【劇情甜】港佬狂想曲: 第三章：神秘租客篇(7)

九、攻陷女同志（上〔1〕）

　　（前文提要：神秘租客原來係大富豪個離家出走既寶貝女，仲係女同黎添。雞雄見Carol咁靚女，但係就要畀Jacky呢件男人婆霸住，認真徙料！竟然斗膽到同Jacky爭女，仲炒大鑊添。Carol夾左晌中間，都幾可憐架……）

　　原來Jacky自細就有同性戀傾向，剩係鍾意女仔，Ｄ男人埋親佢身佢就想嘔。佢老豆陳大富見個女成日同Ｄ女仔群埋一齊，開頭都不以為意，點知個女越大就越過份，後黎真係變左「蕾絲邊」添。陳大富得佢一粒女，原本仲一心一意諗住幫佢搵返個好老公，等佢可以繼承佢Ｄ生意；點知個女竟然搞到唔想嫁人，咁佢陳家咪絕後？所以咪想迫佢去外國留學，由佢晌果邊既媽咪看管囉。
　　
點知Jacky已經溝掂左Carol，仲搞到難捨難離添。陳大富嬲起上黎，一於棒打鴛鴦，唔單止唔畀Jacky返學，直頭軟禁左佢晌屋企，諗住到時就押佢上飛機。
　　
壓力越大、反抗就越大！Jacky偷偷地走左出黎，仲叫埋Carol一齊著草走佬添。好彩CarolＤ旅行證件畀媽咪Keep住，所以先走唔成咋。最後佢地決定先匿埋一頭半載，諗住慢慢迫Jacky老豆就範。反正Jacky同Carol手頭都大把錢，平時佢地兩個Ｄ零用錢加埋已經足夠佢地一、兩年既生活費。由於唔敢太張揚，所以佢地先至會揀左大角嘴呢Ｄ舊區，諗住實唔會畀人發覺；點知最後都係衰左晌雞雄呢條無聊兼八卦既麻甩佬手上。
　　




雞雄聽完佢地個古仔之後，心裡面又試十五十六。佢當然好想要果五十萬花紅啦！不過又唔想畀個壞印象Carol喎……
　　
呢次死火喇！雞雄懷疑自己可能鍾意左Carol添喎！
　　
「點呀？反悔拿？決定左要幾多未呀？」Jacky見雞雄唔出聲，又開始串佢：「睇死你係見錢開眼果Ｄ賤人黎架啦！Carol，妳咪聽佢點啦！」
　　
「有錢唔係大哂架！我一毫子都唔會要！」雞雄掘左佢一眼，把心一橫，索性扮正義扮到底：「妳放心……我唔會爆你地出黎既！」跟住又補充話：「不過我只係畀面Carol，唔係因為妳個死男人婆！」講完又眼金金咁望實Carol。
　　
Jacky一睇就知雞雄對Carol起痰，當堂又想發難：「你個死人猥瑣佬想點呀？我話你聽……你咪駛旨意溝我條女呀！」不過又畀Carol拉住左。
　　




Carol就喊哂口咁：「Jacky，你咪咁啦！雄哥都唔係咁意思！」
　　
「咪係！好人當賊扮！畀個良心你就當狗肺！」雞雄乘機落井下石：「而且就算我真係想溝Carol，你又奈得我何咩？妳以為你自己真係男人牙！你冇柄架！」
　　
畀人督正死穴，Jacky唔嬲就瓦燒，Carol禁都禁唔住！唯有琴琴青撲過黎推左雞雄出房。Jacky唔敢出黎，Carol就拉左雞雄埋一邊。
　　
雞雄見Carol仲係梨花帶雨咁，就捉實佢對手道歉：「對唔住呀！我頭先專登激Jacky架咋！因為我見佢對妳咁惡，實在睇唔過眼。」
　　
「我知道……」Carol伸手抹左Ｄ眼淚：「其實你肯同我地保守秘密，我好多謝你呀！Jacky佢平時唔係咁架，佢好溫柔架。」
　　




「係咩？我睇唔出喎！」雞雄又啤左下晌門罅度莊出黎既Jacky一眼：「咁啦，Carol，以後如果你地有Ｄ乜野需要幫手既，就搵我啦！」
　　
「真係？」Carol好開心咁望實雞雄：「我想同爹地媽咪報個平安呀……我呃佢地話同同學去宿營。依家已經過左成個星期，佢地一定會好擔心架！」
　　
「乜妳冇打電話返去咩？」
　　
「我唔敢呀！」Carol眼濕濕咁：「Jacky話佢爸爸同我爹地咁熟，一定會懷疑我跟左佢走架！話唔定仲會請私家偵探偷聽我屋企電話添，佢驚會畀人查到我地匿晌邊度喎。」
　　
「咁又係……」雞雄記得睇電視劇，Ｄ警察都可以憑住個電話就查到Ｄ疑犯既位置晌邊度。
　　
「咁妳特登去郊區打電話咪得囉！」雞雄諗到條計：「拿，直頭去離島搵間渡假屋再打電話返屋企，扮真係同第二個宿緊營囉！」
　　
Carol諗左一諗：「咁……都唔係唔得喎。」跟住就拉返雞雄入房。
　　
Jacky見Carol同雞雄返返入房，都有少少愕然。Carol就將雞雄既計劃講畀佢聽，仲話：「如果你爸爸唔再懷疑我同你晌一齊，咁你以後咪仲安全？而且我又可以返屋企，想辦法拎返本護照，到時我地咪可以遠走高飛囉！」




　　
Jacky原本死都唔同意雞雄既主意，不過聽到Carol最後果句「同佢遠走高飛」，當堂冇野講。

(如果今日本人Facebook Page 達五十讚將加更兩篇) (各位支持下我個Facebook Page la
http://www.facebook.com/%E6%B7%AB%E8%A4%BB-445645792298358 )

待續……