[魔法/武俠]《窮撚被女飛 之 鳩闖魔法世界》: 第十二章 - IQ博士如果識用魔法，佢一定勁過哈利波特同甘道夫
這時候師爺陪著一個紅光滿面的老人到來，那老人呵呵笑道﹕「兩位你好！我就是同貴錢莊的負責人，敝姓司徒。」
楊兄回復冷冷的聲線﹕「我家少爺聽聞司徒老闆你係中州數一數二的大商家，專登嚟傾吓有無合作機會，因為我哋都想喺中州大展拳腳。」
司徒老闆露出疑惑的神色﹕「敢問閣下是......」
「我家少爺姓陳，家族一直喺北方，喺田氏掌管嘅城池下有唔少嘅妓院、賭場同礦場，生意算係咁啦。只係一直受困喺北方，想做大啲都唔得，所以想喺南方搵吓有無機會啫。」
師爺在司徒耳邊細語，看來是告訴他北方陳氏的底細。
司徒老闆呵呵笑道﹕「原來是北方陳家，公子你是陳贈陳老闆的子姪嗎? 」
楊兄答道﹕「少爺係我家老爺嘅三公子。」
此時師爺插口道﹕「小的聽聞陳氏三公子一直惡病纏身，只是三公子他現在......」
楊兄道﹕「師爺果然神通廣大，上幾個月老爺遇到個江湖奇人，跟住就帶咗佢去睇吓三少爺，個奇人開咗道藥方再配合五行術，用咗十日就醫返好三少爺。」
我向司徒老闆抱拳道﹕「晚輩我久病卧床多年，啱啱好返就可以見到中州司徒老闆，真係...真係三生有幸......請呀司徒老闆你唔好見怪，我太耐無見過其他人，禮數嘅嘢唔係好識。」
司徒老闆跟師爺面面相覷，似還是懷疑我的身份。
楊兄見狀將大包袱和錦盒奉上，道﹕「司徒老闆，呢啲係我家老爺托三少爺送比你嘅見面禮，還請多多關照。」
司徒老闆嘴裏邊說「陳老爺太客氣了！」「這怎麼敢當！」這些廢話，一邊給師爺打眼色。
師爺接過後偷偷掀起包袱讓司徒老闆瞄了一眼，只見司徒老闆兩眼發光，楊兄接著道﹕「盒裏面嘅係寒玉山千年野生人參，已成人形，唔係咩貴重嘢，老爺話當係土產送比司徒老闆你補吓氣。」
司徒老闆打開錦盒一看，撫鬚呵呵笑道﹕「陳老爺真是的，看來我要親身道謝才合禮數。來，三公子你想怎樣跟我合作? 不是我說大話，中州這裏誰不給我司徒秦一點面子。」
正所謂禮多人不怪，雞脾打人牙骹軟，看來用錢撻人這招在任何地方都適用。
我作狀的輕撥一下扇子，道﹕「是咁的，司徒老闆你就知我屋企做咩生意㗎啦，呢排喺北方嘅賭場生意都唔錯，所以就諗住睇吓中州有無得做囉，咁賭場就一定連帶當舖錢莊，所以第一個就諗起司徒老闆你喇。」
司徒老闆笑道﹕「承蒙你們看得起，錢莊這門生意我在中州確是數一數二。這個簡單，過兩天我跟四位城主打個招呼，只要準時納稅，利字當頭他們無不允許的。然後我帶三公子你去選地建賭場，鐵定能賺個盆滿缽滿！」
我「嗖」的一聲收起扇子，拍掌喜道﹕「咁就最好喇！係呢司徒老闆，唔知你又有無興趣嚟北方開錢莊呢? 我哋嗰邊啲錢莊當舖規模又細，又唔係連鎖店老字號，搞到我哋賭場生意都發圍唔到囉。」
司徒老闆喜道﹕「真的嗎? 其實我也想將生意擴展到外面，只是一直苦無門路，現在有三公子你幫忙的話實在太好了！」
