那些年，當香港仲係百鬼夜行既時代 II: 12. 高街鬼屋VI -- 八家將II

雖然佢地人影散落係四周，但係佢地既渾厚，霸道既聲音已經傳遍整個倘大既二樓，甚至竟然將圍係我身邊既一啲泛黑既鬼氣直接喝散。但係有用咩？我已經中左不知火同雪女聯手而出既絕招，個小小既鬼氣你覺得我仲會旨在咩？
 
話雖如此，但係其實呢一喝亦唔係毫無用處既。雖然未能驅趕我身體中既冰與火兩股力量，但係至少將我從若即若離既靈魂同埋搖擺不定既身體拉返埋一齊，令我從游離既精神狀態變返做比較正常既模式。同時，五臟六腑雖然依舊飽受極熱極冷既侵擾，但係潛伏係我血液中，心臟中，呼吸中既鐘馗罡氣竟然又再重新運作，更以極快既速度去抵消我既不適感。嗯！？百鬼中既運屍火車頭一日仲未被消滅，其他鬼神既神力應該一日都會比佢直接送走，絕對無辦法降臨人間架喎！唔通所謂八家將同鐘馗有莫大既關連，可以強行喚起鐘馗之氣！？
 
對於以上既種種問題，我心中都無一個心較似樣既答案。我相信大家肯定以為我企係呢個鬼哭神嚎既戰場上，就一定會對成個戰場好了解，知道呢八個人係邊黎，知道到底發生緊咩事，同時都知道點解佢地會救我。但係現實其實正正相反。依家既我就彷彿好似返返去當年坐係試場既時代咁。坐係試場到望住人地疾筆草書，但係自己就係到玩手指，睇鐘，個種局外人感間直間直係非筆墨所能夠形容呀！
 
啲四周既基本上已經停止左對我既進攻，開始轉移集中火力對付新黎既一班入侵者。雖然場中黑影交替，流焰四射，冰雪亂飄，但係個八個人依然硬生生咁從眾鬼中闖出一條血路，遇鬼殺鬼，逕自黎到我身邊八個方位企好，包圍並保護住我。
 
係呢個時候，我先有機會認認真真咁留意下佢地個樣。佢地個個膚色都黑黝黝，好似同周遭既環境融為一體咁，而且都輪廓唔似係香港人咁瘦長有致。而佢地既面則畫到花哩花碌，又紅又白，十足人地做大戲咁樣。
 




「無大志喔？我們夠囉！」
 
為首擔任刑具爺，作陣頭引路既一名漢子粗聲粗氣咁用台語開口。而佢既聲線十分獨特，滄啞而又帶點破音，但係從中卻透出一股英偉之氣，儼如神聖不可侵犯既神一樣。
 
咁特別既聲，我當然一聽就知佢係邊個，但係我實在諗唔到，同時都估唔到佢同埋佢既團員點解會係呢度出現！