「喂﹗」抬起頭用憤怒既視線對佢對望。
「如果你再唔行呢…我就抱起你行。」白粉師兄又用住一貫既輕佻同笑容。
於是我就心不甘情不願地被佢拖住隻手,頭dupdup咁返去人群中。
阿康同肥輝都o曬嘴咁望住我地。
「大家好,呢個係我女朋友—樂樂。」白粉師兄企係我後面,隻手搭住我膊頭;平靜地說。
吓﹖乜向左走向右走野啊﹖點解你同阿康都興玩呢味野啊﹗
當我想開口解釋時,白粉師兄我係耳邊細細聲講:「你拒絕我就要同大家分享下秘密架啦。」
「你….﹗」我嬲到生蝦咁跳。
「仲有如果你唔配合,咁或多或少…我都要漏少少口風既。」
全軍覆沒﹗
白粉師兄示意地輕掃一下我臉龐。
「大…大家好啊…﹗我…叫樂…樂﹗」非常生硬地用著溫柔既女性語氣吐出一字一句。
男同學都一款非常羡慕既模樣,而女同學或一臉「輸曬」或一臉妒忌;包括阿怡,佢仲要係睇落最兇狠既一個。
死啦﹗我連女神都激嬲埋…如果他朝我變得返男仔我咪完全無機會﹖
「咁你地幫我好好照顧住樂樂先啦,佢有d唔舒服啊。」講到唔舒服呢幾隻字,師兄笑意更濃;然後就轉身返去同肥輝阿康打波。
而肥輝阿康由始至終都無行過埋黎。
要我一個人點應付成班人啊﹖
我惶恐不安咁將個焦點移黎移去,一時望下阿康佢地打波 — 阿康又亞太區有一天成為亞太區低左;一時偷望下女神阿怡—佢正異常哀怨咁啤住我。
就係我不安地望向阿怡第四次既時候,阿怡強忍憤怒;一臉獰笑地帶同佢班姐妹團行埋黎我身邊,伸起
隻左手:「我叫吳家怡,多多指教﹗」眼神充滿敵意。
原來女神可以咁惡架﹗仲有佢身邊既姐妹團,平時最多係俾佢地無視姐;而家直頭係黎挑機咁。
「啊…我叫樂…樂啊。」我口震震地重複返頭先果句,再舉起隻左手同女神握握手。
第一次掂到女神隻手,絲毫興奮都無。
「全名。」女神捉住我隻手冷酷地說。
「陳…陳…陳津…樂。」女神應該feel到我震過貓王。
女神臉上展現出些微勝利既微笑:「點解叫親陳乜樂既都咁黑人憎既﹖」
當下腦海一片空白;原來女神一直以黎都咁睇我既…
「…」慢慢地縮返隻手,眼神唔敢再接觸女神;小毒向左走向右走既自卑感充滿曬成身。
「你同阿亭識左幾耐﹖」女神盤問。
「吓…﹖一…一日…」俾佢chok兩chok,小毒向左走向右走本質既我就咩都講曬出黎。
「一日﹗﹖」女神激動地,兩個籃球場既人都聽到佢把聲
呢一叫,令全場人都望曬黎呢邊;包括白粉師兄。
女神難以置信,滿臉憤怒;但亦收斂左語氣:「你係話你識左阿亭一日就做左佢女朋友﹖」
「啊…」我無啊女神…
白粉師兄覺得勢色唔對,即刻跑返過黎;但仍然一副笑容:「你地做乜玩得咁開心啊﹖我企咁遠都聽到
啊。」順手搭住我膊頭。
女神更顯得一副怒火中燒。
我默默地企係度,望住地下。
呢一刻白粉師兄點對我都唔重要,最重要係女神傷透我既心。
「李汝亭﹗我同你由細識到大﹗竟然…竟然輸俾個識左一日既人﹖」女神激動地說。
「樂樂意思係我用左一日時間佢先肯應承我。」白粉師兄淡淡地笑。
你地鐘意點就點啦。
「唔通…你真係從來無鐘意過我﹖」女神歇斯底里。