我微笑道﹕「呢個簡單啦。不過而家我仲有少少事，想司徒老闆你幫幫手嘅......」
「三公子旦說無妨，我司徒秦辦得到的決幫你辦好！」
「有司徒老闆呢句說話我就放心啦。是咁的，呢排生意多咗，我哋妓院呀，礦場啲人手唔係好夠，所以呢，就想同司徒老闆你買吓人啫。」
講咗咁耐，終於都入正題，其實我同楊兄入嚟就係想問佢販賣人口嘅嘢，因為楊兄覺得呀牛佢兩個係比佢捉住咗當豬仔咁賣。
司徒秦臉色微變，但瞬間又回復平靜﹕「哈！三公子你真會說笑！我哪有甚麽人可以賣給你呢！」
我哈哈大笑﹕「司徒老闆你真見外，唔通仲當我係外人? 其實就咁，我只係想司徒老闆你幫幫手搭吓路，睇吓可唔可以幫我搵到啲『工人』做嘢啫，我講嘅『買人』都只係呢個意思。咁當然啦，佣金方面我唔會虧待司徒老闆你嘅。」
司徒秦眼內精光一閃﹕「嗯，既然三公子這樣說，我即管幫你找找看，不過這件事我也只能作個『中間人』，希望三公子你明白。」
「當然當然！我唔會要司徒老闆你難做嘅，我都係想解決件事啫。」
司徒秦呵呵大笑﹕「三公子果真是明白事理，那我馬上準備一下見城主的事宜。」他站起來，又道﹕「請問三公子現在在那裏落腳，要到寒舍屈就幾天嗎? 雖說我在這裏沒權沒勢，但房間還是比外面的客棧舒適一點兒。」
我抱拳笑道﹕「講笑咩司徒老闆，你呢度都金碧輝煌，屋企仲得了嘅? 其實我都好想去你度見識吓，不過我喺中仁城有有幾件事要做，我就唔打攪司徒老闆你喇。我而家喺悅雲客棧落腳，你有咩消息派個人嚟通知我就得。」
「呵呵！那老夫就不勉強三公子了。剛才談妥的事老夫定會辦好，等我好消息吧。」
「有司徒老闆你呢句我就放心喇。咁我哋都唔打攪你啦，走先。」
司徒秦跟師爺送別我們到錢莊外，我們就抱拳跟他們道別。
道別過後，我跟楊兄轉了個彎，來到了一個轉角。
楊兄輕聲道﹕「你點睇? 」
「嗯......呢啲睇戲都睇得多，表面係正當商人，內裏就專做陰騭嘢，就好似王敏德咁。」
「王敏德? 」
「竊聽風雲個王敏德呀。」
「無睇過，不過你講開竊聽，我今晚會去夜探吓，睇吓搵唔搵到啲咩線索。」
依咦? 月黑風高殺蟲夜，黑旋風忍者為民除害?
「做黑衣人呢家嘢我有興趣喎，今晚帶埋我去得唔得? 」
楊兄睥睨著我﹕「你呀? 你又唔識輕功，我驚你拖累我喎。」
「超！你好叻咩！你都係靠魔法咋嘛，趁而家得閒快啲教我啦！」
我拉著楊兄回到客棧要他馬上教我魔法。
「魔法駛唔駛要廿五歲先學得? 」
「點解要廿五歲? 」
「無，之前睇過一個爛尾故，話廿五歲先做到魔法師，多口問吓啫。」
「唔駛......」他頓了頓，道﹕「魔法呢，望落好似同五行術有啲似，但其實係兩回事。五行術講求嘅係吸收大自然力量，再用精神力控制。而魔法就係利用自身魔力，再加上用自身幻想力創造，然後咏唱咒語以魔力發動，再用精神力控制。」
我搲哂頭，要靠創作力量同幻想，會嚇你一跳?
仲有，魔力又係咩一回事? 藍色MP棒?
