[魔法/武俠]《窮撚被女飛 之 鳩闖魔法世界》: 第十一章 - 原來大俠，真係唔駛做就有錢駛
跟楊兄離開客棧，朝同貴錢莊的方向走去，沿途順道向他請教武學。
「其實我輕功麻麻，我之前用嘅係風系魔法。」楊兄說完臉上毫無愧色。
說好的凌波微步呢?
「咁內功呢? 你唔係又係坤鳩我呀? 」
「哈！內功係真嘅，不過我啲內功唔係咩名牌內功喎。你唔好見我擋到赤丹子嗰招好似好勁，其實我暗啞底用咗內功加魔法再加五行術先擋到。」
其實可以輕描淡寫咁擋住赤丹子都好勁啦！
「我理得你，你話教我㗎。仲有降龍十八掌呢? 獨孤九劍呢? 呢啲唔係又無呀? 」
他搖搖頭﹕「你真係睇金庸睇上腦，呢啲絕學邊有咁易學到，有無我都唔知。不過我都識一套劍法嘅，你想學就教你啦。」
我瞄一瞄他背上包著的長劍，看來他的劍法就算不是獨孤九劍之流，應該也不會差到那裏去吧。
「係呢，我見你都識五行術，而且都用得唔錯呀。」
「唓！你睇吓，得指甲咁大，有Q用咩！」我伸出手，凝聚了一個指頭大的水球在掌心上。
「咦? ......你比我把吓脈。」他伸出兩指搭在我的脈門上。
一會兒後，他道﹕「睇嚟你嘅情況同我都一樣，我啱啱學五行術時，都係好係似你咁，凝聚出嚟嘅元素球都係咁細。」接著他手一翻，一個水球就出現在掌心上，大小只比乒乓球大一點。
「我練咗十年都係得咁大，可能係因為我嘅五行脈太弱。」
唔係呀? 練咗十年都係得咁大咋? 噚晚嗰個咩張公子一出手就係網球嘥屎囉喎......
「咁你個樣又駛咁灰，你應該都可以學哂所有五行術㗎。」
我集中精神，雙手各自出現了一顆火球和土球，然後道﹕「係就係，但咁細有咩用? 」
「嘿！無用? 赤丹子都係咁樣比我擋住。仲有，魔法其實好易學，我諗你應該都無問題。」
咦? 咁講又唔同喎！可以練到楊兄咁，雖然未必天下無敵後宮三千，但可以納入高手之列再坐擁十零個後宮都應該得啩......
咩話? 話我掛住後宮唔理老豆老母不孝? 咁楊兄都係話有啲頭緒啫，萬一返唔到去點先? 咁做定高手溝定女都唔係好過份啫，是咪?
本來我還想他馬上教我魔法，但原來我們已經來到了同貴錢莊。
「噢，原來到喇。」我就這樣走進去。
楊兄拉住了我，道﹕「等等，你朋友係喺呢度落腳? 」
「係呀，老伯話錢莊老闆係舊相識，所以叫呀牛佢哋嚟呢度呀。」
「呢個老闆...有啲問題，你之前有無見過佢? 」
「無呀。我噚晚嚟到個伙計話佢唔喺度，我今日都係撞吓手神咋。」
楊兄由上至下掃視了我一眼，道﹕「我哋去買啲嘢先嚟過。」然後他就拉走了我。
我們到了中仁城的商業區，那裏人頭湧湧，叫賣聲此起彼落，比維園年宵還熱鬧。
這時候楊兄給了我一個人皮面具，自己也戴上了另外一個。
「呢個係西方巧匠做嘅面具，戴起佢等佢哋認唔出你真面目啦。」
戴上面具後，楊兄領著我走進一間賣衣服的，才十多分鐘，我就搖身一變變成了一個玉樹臨風，英俊瀟灑，風度翩翩的貴公子(ok，我認我係自大咗啲，咁改做酒色過度嘅紈絝子弟咁得未? )，而楊兄也換走了一身粗布麻衣，改穿了武士服，面上鬚髯如戟，盡顯得威武不凡。
然後我們來到了商業區旁的一間大宅。
楊兄道﹕「你等我一陣。」他走進大宅內，不到五分鐘就走出來了，手上多了一大一小兩個包袱，還有一個錦盒。
然後我們再次回到同貴錢莊。
在路上，楊兄已經跟我解釋了一遍。原來同貴錢莊表面上是做錢莊生意，內裏卻是幹販賣人口的勾當，而且他知道錢莊老闆愛財如命，絕對不是可靠的人。所以他聽我說老伯是錢莊老闆舊相識，呀牛他們又來了投靠他，馬上心存疑慮。
「ok，你而家嘅身份係一個二世祖，我係你隨從兼保鑣。好，而家可以入去。」
我按楊兄所說的扮演著一位二世祖，手一揚「颯」的一聲張開了摺扇，然後大模斯樣的走進店內。
昨晚見過的伙計馬上哈巴狗一樣上前招呼我﹕「公子公子，你好，歡迎光臨本店！」
你條茂利，啲服務態度同噚晚差咁遠嘅? 駛唔駛搵劉華嚟教教你點做sell屎呀?
我抬起頭，用鼻窿向著他噴了一口氣﹕「哼！」
楊兄以毫無感情的聲線道﹕「憑你都配同我家公子講嘢咩? 我家公子係嚟搵你老闆傾生意嘅。」說罷手一揚又是「篤」的一聲，一條小金條就插在櫃枱上，道﹕「打賞比你嘅，快啲叫你老闆出嚟！」
伙計雙眼發光，連忙點頭哈腰﹕「是是是！小的馬上去！」說完就想拔走金條，但金條已經入木三分根本動不了。
楊兄手拍桌面，金條應聲脫離桌面，伙計驟不及防連人帶金的向後滾了幾轉，灰頭土臉爬起後馬上將金條往懷裏一塞，又陪著笑的往內堂走去。
我輕聲道﹕「喂，你頭先嗰吓堅型喎！係咪要練咗內功先做到㗎? 」
他輕聲回應﹕「小心，有人嚟啦。」
這時候另一個身穿師爺衣服的中年男人走出來，向我們道﹕「未知兩位大爺想找我家老爺談甚麼生意呢? 」
這位師爺老成持重，比起剛才那伙計看起來可靠多了。
楊兄將手上的小包袱丟在櫃枱上，裏面的小金條丟了一桌子，直把這個老成持重的師爺看得兩眼突出。
楊兄道﹕「我家少爺聽聞貴寶號係中州第一錢莊，所以帶咗一小筆資金過嚟，諗住睇吓點同你老闆做大盤生意佢啫。」
師爺馬上道﹕「是是是！請兩位先跟我到內堂稍事休息，小的馬上通知我家老爺！」
師爺領著我們到了一內堂雅室，然後說聲失陪就馬上告退，在他離去之前，楊兄又打賞了一條金條給他，直樂得他呵呵笑。
我趁著沒有人，跟楊兄耳語﹕「喂，你都好闊佬喎，你挖到個金鑛呀? 」其實我剛才見到包袱裏滿是金條，也差不多嚇得露出馬腳。
「哈！武俠小說裏面啲大俠都係唔駛做大把錢㗎啦，我都係學佢哋啫。」
「你頭先去個有錢佬屋企打劫? 」我想起那個小包袱是剛才他走進大宅後才有的。
「咁你就錯喇，我救過嗰個有錢佬一命，我頭先去問佢借幾兩駛駛啫，我會還嘅。」
「還? 」大俠都會還錢? 我唔信囉！
「幫我還錢條水魚嚟啦。」他給了我一個眼色。