「無。」白粉師兄收起笑容;一臉淡然。
女神聽到呢句後,合埋雙眼;透左啖大氣:「咁係你心目中,我算係d咩﹖」
「我當你係我細妹。」白粉師兄依舊淡然。
又多一個傷心既人轉身離開。。
連一班姐妹團都跟埋離去,臨走前仲留低左好多「口習」;靜低班普通樣既女仔。
係場邊既男同學對白粉師兄咁灑脫地拒絕一個神級既女仔均表示側目及暴殄天物。
其他場既學生都對此竊竊私語。
白粉師兄繼續搭住我膊頭,將頭埋向我塊面深呼吸左一下;然後仲錫左我塊面一啖。
呢種咁核突既感覺令我成個醒曬﹗
我睜大對眼向上怒視白粉師兄,好明顯佢已經習以為常;睇落仲有d享受。
條友真係好鬼變態﹗
佢抬返起頭,輕輕拍左我膊頭一下;又再轉身返去打波。
淨返低我面對眾人既目光。
點解你可以咁唔負責任架﹖自己勾起一連串風波又走左去;仲打波打得咁開心。連阿康都面黑黑啦﹗
過左陣,球場又回復原狀;打波既打波,望女既望女;被人望既被人望。
我仲企係原地唔知點算好,應唔應該返屋企呢﹖
女神對我感覺昇華到憎恨;不過原來佢以前都係咁討厭我…
我呢個小毒向左走向右走生存係世界上,唔係俾人無視就係俾人憎恨;
就係眼淚就黎奪眶而出既時候,我強忍淚水;靜靜地行去一張比較遠既凳坐。我要搞清楚d野﹗而且我唔 甘心俾白粉師兄當玩物﹗我要同佢講清楚﹗
呆等左唔知幾耐,望住肥輝同阿康不停地俾白粉師兄sm;阿康唔知跌過幾多次,肥輝都唔知俾人兜過幾多鑊。
再打左陣,白粉師兄就換走左肥輝同阿康;逐對逐對同學換入黎1vs2。
白粉師兄全無敵手,每每好輕易就拋離曬。
佢唔係咁無聊要班師弟黎自爽啊﹖
自大、淫笑、花花公子、高大、靚仔、有錢,打波叻;簡直就係佢既7宗罪﹗
睇見佢不停上籃得分就嬲。
肥輝同阿康見阿樂咬牙切齒既樣,都唔敢坐埋去。
於是乎又打左一個幾鐘到,白粉師兄每十幾分鐘就ko一對師弟;終於佢ok曬所有人。
條無聊友笑笑口地召集曬所有人,講左一大段野就解散;內容大要係班師弟實力唔夠,要努力練習云云。你隻大舊衰係到蝦細路仲好講﹗
令我失望既係肥輝同阿康靜係望左望我就一齊離開;我有好多野想同你地講啊﹗
唔通連你地都離棄我﹖我最後既朋友…
我企起身,默默地從另一條路離開球場;我想自己一個靜下。
世界真係唔公平,高大靚仔既可以玩弄一切;連女神都為佢如痴如醉。
其實我都唔係咁貪心,如果頭先果班中等囡囡有一個肯做我女朋友;我都即肯up頭。
望一望天,今日既黃昏好靚;唉…
忽然,我感覺到有d鬼鬼祟祟feel,轉身﹗一拳﹗
一拳就擊中左白粉師兄個肚。
「啊﹗」佢再次抱住個肚跌左係地下。
「抵你死。」我冷冷地回應,然後就轉身繼續向前行。
同時加重防備,因為佢好興玩從後偷襲呢招。
大約行左十幾步後,咦﹖無既﹖佢竟然轉死性唔玩呢招﹖
我又另轉身睇你搞邊科﹗
只見白粉師兄仍然抱住個肚垂下頭坐係樓梯上;唔通今次真係打痛左佢﹖
哼﹗就算係都係你究由自取﹗邊個叫你成日輕薄我啊﹗
但係頭先果拳又好似太過火喎…
理唔理佢好呢﹖