我首先問了魔力的問題。
「魔力係潛藏喺每個人身體裏面嘅能量，運用得越多，你嘅魔力上限亦會越強大。佢類似五行術裏面吸收到嘅元素力量，即係決定你魔法強弱嘅要素。越強嘅魔法就要更多魔力先可以發動。但你發動魔法當然會耗用魔力，當用哂就發動唔到魔法，要休息先可以回復。」
「同平時打機嘅設定差唔多啦，咁用自身幻想力創造又係咩? 」
「For example，呢個係風系最basic嘅魔法。」接著他唸了一個音，我就感到一陣微風吹來。
「用幻想力嘅意思，就係用你個腦幻想。」他指了指腦袋。
然後，我就感到風突然從身後吹來，下一秒又改從我頭頂吹來，再下一秒就從我腳底吹來，最後風從四面八方吹來，直把我吹得呼吸困難。
頃刻，風戛然而止，四周回復平靜，但桌子上的茶杯「波」的一聲被切開兩半。
「我咏唱咒語發動風，然後用精神力控制風吹向唔同方向，最後用幻想力將風元素集中形成風刃切開隻杯。不過其實風刃術係可以直接咏唱形成。」
「咁魔法咪好易學? 咁點解中土好似無人識魔法咁嘅? 」我已經默默記住那個簡單音節的咒語。
「我都唔明，中土啲人好似無魔力所以用唔到魔法，不過我同你把過脈，你同我一樣都可以用到，只係魔力唔夠西方人強啫，呢個只要練多啲就ok。」
咁都好啲，起碼可以練強，好似五行術咁就真係可以食屎。
「但魔法真係易用過五行術好多喎。」這時候我咏唱之後一邊令房內風聲大作，一邊說話。
「不過我個人認為五行術係勁過魔法。」
「Why? 」
這時候房內的風戛然而止，楊兄道﹕「我啱啱用精神力控制住啲風元素，所以風就停咗。」
「呢個就係其中一個原因，你用魔法嘅同時人哋都可以用魔法干擾同破解。但相對上五行術，除非你影響到施術者，否則係無法破解。」
「另一個原因係高級魔法啲咒語又長又臭，好鬼難記，相反高級五行術只要結手印同有足夠嘅元素力量同精神力就用得。」
「手印......呃...單手都結到? 」這件事其實不想問，但我還是問了。
楊兄淡然一笑﹕「當然大部份手印係要用雙手，但有啲手印都只係用單手嘅。」
哦，原來如此。
「咁你意思只係覺得五行術實用過魔法啫。咁如果我唸到高級魔法嘅咒語，我咪好勁? 會唔會勁到可以召喚隕石或者可以一個人挑起成隊軍隊? 」
「你點解會咁諗㗎? 」
「無，我睇過另一個魔法故事講到裏面啲角色勁到識飛，又可以召喚隕石，成隊軍隊都唔夠佢揪啫。重點係，個主角勁多女鍾意，有成隊後宮，連索到啪啪聲嘅公主都幫佢含。」
楊兄翻了翻白眼﹕「你究竟睇咩故呀? 你估係龍珠咩? 又識飛又打到成個地球裂開，好心你就睇少啲啦，壞腦呀。」他又道﹕「就算你可以背到啲咒文，以你而家嘅level都唔夠魔力發動，而且實戰時你話人哋會唔會比時間你背書? 」
「咁又係......」
說到這裏我突然突破盲腸，想起一件對我們極之不利的事。
「你講到五行術勁過魔法，但我哋五行脈咁弱，咁咪食得屎? 」
五行術的強度，除了因為精神力外，還因為吸收到的元素量多寡決定，以我和楊兄一樣的資質，注定要輸在起跑線。
楊兄無奈一笑﹕「的確係，我練咗十年都唔可以喺實戰用到高級五行術。雖然我可以釋放到足夠份量嘅元素，但花嘅時間太長，搞得嚟都比人打死咗。」
「不過我哋又唔駛食屎嘅，其實你練好低級五行術，剩係元素球都夠你出嚟行。」
接著，他就教了我吸收元素後，在體內壓縮的方法。原來先將元素力量壓縮才釋放，雖然體積會更小，但力量卻會大得多，而且所需時間也差不多。