那些年，當香港仲係百鬼夜行既時代 II: 23. 陰陽全書

天眼開啟既一瞬間，一隻纖纖細細，好似半透明咁既手就立即擋係我視線可及既範圍，同時有把冰冷既女聲響起：「唔好引火自焚。」佢個把冷入心屝既聲雖然細如蚊飛，但係卻直入我既心坎中，不怒而威。哼，我冷笑一聲，你愈唔比我睇，我就偏要睇，你咬我食？我用力推開眼前既呢一 隻手，但係下一秒，我就有啲後悔了。 我眼中既畫面仍然係以師父屋企老舊既環境做背景，但係唯一唔同既就係突然多左好多人。呃，應該係鬼先岩！一隻又一隻惡形惡相，手執各樣工具或者人體殘骸既妖怪係師父所畫下既陣外不停走踱，佢地既身體呈現半透明既狀態，各鬼可以互相穿過大家，同時都好似視大家如無物咁。有啲身體無左一半…有啲一路行一路有啲液體不停從佢身體上邊滴落，場面極度噁心。佢地都有時會停低，用佢地一對不懷好意既怪眼瞪住雨瑤。呢啲鬼雖然我都未見過，但係我睇到佢地都有一個奇怪既共同點，呢樣就係佢地都有一條好幼好幼既線係個背脊伸出黎，就好似一條尾巴咁。 「阿一！」師父既聲音突然從後響起，聲音中同時夾帶住一點兒既震驚。「原來陰陽全書係真係有係元朝之後出現過呀！」 我合上天眼，扭過頭黎。師父此刻正直指住書中既其中一版，佢驚訝到甚至手指都有啲開始顫抖起黎。我輕輕提起書，開始細閱起黎。書中一大堆文言文，不過好彩，我中文底子都唔差，勉強都解讀到其內容含意。作者係書中指出，陰陽全書原來曾經被明朝既一代國師劉伯溫所奪，所以呢點正正可以解釋點解劉伯溫既法術可以咁厲害，連四神等神獸都可以駕馭到!換句說講…姐係本書仲好有可能係鎖羅盤村既地下墓穴入邊!一諗呢到，我心情頓時變得激昂起黎，因為雨瑤有救啦!我眼尾睄向雨瑤，你等我，我一定會拎到個兩卷書返黎! 「師父!出發啦! 」我闔上殘缺不全既殭屍札記，直接張口就大叫。 「等等阿一!我知你諗緊咩，但係本書的確唔係劉伯溫個墓穴入邊!唉，係我醒返，返大陸之前就曾經走多左轉鎖羅盤，嘗試搵返我地派既卷宗同埋封左塊九陰之地，但係好可惜既就係，我發現個墓已經係完全塌陷入去地底。如果個呢件事係發生係其他地方可能仲有得救，但係發生係鎖羅盤村就玩完。」師父嘆一口氣，我則滿面焦急。「鎖羅盤村點解會咁陰，其實係因為鎖羅盤村既地底其實係一個好大好大既無底洞黎。劉伯溫冒險係個到建墓，其實就係睇上左洞中既千年既陰氣，所以…書已經無左架啦…」 聽到呢到，唔單止劉伯溫個墓永末入地底，我既心都直沉到底。姐係點?無得救啦雨瑤?我垂低頭不發一言。  「但係…殭屍札記中曾經記載過... 」師父又再一次開口。我當下回過神黎，因為我知道，師父應該仲有後路可走，唔係就唔會再繼續出聲!「世上曾經有三本摹擬既陰陽全書存在過，雖然當中有兩本已經因戰亂，天災等而下落不明，但係仲有一本孤本就有好大機會會係錢氏家族既手上。」