《只有一棵樹的森林》: 第五十七章

很快，十月尾就來到了，期考要來了。
無論我或方晴，都停止了訓練，一起躲進圖書館，一起最後衝刺。
.
十二天的考試期，我有六天需要出席。
在頭兩天考過中英文後，有一個週末休息，然後星期一就是最艱苦的一日，需要連續赴考數學和經濟兩科。
之後的一日就是通識科。
.
完成了五科的考驗，就會有一個足足一星期的假期，在最後一個星期二才考歷史，然後最後一日才考企業管理。
對於一星期的假期，怎去保持心態成為了最大考驗。
.




頭兩天的考試，由於只是語言科，所以考驗並不算大，比較輕鬆就渡過了。
原本是想週末約方晴出來一起溫書，可惜因為門禁，令她被逼留在家裹。
於是我就一心留在家裏閉關，豈料，
「呀駿，出黎溫書呀」打來的竟然是杜杜。
「兄弟，你竟然會主動約溫書？」我驚訝地問。
「無計喇，有人唔開心呀嘛…」
「下？」
「Kathy話我成日咁hea，話左我咁多次都唔聽，所以今次就嬲左我」
「原來激嬲左Kathy BB…」
「所以咪要做番啲野補救！」




「唉，咁我地兩兄弟都算係同是天涯淪落人喇…」
「方晴又嬲左你咩？」
「咁又無，不過佢有門禁啫」
「唉…」
.
結果，我倆兄弟竟然不是在籃球場相遇，而是背著書包在圖書館相見。
當我倆看到對方時，都忍不住歎氣…
.
「喂呀駿，呢度係點？」
「哦，呢個，就係咁樣…」




「嘩，一年啫，點解你可以勁左咁多？！」
「一分耕耘一分收穫，你估我暑假真係淨係訓同玩咩」
「唉…我讀左一個朝早已經覺得辛苦，都唔知你點忍到成個暑假…」
「習慣便好了，頂住呀兄弟，要氹番Kathy就睇今次」
「你放心，我今次死都會頂住！」
.
看到杜杜的堅持，就可以看出他有多愛Kathy，愛情的力量讓不愛溫習的他，竟然也坐下來努力複習。
專心一致去做一件事，確實會令人忘記時間，很快就發覺到了黃昏。
.
「杜杜，走喇，係時候番屋企喇！」
「你走先喇，我仲想留喺度溫多陣」
「仲溫？你今日溫左好耐喇，都要時間消化下，聽日再努力喇！」
「你由我喇…」
「咁如果你有唔識點算？」
「Er…」




「咁喇，你黎我屋企，食完飯再溫喇」
「咁…」
「咁咩呀，行喇！」
.
結果，我就強行把杜杜帶回家。
「爸媽，我番黎喇！」
「番黎喇，咦，杜杜黎左呀」
「係呀，杜杜今晚會喺度食飯同溫書」
「係呀，世伯伯母打擾哂喇！」
「唔打擾，一齊溫書好呀！」媽媽率先說
「老婆呀，我地好似唔夠餸，我落去買叉燒呀！」爸爸說。
「下，世伯唔使喇！」
「要嘅！過門都係客，等我一陣」
.
「杜杜，你好肚餓呀？慢慢食喇！」媽媽忍不住問




「唔係呀，伯母，我想快啲食完，快啲去溫書」杜杜答。
「你慢慢食喇！唔係等陣因快得慢！」我也插口
「得架喇，咳咳…」
「係咪呢，都話喇，抖下先喇！」
.
休息了一會兒，杜杜總算抖過氣來。
晚飯過後，我逼他休息了一會兒，陪我到樓下散步。
.
走下走下，我們走到公園。
「杜杜呀」
「唔？」
「其實你有幾愛Kathy？」
「好愛好愛，愛到其實我視佢做我終身伴侶」
「點解你咁肯定就係佢？」
「無咩點解架喎，鍾意就鍾意，愛情從來都係解釋唔到架喎！」




「咁又係…」
「咁你同方晴又點呀？」
「唉，我都唔知…其實我地無問題，只係我一直唔知點解，有種唔好嘅感覺」
「你個人就係咁，成日都要諗啲唔好嘅野！」
「今次真係唔同，突然多左個未婚夫，佢Daddy又咁想佢嫁入豪門」
「相愛嘅人，最後一定會走到最尾嘅！」
「希望喇…」
「番去喇，溫書喇」
.
Facebook：微言
Instagram：smallpotatosay
一至六每晚7點，重溫當年走過青蔥的歲月
Facebook, Instagram, 紙言, 高登共同發佈