我側住身咁望住佢良久,佢都無動靜;佢唔會係痛到暈左掛﹗
「喂﹗你無事丫嗎﹗」我慌亂地跑返轉頭,當我想踎低睇下佢既時候;我發現自己又一次中招。
佢將頭舉起,兩眼發光;一手捉住我隻手然後向下拉,再抱住我。
由於一切發生得太快,我都未黎得切反應。
白粉師兄邪邪地笑,一對手抱到我實一實:「你打左我兩拳,諗住點回報我啊﹖」
「吓…﹖…係你自己攞黎架﹗」先係嚇呆,後提起勇氣。
「你唔好…亂黎啊…我…我..嗌架﹗」望住白粉師兄愈笑愈邪,我既勇氣都消失曬。
「啊﹗胡口…」
白粉師兄輕輕地托住我個頭,然後鍚落去。
呢下我連嗌唔好既權利都無埋,任我點打佢個背脊,佢都唔肯移開。
大概過左幾十秒,佢終於肯移開個嘴;用住深邃既目光望住我。
衰人﹗衰人衰人衰人﹗﹗﹗﹗﹗﹗
內心不斷地吶喊呢一句;但個口仍然緊緊閉起。眉頭緊鎖,眼神憤怒地望住佢;換來既只係輕佻既笑
容。
我終於委屈地喊了。
「我….我唔係…唔係…你既…你既玩具啊﹗點解….點解你要咁…咁對我啊﹗我唔要啊…唔要啊﹗你好乞…乞人憎啊﹗你…你…你搞到連…連阿怡…都憎埋我啊﹗衰..人﹗衰..衰人﹗…衰人﹗」。
我楚楚可憐地係白粉師兄既懷抱喊左出黎,將呢幾日既不滿盡情發洩;我討厭自己咁軟弱,但面前既呢個巨人;如果唔用呢種方法抗爭,我仲可以點做﹖
更何況我根本忍唔到。
「你…係…係...係學校都…都爭d非禮左…我啦﹗仲爭d…搞到全部人都知道我既身份﹗….你仲想點啊﹖」
白粉師兄一臉愕然,彷彿從未預計過會有咁既事情發生。
「樂樂…」識左佢兩日,第一次感覺到佢有歉意。
「仲有啊…我叫…叫阿樂啊﹗…唔好..唔好再叫我樂樂啊﹗」
「咁又唔得喎,樂樂好襯你啊﹗」一臉愕然維持左唔夠一分鐘又變返邪笑。
真係激死我﹗
聽到呢一句,原本收細既喊聲再次變返大。
白粉師兄緊緊地抱住我;貼近佢既心口,不停輕掃我既背脊。
「對唔住啊…樂樂…」
聽到呢句,我既喊聲逐漸放緩…再冷靜落黎。
我倆沉默左一陣。
「你抱夠未啊﹖」第一次係男仔面前喊得咁悽厲,丟架就唔在講啦。
「抱到你肯笑為止。」師兄維持一貫淡淡既笑容。
「你信唔信我再喊多次丫嗱﹗」逼不得已,唯有用呢招威脅佢。
「你再喊多次,我就鍚多你一次。」白粉師兄冷靜地說。
我怒視佢。
「係啦,點解你會知我既身份既﹖」愈望,就好似俾佢既眼神吸緊入去咁;都係垂返低個頭啦。
「哈哈﹗」,「陳俊樂,陳津樂,陳俊樂,陳津樂,陳俊樂,陳津樂…」
「我鑽研左張班list成晚都搵唔到你」,「突然醒起仲有肥輝同阿康。」
「如果你地係組員既話,咁一定會係埋一齊;於是我就趁小息觀察下你。」
「原本諗住上課室搵你,點知你咁自動落操場搵我。」
「你粒喉核呢﹖」白粉師兄十分得意。
百密一疏…唔知有幾多人都因為粒喉核而對我起疑心呢﹖
仲有個名累事…早知就改個差十萬九千里架啦…
「仲有對你既感覺…同你身上果陣香味…」語氣十分想入非非。
香味﹖聞下自己,又好似真係多陣味喎。
忽然醒覺又俾佢調戲,「你﹗」我怒喊一聲。
