【驚慄】《冥婚：血紅色的裙褂》點解會係我同你？: 六、郭小蘭
六、郭小蘭
在捕捉女鬼後的一日，藍朗蕎和嘉駿總算能安睡一覺。經受幾天夜難入眠的惡夜，他們終能發個好夢，只是這個好夢並不長，因為將有更黑暗的路程等待著他們⋯⋯
王玄天相約了嘉駿和藍朗蕎在一間舊式茶樓見面。嘉駿最早到，然後是藍朗蕎，至於王玄天卻是遲遲未見。
「嗨！」藍朗蕎明顯恢復了精神，簡單跟嘉駿打了個招呼，便坐下開始喝茶。
「你精神左好多啵。」嘉駿笑說。
「好訓呀嘛，累到暈咁濟呀尋晚。」藍朗蕎笑說。
「係呢，王師父呢？」藍朗蕎問。
「佢仲未到，應該來緊掛？」嘉駿說，不過一說曹操，曹操就到。王玄天緩緩走來，嘉駿和藍朗蕎均是一臉期待的看著他，希望會帶來一個大家都高興的訊息。
「佢話佢叫郭小蘭⋯⋯你地有無印象？」王玄天問，但兩人只是一臉茫然。
「邊個郭小蘭？我完全無印象識得呢個人⋯⋯」藍朗蕎說。
「我唔識佢⋯⋯仲有無多少少資料？」嘉駿問，王玄天搖搖頭。
「佢怨念好深，我相信佢生前一定係受左好大既冤屈而死。如果你地唔識佢，會唔會係你地既爸媽識佢？」王玄天問。
「我係孤兒。」嘉駿清脆俐落的說，藍朗蕎訝異的看著嘉駿，令嘉駿也覺得奇怪。
「唔係你又係呀話？」嘉駿說。
「我有爸爸媽媽，不過⋯⋯佢地都係領養我返來架咋⋯⋯」藍朗蕎說。
王玄天聽後，不禁臉色一變。
「我覺得件事唔係咁簡單，你地休息一下，再決定查唔查落去，至於郭小蘭⋯⋯」王玄天說。
「你會點處置佢？」嘉駿問。
「我會唸經超渡佢，化解佢既怨氣，等佢可以早日投胎，忘卻今生既塵緣。」王玄天說道。
-
告別王玄天後，藍朗蕎跟嘉駿慢慢走著，心中卻仍對王玄天所說的事情耿耿於懷。
「你諗住點？」藍朗蕎忽然緩緩問道。
「我識得一個警察朋友，或者可以搵佢幫下手⋯⋯」嘉駿說。
「你想查落去？但隻野都已經畀師父收服左喇⋯⋯有必要再查落去咩？」藍朗蕎問。
「唔通你想一世畀呢個不明不白既謎困擾住而唔去搵出真相咩？」嘉駿反問。
「我只係覺得⋯⋯既然都無事，點解我地仲要冒險落去？安安定定咪好囉？」藍朗蕎說。
「有邊個可以確保真係無事？會唔會有第二個郭小蘭搵我地尋仇？我唔可以耽於一時既安逸，我要搵出真相，我要知道點解。」嘉駿說。
「你⋯⋯」藍朗蕎氣結，卻想不到說話反駁嘉駿。
「要查你自己去查！我要繼續返工、繼續同子仁拍拖，我要返正常既生活！」藍朗蕎說。
「咁你就繼續呢種咁安全但唔知可以維持幾耐既生活，但我都係唔會放棄。」嘉駿說，藍朗蕎一氣便衝前就走。
「蕎！」嘉駿叫住了藍朗蕎，藍朗蕎果然停下了腳步。
「我有咩消息再通知你，放心，我點都唔會連累你。」嘉駿說，藍朗蕎聽後便徑自繼續走。
（都唔知係咪傻⋯⋯仲繼續查⋯⋯真係唔驚死！）藍朗蕎心想，但想了想，她都有一剎那覺得，嘉駿說的話有道理。
（希望佢無事喇⋯⋯）藍朗蕎暗暗祈求上天保佑嘉駿。
-
幾天後，嘉駿相約了龔世安在咖啡店見面。
「喂，我搵左幾個大陸既老友幫我查左郭小蘭呢個人，大陸大大話話都有百幾個郭小蘭喎⋯⋯」龔世安正坐在嘉駿的對面說著。
「下？咁咪即係無法子搵到邊個係？」嘉駿一時感到灰心。
「係⋯⋯」龔世安說，嘉駿的臉更為慘白。
「不過⋯⋯」龔世安說，卻又令嘉駿臉上恢復期待之色。
「不過咩？」
「不過我發現到有一個幾特別，關於呢個郭小蘭既資料唔多，但佢既居住地就好特別。」龔世安說。
「佢住邊？有咩咁特別？」嘉駿問。
「仲記唔記得，你同我講過你收到個張冥婚相，見到張相背景寫住個咩地方？」龔世安反問。
「記得！咪佛山幽山村⋯⋯」嘉駿說著，瞳孔忽然猛地放大。
「你意思係⋯⋯佢住係幽山村？」嘉駿激動的問道，龔世安點點頭。
「睇來幽山村係唯一既線索！」嘉駿興奮的說道，因為好像經歷了多次絕望，卻忽然有了希望的曙光，找到對的方向一樣。
「你想點？你想去？」龔世安驚訝的問。
「緊係喇！我要搵出答案！」嘉駿說。
「你唔好去喇！」龔世安說。
「點解？」
「我大陸個幾個老友都同我講，幽山村呢個小鎮，不去為妙。佢地話呢個鎮，呢條村⋯⋯好詭異，經常都有人失蹤呀⋯⋯係連當地既警察都已經隻眼開隻眼閉，呢個小鎮真係好唔尋常⋯⋯」龔世安認真的說。
「咁就證明，答案一定就係幽山村入面！如果我搵唔到答案，我一定會遺憾一世！」嘉駿說。
龔世安見嘉駿如此堅定，似乎都勸不動嘉駿了，只好祝福嘉駿。
「咁你萬事小心⋯⋯有咩唔對路即刻要走，知道嗎？」龔世安說。
「我唔想將來周圍打聽我呢位好兄弟既下落。」龔世安說，嘉駿微微一笑，點點頭。
-
【答案似乎就係廣東佛山幽山村，你同唔同我上去一次睇睇？】藍朗蕎收到了嘉駿的一個訊息。
「緊係唔去⋯⋯」藍朗蕎說著，正要回覆嘉駿說不去，她卻動不了手。
嘉駿雖然跟她相識不長，但到底都經歷過生死關頭，他都沒有犧牲她去自保，如今要嘉駿自己孤身一人犯險，似乎又說不過去。
她到底如何是好？如果要去，又該拿怎樣的藉口跟鄺子仁說？她去了的話，又會有什麼樣的事情在等待她和嘉駿？
一切似乎都不明朗⋯⋯不過，她心底似乎也有了決定。
-
【子仁，我呢個星期都要返大陸探親戚，好快返！我會定期call你架嘞！勿念。朗蕎上】
鄺子仁看了看手機，暗責藍朗蕎去大陸去得太突然。
【咁突然？咁你萬事小心！有咩就打畀我喇！】鄺子仁回覆她道。
-
翌日早上，藍朗蕎已經收拾好背包，跟嘉駿踏上前往幽山村的路。
到底在前面等待著兩人的，是答案，還是更黑暗的危險？
未完待續