那些年，當香港仲係百鬼夜行既時代 II: 22. 奇書

【郭璞，東晉一代術數奇人，相傳行為怪異奇特，掌握湘西操屍之術，河北趕屍技巧，湖南製屍方法，河東符咒困殭之秘等四大屍家既家傳奇技淫巧，同時尋龍點穴功夫亦為世上第一等，連諸葛亮都要輸比佢。因此，呢個人留比後世既書中就有提及過墓穴結構，墓中機關，尋龍點穴方法，當中最出名既莫過於葬書。然而，亦有唔少既傳言話佢唔單止識控屍，更識得控鬼，遺傳後世既三大奇書中，陰陽全書就係記敍郭璞自己控鬼之法既心得及心路歷程。但係據聞陰陽全書早係元朝時已經比元人從墓中盜出並且燒到連渣都無，最近期有出現過呢部書既名既地方已經係清朝既殭屍札記，所以到底呢本書係咪真實存在呢?相信當代人都已經無法一探究竟。當中，根據殭屍札記記載，陰陽全書可以分為兩個部份，一個部份係陽卷，另一部份則為陰卷。佢地兩卷中記載既術法都係互相剋制，但係一齊使用個時卻又會得到倍化既效果，陽卷主要記載正面既術法，如操屍術，陰卷則記載詛咒術，墓中機關等。】 「細路女，唔好亂講喎!雖然我同你好似識咁姐，但係陰陽全書一早唔見左幾百年啦，點會呢個時候又再重新出土丫!」我不置可否地反駁個位女靈童既說話，不過緣份呢家野有時真係好難講，就好似我既然咁有緣比八家將佢地所救，又點會無可能撞返陰陽全書既傳人丫?緣份好似注定圍繞住我不停走，呢條線好似可以無限伸廷，斷左又可以拉得返咁… 「係…係…係真架!!頭先圍繞個姐姐既個啲鬼係咁同我講架! 」小女孩比我駁一駁，當堂紅都面哂，透白既皮膚泛出薄薄既紅暈，吹彈可破既肌膚，配合腼腆既動作，真係我見尤憐。見到如此僵硬既氣氛，我輕聲安慰佢道:「得啦得啦，我無責怪你既意思，只係我覺得有啲心煩所以語氣惡左啲，對唔住呀。」平時既我就算嬲，講野既語氣都唔會咁重，唉，可能…我怕佢講既野一語成讖，咁到時…我望住雨瑤既背影，除左兀自搖頭嘆氣之外，我仲有咩可以幫到佢做? 身後突然傳出乒乒乓乓既聲音，只見師父突然慌忙地從房中衝出黎，口中不停大叫「搵到啦!搵到啦! 」而手中就拎住一本表面已經泛黃既書。我認得出，呢本野就係殭屍札記，我同佢曾經有一面之緣。【殭屍札記分左做十二卷，當中有記載到陰陽全書同郭璞呢個奇人就有三卷。十二卷當中，有大部份都已經葬身係歷史既洪荒中，只有幾本可以安全咁係呢個時間巨浪中安全渡海，黎到現代。】 泛黃書面上寫住甩色情況甚為嚴重既殭鬼柒三個大字，然而係褪色既筆跡行間，我依然感受到字既霸氣同凌厲，每一筆一劃都渾然自成，毫無猶豫，彷彿每隻字已經係剋制殭屍既兇器!師父珍而重之咁放係枱面，眼神仲不時瞄向雨瑤個邊，擔心佢隨時會出意外咁。 師父好快咁打開第七版，上面寫滿一堆密密麻麻，好似螞蟻般既小字。師父頓時眾精匯神咁細閱，而我就係嘗試辨認一兩隻畫符般既字之後就放棄左。係等候師父解碼成功之時，我突然間醒起呢一刻到底有咩可以做，可以幫下自己既老婆。嗯，呢件事就係開天眼! 自從我跟隨師父修道術之後，我都好少開眼，首先，跟住師父一齊出去所收既鬼都一定係怨氣大到嚇死街坊，根本連普通人都可以見到佢地，咁開眼有乜謂?其次就係師父經常教我唔好亂開眼去管鬼既事。人有人規，鬼有鬼規，人其實根本唔應該同鬼打交道，免得破壞人鬼之間個種微妙既平衡。但係…但係今次真係唔得，因為佢地搞到雨瑤，我係無可能放手唔理架喎! 我閉起眼睛，輕揉自己雙眼，然後係心中默念開眼咒。一股熱力慢慢流入我雙眼，當熱到好似就黎煮熟雙眼時，我猛然睜開雙眼! 哼，係我天眼既眼皮底下，無論你係神定係鬼，都一定走唔甩!!