[新手][校園] 當你中六果年先遇到教畜，最好嘅解決辦法就係‧‧‧‧‧‧: 1. 會唔會係咁呀？
「楊世文！」唉，終於叫到我個名喇，係時候要出去受死。
「係！」我用龜一樣嘅速度行出去，希望可以有咁遲得咁遲去知道個結果。最後，30秒可以行完嘅路程我用咗35秒先行完。古語有云︰「醜婦終需見家翁。」，雖然好似唔多關事，但係要嚟就嚟喇！Come On！
死教畜一邊遞份成績單比我，一樣露出一個好奸狡嘅笑容。「都話咗你咖喇，有句說話叫朽木不可雕。」講完就放開手，掉咗張成績單落地下。
我係地下執番張成績單，但係我一直都唔夠膽睇，慢慢行番去自己個位度。
小夫︰「點呀，你考成點呀？」
我︰「唔知呀，你考成點？」我好似搭錯線咁反問番小夫。
小夫︰「我唔錯呀，4C1X total 都有成25分，應該有U收。」我基本上今年第一次見小夫笑得咁開心。
我︰「咁你哋呢？」我將目光轉咗去力仔同阿毛佢哋度。
阿毛、威廉同力仔都有廿二三分，而比利同河童就考得最好，有兩個5星星。而大口仔、聰哥、Kevin同阿風都有20分左右。
威廉︰「喂，快啲開你果份喇！」佢哋金精火眼咁望住我張成績單。
我慢慢咁將份成績單揭番去前面。
「喂快啲喇！」成班人好似睇緊跑馬咁勁興奮。三秒過後，成班人都靜晒。
中文︰U 英文︰3 數學︰1 通識︰2 經濟︰4 企業、會計及財務概論︰4 中國歷史︰2
總共係‧‧‧‧‧‧二十‧‧‧呀！唔係，係十分。
大家望到之後都唔知講咩好，淨係呆咗企係度。
「我走先喇！」喱一刻真係唔想見人。
「不如我哋去食啲嘢先喇？」威廉嘗試打破個勁尷尬嘅氣氛。
「唔洗喇！」講完之後，我就一支箭走咗出學校，上咗去對面市政大廈嘅天台。
我企係天台邊，放低咗我個「鋸9你」背囊。攞咗份成績單出嚟，
一嘢撕爛咗張成績單，好似灑溪錢咁灑出去。
跟住，連我自己都合埋眼跳埋落去。
我一睜開眼，見到自己就嚟撞落地面。「呀．．．．．．」