《讓我重新遇見你》·緣圓系列·: 第三十五章 另一半

第三十五章 另一半

「點可以咁做！」我響課室大叫。
「陸添羽出去！」
最後兩堂…咁都俾人罰企。
我企響走廊望下風景﹐
落雨了...
好凍呀。
有人攬住我幾好呢。
竟然後面真係有人攬住我。





包住手既啊雄單手攬住我。
睇佢個樣又屙尿啦。
「屌﹐又gay我。」我轉頭見到佢﹐
但冇推開佢﹐
反而輕輕一笑。
「多得你比賽先贏﹐我本身仲想攬住你黎錫架。」啊雄好認真咁講。
「講呢啲。」其實我見到你冇事可以返學﹐
我已經好開心﹐
兄弟呢家野在心中啦。





佢話想攬住我黎錫...
攬住我黎錫…
呢句野響腦入面狂loop﹐
好似響邊到聽過。

------------------------------
「其實係咁既﹐啱啱…啱啱我個前女朋友就搵返我。」我捉住佢隻手講。

「但我只係俾錢佢保釋佢爸爸架咋!」我舉起發誓嘅手勢。





「不過呢…就…呃…」我講吾出口。

「不過佢就冇啦啦攬住你黎錫呀嘛…」啊婷對眼開始紅﹐好似想喊咁。

-----------------------------
點解會諗起呢件事架？

「係喎﹐等等你去唔去食糖水。籃球隊話要慶祝我冇事喎。」啊雄問我。

糖水…綠豆沙…

----------------------------
「總知你唔準唔要我!」佢攬實我。





「請你食雪糕啦。」唔開心食甜野會好啲架嘛。

「唔食得雪糕…」佢扁嘴。

「咁咖哩呢？」冬天食咖哩﹐暖下胃幾好。

「都唔食得。」

「咁綠豆沙喇？」又甜又暖。

「你講果啲今日都唔食得。」

「咁你想食咩？」唔問喇,我放棄啦。

「咩都唔食!」佢主動錫左落我嘴角。





--------------------------------

封信肯定響紅色長凳！
信入面個提示係話佢咩都唔食架！

「啊添？你去唔去架？」啊雄再問我。
「唔啦…下次先。」我放學要去搵信…
雖然我都想去食。
「咁好啦。」啊雄返入班房﹐
而我就繼續企。

幾經辛苦終於放學。
個天都終於冇落雨。
「走得。」我入返班房拎書包。




之後就拿拿臨去紅色長凳。

頂…點解咁多張紅色長凳架。
上次冇留意㖭…
「唔記得邊一張㖭...」我決定逐張逐張睇,
但係有一半既凳都有人坐住。
唉﹐
睇左冇人坐果啲先。
我逐張逐張蹲低睇。
側邊啲路人又係咁望住我。
冇人坐嘅凳都比人望實哂,
有人坐嘅仲得了既？

「個男仔響到做咩呀？」有個啊婆講﹐
「佢唔會?你呀？」隔離個啊叔回應個啊婆。




「嘩乜咁狼死架！走啦。」個啊婆拉住個啊叔走。

我只係想講...
就算幾癲都好！
我唔會癲到睇啊婆囉！

「啊女走啦。」有個女人拖走佢個女。
「點解呀？」小妹妹好純真咁問。
「有個人鬼鬼祟祟唔知做緊咩呀。」個女人細細聲又大大聲咁講。

其實我只係搵信﹐
冇其他含意架...

「媽媽！幫我摺飛機。」一個男仔攞住張紙。
望真啲﹐
屌！我封信呀！

冇埋由見到封信唔攞架﹐
於是我就鼓起勇氣﹐
「唔好意思...封信...其實係我架...」我指住個小朋友手上封信。
「你個咸濕佬！連小朋友既野你都唔放過？」個女人指住我黎鬧。
Oh Shit！
我真係冇心！
「唔...唔係咁架！」我要解釋！
解釋呀！
「張紙我唔要啦！啊仔我地返去！」佢放低封信就走。

其實真係唔係咁架...

唔洗問人可唔可以讓位﹐
因為啲人俾我搵信呢個行為嚇走左。

-------------------------------

肥仔！
都係你最叻！
你終於搵齊曬啲信啦！
多謝果一次你同我坦白﹐
其實我知你無意架。

實不相暪...
如果你唔同我講﹐
我真係會用呢個藉口同你分開。
因為我唔想好似依家咁。
我地互相不捨得。

本筆記...
唔容易發現。
但發現到﹐
你就會見到我。

-------------------------------

係喎！
仲有筆記要搵架喎。
仲以為咁會告一段落。
原來係我諗少左。