【驚慄】《冥婚：血紅色的裙褂》點解會係我同你？: 二十、真相
二十、真相
我個名，叫陳影紅。
一直以來，我既家族就係負責傳達山神旨意既使者。山神係幽山村一帶有好悠久既歷史，有山神既庇佑，我地條村先可以豐衣足食、安枕無憂。作為代價，我地每二十年都要奉獻一對男女畀佢。如果我地唔照做，「佢」就會好嬲，並且會將災難同黑暗帶來幽山村。
去到我呢一代，我就係肩負住呢個職責既傳人。
每次個隻山神⋯⋯唔係，佢先唔係神，至少我所相信既神唔係咁，極其量佢都係山妖。每次山妖都會透過血字通知我，佢想要邊一對男女作為祭品，然後我就負責執行儀式，親手將一對一對男女送上死刑台。
我唔想咁做，但我唔可以反抗。慢慢，我就開始麻木，睇住一對又一對唔相愛、甚至唔相識既新人完成冥婚，然後死去，就好似連我個心，都好似一齊死去咁。
唔多唔少，都係我殺死佢地，我對手充滿住佢地每一個人既血，仲有佢地每一個人既絕望。
我知道我一定唔會有好下場，我唔奢望自己收尾幾年可以過得好，我只求我個女可以開開心心生活落去。但係偏偏，上天就係要懲罰我，傷害我最愛錫既人。
就係孫夫人個仔孫洋同埋方允兒完成冥婚之後，我就心緒不寧，有一種食唔安坐唔落既不安感覺。然後，「佢」就用血字同我講，佢想要我個女同文家個仔文駿，二十年之後成為冥婚既新郎新娘。
我個女，就係楊秀蕎，即係而家既藍朗蕎。而文駿，就係而家既嘉駿。
我絕對唔可以畀我個女有事，我知道冥婚新郎新娘既下場只有一個，就係永生永世都受到「佢」既奴役，永無終結之日。我唔可以畀我個女咁樣！
但對手係山妖，我點可能同佢對抗？況且如果畀人知道我使橫手救自己個女，我甚至連自己都保唔住。所以我瞞住所有人，連埋幽山村既長老，都畀我呃左，無人知道「佢」揀左阿蕎同文駿。
呢件事單靠我一個人係做唔到，所以我一定要搵幫手，而呢個人就係文駿既媽媽柳絮，我知道佢一樣愛仔心切，佢一定要同我聯手。
「佢」既旨意唔可以違抗，但可以呃「佢」。我同柳絮決定左，要將阿蕎同文駿送落香港，只要佢地遠離幽山村，咁佢地先會安全。
唔可以就咁送走佢地，要令佢地假死，等所有人都以為佢地兩個死左，咁就自自然然可以魚目混珠，無人知道真相。
其實我地都只係搏一鋪，但如果我唔搏，我個女就死硬。為左我個女，我咩都做得出。
結果我搵左最忠心既僕人鳳姨送佢地兩個細蚊仔落香港，永遠唔會再返來呢到，然後我就同所有人講，佢地出去玩既時候墮崖死左，連條屍都搵唔返。
我同「佢」講左呢段設計好既對白，「佢」雖然唔知道真相，但佢就話好嬲，要懲罰下我地呢條村既人，警惕下佢地。
結果個年，無人可以離開幽山村。而本來計劃出村去城市做野既郭小蘭決定唔理呢個詛咒，話只要離開左就無事。佢執好曬野，就離開幽山村，不過佢幾日之後就返左來，只係⋯⋯佢已經咩都無曬，連精神都好似崩潰左一樣。
原來佢出去無幾耐就遇到山賊，仲畀個班山賊輪姦左一日一夜，過左幾日性奴咁既生活。佢滿肚子怨恨，呢個時候大家都知道係山妖既憤怒同詛咒造成既，但無人敢出聲。
到最尾，郭小蘭含住口怨氣，著住紅衫裙褂，自殺死左。佢臨死個下，都仍然係詛咒緊我地同呢條村⋯⋯
