[新手][校園] 當你中六果年先遇到教畜，最好嘅解決辦法就係‧‧‧‧‧‧: 9. 師父，明白了！
返到停課室，我成個人頹晒咁坐咗係度。我頹，唔係因為要繼續停課，而係因為點解班老師可以人前人後一個樣，等我仲以為佢哋好like我。
「喂，做咩咁頹呀兄弟？」原來係威廉入咗黎坐低咗。
我覺得有啲驚奇點解上堂時間威廉會係度，同埋突然醒起威廉已經冇蒲頭成三個禮拜。
我︰「冇呀，啱啱俾人處決完。係喎，點解你會係度？」
威廉︰「停課囉！」
我︰「吓，做乜鬼？」
威廉︰「我之前跳舞比賽嬴咗，咁有個機會可以飛過去韓國比賽一星期。咁我咪問盧毛(校長花名)可唔可以請假去。佢唔俾，我諗住慢慢咁說服佢，點知自己越講越燥，發晒火咁。咪俾佢停咗我課囉。」
我︰「有得去韓國比賽咁好。可惜喱間學校淨係睇你個成績，冇成績就谷你番咩星期六操練班。聽講話呀，Form 6全部唔俾玩校隊呀今年。仆街，個死盧毛一有啲獎囉呢就最叻出嚟攞彩，但係又乜野錢都唔肯比。我可以肯定呀，如果你有獎捧返嚟，佢一定烚熟狗頭咁對你。」
威廉︰「都習慣成自然架喇，佢打壓體育同音樂呢兩樣都唔係第一日嘅事，夾硬谷成績整靚個數亦唔係今日先開始。喂，係喎，你都未講你搞咩？」
於是，我一五一十咁講晒今日發生啲嘢俾威廉知。
威廉︰「少年，你太年輕喇。你估班老師係真心想教書幫學生咩，佢地咪又係打份工。你話，下屬點會對老細say no至得咖。特別係S. Hung 同Maria Chan仲係Contract，佢生死係校長主宰，點會為你搞到冇咗份筍工呀。你估班老師係想真心同你打成一片咩，佢想你咁樣會乖乖聽佢話炸。講多句呀，唔好同老師講太多野，你永遠唔知佢係邊個嘅親信。」
唔係講笑，聽威廉呢番說話，你會以為佢係係商業世界打滾咗幾十年嘅世屎忽，但係其實佢只比我大一年。不過，佢已經將喱啲政治嘢聽得通通透透。
啲人話學校係社會嘅縮影。
今次。師父，徒兒真的明白了！