後來知道係於是無補,而且有咁大條把柄係佢手:「你…你唔會爆我嫁可﹖」十分低聲下氣。
「咁就要睇你表現啦。」主導權又再落係白粉師兄手上。
「吓…我…求下你唔好啦﹗我真係好驚俾人識穿啊﹗」又一次楚楚可憐相。
白粉師兄望住懷中既可愛師妹,不免有d心軟。
我從來未見過有女仔好似佢咁。
「你岩岩問完問題,而家到我問啦。」師兄迴避問題。
「…」
「點解你要扮男仔﹖」忽然一臉嚴肅。
咩扮男仔啊﹖我根本就係男仔﹗係心靈上…
如果咁講實死緊架喎;咪俾個機會佢黎多次﹖
我要點答好呢…
「…」
正苦惱沉思緊既時候,白粉師兄笑左聲:「算啦,我唔逼你啦;等你想講再話我知啦。」
咁就以後都唔好提啦﹗
掙扎企返起身,白粉師兄都無再留難我。
「今日既事…你唔好講出去喎…」簡直係同魔鬼做交易。
「我唔會洩露你既身份。」白粉師兄正色道。
「我係話﹗我係話…你對我做過既野啊﹗」呢樣先係重點
白粉師兄又古惑地笑一笑:「你覺得我會同邊個講啊﹖」
「唔知你啦…總之就唔準講﹗包括我喊…」d咁羞家既野係不能外傳既。
白粉師兄不置可否地又笑左笑。
「唔準笑啊﹗你知唔知你笑果陣好乞人憎啊﹗」我不滿道。
當佢又想向前拉我隻手既時候,我敏捷地向後閃左閃:「唔好再亂黎啊大舊衰﹗」。
「大舊衰﹖」白粉師兄笑意更濃,瞇起一隻眼望住我。
「你生得咁大舊又蝦蝦霸霸,仲唔係大舊衰啊﹖」
白粉師兄一副你曵曵啦既樣,望到我心都寒埋。
「你估我捉唔捉到你丫嗱﹖」白粉師兄突然企起身。
「你…你唔好亂黎啊﹗」我驚慌地向後退左幾步。
一場追逐戰就咁開始左。
琴日既追逐,我理所當然地輸左。
大概追左分幾鐘,我就俾佢捉住左。
有次仲俾佢捉住用機王GALAXY 唔知第幾代影左幅相被強行抱住既相。
真係可怒也﹗我奮起還擊一拳,佢好輕易就閃開左;仲反過黎捉返住我。
睇黎我要上下欖球興趣班學下點避d大隻佬。
不過我係幾有天份既,都有幾次成功掙扎逃脫。
我知係咁光榮既反抗行動中,旁人可能會覺得我同緊佢打情罵俏;但事實係我正奮勇對抗暴政。
有一件必須留意既事,我覺得自己愈來愈女性化;再咁落去真係玩完。
我感覺自己男性既心靈正一步一步咁跌緊入沼澤,再無人伸隻手拉返我上黎就係咁先;而我好清楚只有我可以拯救到自己。
所以訂下第一步既計劃,就係盡量迴避疏遠大舊衰師兄。
因為每次同佢一齊都總有事會激發我女性既一面。
昨日追追下,係我既一次嚴正抗議表視強烈憤慨後;白粉師兄終於收左手,氣都唔喘一下咁望住我喘氣。我扶住欄杆,扯曬蝦咁望住佢;佢慢慢行過黎,鍚落我塊面,再係我耳邊細細聲講:「你面紅紅咁幾cute丫。」激到我氣都爭d透唔到。
透順條氣後,我就無視佢既嘲笑;轉身搭車返屋企。
白粉師兄當然係死跟啦,任我點趕佢都唔走;面皮厚到同我一齊排隊。
奇就奇在排緊隊d師奶啊學生妹啊ol啊都一副遇到心上人既樣望住佢,佢有無咁大吸引力啊﹖
不過好彩,佢無跟埋我上車;只係挨係欄杆度同我講byebye。
無賴仲要扮有型,真係好樣衰囉唔該。
於是我係樓下商場整理下儀容就上返屋企。