我以為呢件事可以告一段落，我都當自己無生過呢個女，而無幾耐柳絮都憶子成疾病死左，呢條村就再無人知道我既秘密。
點知二十年後，佢地竟然真係返左來，真係夾都無咁準⋯⋯我知道佢地一日留係幽山村都會有危險，所以我先千方百計要佢地走，係有人發現佢地既身份之前，佢地一定要走⋯⋯
不過，原來我做咁多野，始終都係逃唔過呢一劫，係命中注定⋯⋯
-
（恢復正常視角）
「原來⋯⋯原來成件事係咁⋯⋯」藍朗蕎聽後仍是沒能理解得來。
「到頭來我都係鬥唔過『佢』⋯⋯保護唔到我最愛既親人⋯⋯」陳影紅淚眼盈眶的看著藍朗蕎。
「媽媽對你唔住⋯⋯我根本無盡過一個阿媽既責任，甚至到你死左⋯⋯我都唔可以攬下你⋯⋯」陳影紅哀傷的說。
「對唔住⋯⋯」陳影紅低頭微聲道，她在哽咽抽泣，聲音也特別沙啞。此刻，藍朗蕎終於感受到陳影紅的母愛，以及她的內疚。
她很想可以抱抱她，安慰她著她別要這樣內疚和傷感，只是藍朗蕎根本碰不到陳影紅。
「仲未遲架。」藍朗蕎說，陳影紅抬頭望著她。
「但你都死左喇喎⋯⋯」
「我死左，但我仲有使命在身，你要幫我，我地一齊完成佢。」藍朗蕎說。
「我最大既心願係要阻止呢個咁荒謬既儀式，呢樣野根本唔應該存在，我唔想佢再害更多既人。眼下我地就要救幾個人！」藍朗蕎說。
「生命唔係肉體死左就係死左。如果你生存係無目的既無意義，咁同死亡係無分別；如果我死左但我仲有使命想去完成，咁我覺得我先係真正咁生存。」藍朗蕎說，陳影紅似乎有所啓發。
「我咁耐以來，都係苟且偷生，為左個好似好安逸既生活，做好多自己唔願意做既野⋯⋯反而今日畀自己個女點醒左，真係好諷刺。」陳影紅苦笑道。
「你可唔可以叫我一聲⋯⋯媽媽？」陳影紅問。
「我⋯⋯我暫時未有咁既心理準備⋯⋯對唔住。」藍朗蕎說。
「我明白既，我明白，我都係⋯⋯講下姐。」陳影紅強忍憂傷的臉容，藍朗蕎倒看得有點內疚。
「呢件事完左之後，我地好好傾下計，好無？」藍朗蕎笑說，陳影紅點點頭，也一起微笑。
忽然間，陳影紅好像找到了生活下去的動力，還有意義。
「我要返去通知嘉駿先，你都要勸止汪媽唔好推蔓渟去冥婚！」藍朗蕎說。
「放心，今次有你支持，我一定會同佢鬥到底，唔會畀呢個儀式繼續落去！」陳影紅說。
「咁我行先喇！」
「你小心呀！知唔知道呀？」陳影紅看著藍朗蕎的背影說，就好像媽媽在家中看著出門玩耍的小孩一樣，總是會叮囑他們要小心。
「知道喇！媽媽！」
陳影紅聽到後，淚水再一次忍不住，掉了下來。
-
藍朗蕎的心情也非常矛盾，但總算是釋懷了。謎團好像解開了，但⋯⋯又好像還未解決。
到底是誰將冥婚的相放進去？郭小蘭又為何會來尋仇？照道理她應該留在幽山村報仇才對，為何會來找她和嘉駿？
不行，她要快點跟嘉駿研究案情。
夜晚的街道仍然冷清，村裡不安的氛圍依舊，還有種⋯⋯不祥的感覺。
忽然間，有一陣怪風吹來，藍朗蕎居然難以向前！
「點解會咁？」藍朗蕎說，她嘗試向前踏一步，卻也無法成功，她完全動彈不能，就好像有些隱形的鐵鍊鎖著自己的手腳！
「好耐無見喇，朗蕎。」一把熟悉的聲音在藍朗蕎後面響起，那人漸漸走近藍朗蕎。
藍朗蕎回頭一望，發覺居然是王玄天！
「王師父？點解⋯⋯」
還未待藍朗蕎問完，王玄天已取出鎖鬼瓶，將藍朗蕎吸了進去！
未完待續