【英雄系列0】石仔特工系列: 3.8 Re:pray
我將van仔泊響和聲書院的正門前
我望望手錶對時,12:05am
「千柔,A先生指明左要我自己一個上去,一陣你響樓下等我得啦」
千柔檢查好手槍,問:「咁如果...你有事呢?」
我拎出andphone:「我頭先set好左,只要我連續禁個mon 3下,就可以即刻call到你」
「嗯..」千柔輕輕點頭
「做咩呀?你驚我出事呀?」
「係呀...我好驚石仔你會...」
我雙手拍拍千柔既肩膀:「放心啦,我都打過咁多槍手啦,今次一定都會冇事既!」
千柔輕笑:「希望啦..」
我地搭住乘降機上到頂樓,此時整間大樓都漆黑一片
「千柔你就響呢度等我,我自己一個上天台先」
「哦...石仔你小心D呀」千柔只好應承
踏..踏..踏
我唔知道上面有咩野等住我,但係
我一定要保護瞳瞳
「咔」我打開最後一道既木門
出現響我眼前既,係被綁響辦公椅上,昏迷左既瞳瞳
仲有旁邊既A先生
A先生吹起口哨:「你終於黎啦,IID特工石至磊」
我唔想轉彎抹角:「快d...放左瞳瞳」
「唔駛急喎,我既目的只係塊電版,唔係呢個女人」A先生用槍手槍指住瞳瞳笑道
「你係一早就知道我既身份,所以先接近瞳瞳既?」
A先生唔耐煩咁答:「咁就緊係啦,唔係駛乜扮入黎中大讀呀?」
我接住問:「你到底...係咩人?」
「我一出世果陣,老豆就已經係Sombras既人,咁我咪自然入左呢個組織囉」
「之後幫組織去幾個國家殺下d重要人物,就升左做香港區既幹部」
我忍唔住再問:「暗殺印度外長..搶電版..咁做對你地有咩好處?」
「錢囉」A先生冷笑一聲:「暗殺印度外長,印度既股市就會崩潰,我地就可以響股票市場撈一筆」
「至此塊電版就更加唔駛講啦,我地自己狂印銀紙都唔止賺1000億啦」
講真,其實我對佢地做既事真係冇乜興趣,依家我個心只係想救返瞳瞳
「你講完未?想要塊電版就拿拿聲放返瞳瞳」我板起臉道
A先生:「你咁著緊你女朋友,我實放返比你架.....我將瞳瞳推過黎,你就掉塊電版比我」
「好...」
我內心都知道冇咁便宜,已經做好拎槍既準備
「三,二,一」
我用力將提款箱拋向A先生既方向,而A先生亦非常老實咁將瞳瞳推過黎
不過,同時間,A先生拎出腰間既手槍,瞄准住瞳瞳
我冇諗多一秒,馬上撲過去擋呢一下搶擊
「砰!」
呢一槍正正打中我既小腹
弊啦...
呢一次,應該係我第一次試到中槍既滋味,真係好撚痛
我掩住肚..倒響地上
A先生指住我恥笑:「哈哈哈!你真係傻仔黎架喎..為左呢個女人可以連命都唔要」
我忍住痛:「..因為瞳..瞳瞳就係我既全部,我唔可以比佢有事」
A先生執起提款箱,睇左兩睇:「呼,幾經辛苦..終於拎到手」
「我玩完啦石至磊,我推左你落去之後...就唔會再有手尾跟架啦」
A先生抽起我,將我推埋天台既石礐
「石至磊,襯你臨死,講埋比你知啦..」A先生笑得非常仆街:「前幾個禮拜,呢個女人嬲緊你果陣,就係我響佢身邊打你毒針架啦!哈哈哈」
「畜...畜生!!!」臨近死亡邊緣,我只能心想呢兩隻字表達我對呢個冚家剷既怒火!
「哈..再見啦」
「砰!!!!」
突然既一槍,正中A先生既胸口,隨即倒地
可能係流得太多血,我既視覺開始矇糊
但係,我彷佛睇到....
瞳瞳好似張開左雙眼
「石..石仔!!!你唔好有事呀」
「石仔..石仔!!!」
慢慢...我就開始失去知覺
當我再張開眼既時候,我淨係見到
一個白色既天花板
「石仔..石仔你醒啦!太好啦!」
我右望一下,發覺有一個人正緊緊捉實我
「千..千柔?」
千柔抹抹眼淚:「你岩岩做完手術,醫生已經幫你拎返粒子彈出黎啦」
我低頭望望自己著住既病人衫「子...彈?呢度係..醫院?」
我努力回想,終於諗返起
我中左A先生既一槍之後,潛意識用左事先設定好既andphone通知千柔
就響臨比佢推落街之際,就係千柔殺死A先生救左我
「我記得啦..係千柔你救左我」我望住千柔道:「多謝你..」
千柔笑道:「咁我地係拍擋黎架嘛...何況,你當初...都救過我一次啦」
「當初?千柔..你」
「石仔,果陣救左我既果個幪面超人,就係你」千柔跟我雙目對視
我笑左兩聲,尷尬問:「你係..幾時知架?」
千柔鼓起嘴:「一早就知啦,你當我傻架咩!唔認得身型都認得你把聲啦!」
真係估唔到,我一直諗住瞞住千柔,原來佢一早就知
「石仔...多謝你呀,係你救返我既人生」千柔捉住我雙手
「哈哈..你咁講搞到我好偉大咁喎」
「咁你真係我心目中既英雄黎架!我搵日一定要請你食buffet報答你」
我:「咁多謝你先啦....係喎..瞳...瞳瞳呢?佢冇事丫嘛?!」
「瞳瞳冇事..佢響另一間醫院」此時,阿昇同新月打開門走入病房
「咁就好啦,不過我都決定左...要離開佢」
三人異口同聲問:「吓?點解呀石仔?」
「我唔可以比佢...再遇到呢d危險,我寧願以後唔再見佢」
「石仔...唔好懶偉大啦!」阿昇道
我搖搖頭:「總之我已經決定左...係呢,果塊電版呢?你地拎返未呀?」
千柔低住頭:「A先生臨死前將個箱掉左落去,我望落去既時候果個箱已經唔見左啦」
阿昇拍拍心口:「放心啦!我...」
「砰!」
「石仔,你醒返啦?」boss用力開門,將我地四人嚇倒
「嗯...做咩事呀boss?」
boss慢慢抖順條氣,道:「IID既高層知道左你地交出電版既事,決定...要對你地四個進行仲裁」