阿媽依然唔發覺我既變化,我亦依然壓低聲線同佢溝通。
食完飯我就入返房,等阿媽訓左覺我先夠膽出黎沖涼。
由於琴日無去肥輝屋企洗bra,又因為同白粉師兄追逐左咁耐;今日戴緊既已經好痴立立;所以我唯有冒
險係屋企洗乾淨,然後放去後樓梯吹乾。
希望唔會有變態佬或者無聊人玩啦﹗
如是者我今朝再次7點幾起身,然後雞咁腳去後樓梯拎返個胸圍;衝返入房再著上身。
途中阿媽仲問我出去做咩,嚇到我口震震咁話出去吸收下早晨既清新空氣;還好我仲記得變聲。
阿媽講左句我呢幾日都神神秘秘唔知搞緊乜就返番入房訓覺,對我黎講已經係一個沉重既警號。
跟住我就入廁所整理儀容就去返學,一如以往都平淡如水咁到達學校;但我知道,返到學校先係戰鬥既開始﹗
我認為白粉師兄一定會係班房外游走,所以我專登係打曬鐘先返課室。
因為佢一定會無所不用其極地挑釁我﹗
你要頂住啊陳俊樂﹗
所以我而家就坐緊係班房,等待小息鐘聲既來臨。
當小息鐘聲響起時,係再見陳老師既音調中我已急不及待咁離開課室。
肥輝拉埋阿康想套料既時候,我覺得自己好型咁講左句:「入廁所先講。」
「入廁所..﹖」肥輝表情誇張,「男廁定女廁啊…﹖」。
我啤左佢一眼就帶頭行左去 — 去左最頂樓既男廁。
因為最頂樓人煙稀少,甚少人咁好耐力行上黎;所以就成為傾密計既最好地方。
果然,呢度人影都無一個。
「喂阿樂﹗琴日發生左咩事啊﹗做咩阿怡咁大反應既﹗」
「係囉阿…樂,點解琴日師兄會…會話你係佢女…女朋友既﹖」相比起肥輝既大方,阿康顯得極不自然,仲好吞吞吐吐。
「因為佢想利用我黎飛女囉﹗」我係咁認為的。
「你知d花花公子架啦,玩完一個就一個;而家甩唔到身啦就搵我黎過橋﹗」
「樂樂﹗阿…樂…你…你唔好上當啊﹗」阿康怯懦地說。
「上當﹖上咩當啊﹖」一時間俾阿康搞到一頭霧水。
等搞清楚阿康既意思後,我面上一紅;再轉為不滿:「你咩意思啊﹗」
由於阿康同肥輝都知道我既身份,所以我唔再扮聲同佢地溝通。
「啊…啊…你…要識保護自…自己啊。」講到最尾差D就聽唔到佢講緊咩。
保護自己﹖我緊係識啦﹗唔係點會同你兩條友喱入廁所啊。
「咁樣你咪激嬲左女神囉。」肥輝冷靜道。
咁又有咩辦法…原來佢一直都唔鐘意我…
「係啦…阿怡…女神今日無返學喎。」我扯開話題。
「係啊…可能你…師兄傷得佢太深啦。」肥輝略帶憂愁。
我連hello都未同佢講過就令佢咁討厭我…真係唔抵啊…
「仲有啊…琴日點解你地唔行過黎啊﹖」如果你地肯行埋黎就唔會發生後續既事啦﹗
「係師兄叫我地唔好過去架…佢話咁做你好容易俾人識穿喎。」肥輝一臉老實。
即係打完劫仲要叫我小心看管財物啦喎。
呢個無聊人,如果唔係佢都唔會搞出咁多事。
沉思一會:「我已經決定左,從今日開始要盡力避開佢;以避免一切可能發生既災難﹗所以肥輝,我既幫忙到此為止啦。」
出奇地,肥輝無特別反應;反而面露擔憂:「其實我同阿康都覺得…會唔會師兄…真係鐘意左你啊﹖」
我好似傅穎講完粗口咁打左個冷震。
「唔會既…佢都係口痕友黎架啦…得閒撩下女仔姐…」。
雖然口講唔會,但觀乎佢對我做既所作所為;會唔會over左呢﹖
定還是佢有另外既圖謀﹖將心比己,如果角色調換;我去親近一個靚女,會想得到d咩呢﹖
上床﹗腦海好自然地浮現呢兩隻字。
臉上又情不自禁地流露溫熱;佢唔係真係想黎下嗎﹖
如果佢真係對我有不軌企圖,我唔夠佢打架喎…從前都唔覺男仔係咁危險。
我對面前既阿康同肥輝,突然有d卻步…
突然覺得同阿康同肥輝單獨相處係好危險既事;雖然我知道佢地應該仲係真誠咁對待我,但難保有朝一日佢地突然精蟲上腦…
「啊…我地都係傾住咁多先啦;搵日再講過啦。」未講完就急急腳走人。
「樂…阿樂﹗你一定要保護自己啊﹗」阿康係我開門前果一刻大叫。
阿康既關心令我感到有d慚愧,我而家正正係將佢地當賊辦…
但對於目前黎講,呢種戒心又非常之有必要。
我既內心愈來愈矛盾。
係忍痛離開我十幾年既好朋友後,我不安地尋找下一個躲避既場所;經我既觀察,大舊衰師兄唔係打緊籃球。上廁所前冒險閃過佢既班房,佢亦唔係到;即係話,佢好有可能係一路喱係暗角位溝女,一路恃機出撃。
今日大家對我既眼光都好唔對路,個個見到我都好似見到怪物咁四散讓開;尤其係男學生。
開頭我都有諗過會唔會係秘密已穿﹖但諗諗下,如果係既話;咁應該係男學生親近我先岩架…
究竟發生咩事呢﹖
終於,我係經過四年級既班房;由兩個幾好身材既女同學口中知道原因:「喂﹗你知唔知啊﹗琴日阿亭師兄 捉左隔離班個毒男入更衣室唔知做咩啊﹗聽人講呢,捉入去之前佢地仲好瞹昧添啊﹗」
「係咩﹖唔係掛﹗我見師兄成日都同高年級d靚女姐姐一齊架喎﹗吳家怡都成日同佢一齊架﹗佢點會係gay啊﹗「
「你知咩丫﹗呢d叫扮豬食老虎﹗gay先融入到做姐妹團丫嘛﹗唔怪得佢操到咁大隻啦﹗原來佢係gay既﹗等我仲
有少少鐘意左佢添…其實佢咁高大靚仔,駛乜搞gay啊,一定係受過情傷先係咁…」
有咩慘得過食屎﹖係俾人當係gay佬…
難怪乎今日連女同學都帶有敵意咁望住我,原來係夢中情人俾我「搶」左。
真係想仰天長嘯一句Hi Auntie﹗你咁對我都算啦﹗點解仲要斷我米路啊﹗
正係呢個時候,果兩個女仔發現左我;又聚埋一齊細聲講,不停對我指手劃腳;我唯有dup低頭面懵懵地行過…
係餘下既小息時間裡面,我每隔幾分鐘就轉一次地方;終於係有驚無險地完左小息。
返課室都係不能夠怠慢,點知佢會唔會係課室僕我架﹗
於是我好似特種部隊咁行兩步縮一縮探頭望一望,行兩步縮一縮探頭望一望;又安全地達陣。
時間亦掌握得十分好,入去無耐阿sir就入左黎;只係不論男或女對我既眼神都怪怪地姐…
又再一次係課室上發白日夢,夢裡面我變返男仔,英勇地追求阿善;最後成功地奪取芳心。
呢種夢係咁多年黎,幾乎每遇見一次靚女就會發一次或以上;只係估唔到會有夢斷既一日姐…
口口聲聲話要變返男仔,但要點變呢﹖仍然係毫無頭緒。
係唔係要返海傍怒Hi上帝一次呢﹖
又或者要俾班mk打多甘既呢﹖
腦海裡愈來愈多思索湧現;慢慢地,我都分唔清楚阿sir講緊李樂詩,定係jessica c…