《讓我重新遇見你》·緣圓系列·: 第二十章 驚喜
第二十章 驚喜
「祝你生日快樂～
祝你生日快樂～
祝肥添生日快樂～
祝你生日快樂～」
我迷迷糊糊開左少少眼。
見到啊婷攞住個蛋糕。
我係咪已經癲左？
我係掛啊婷啫﹐
但都冇理由掛到咁架。
「肥仔？」啊婷個樣放大響我面前﹐
「嗯？啊婷？」我開始清醒。
「肥仔生日快樂呀。」佢捏左我個鼻一下。
「我冇發夢呀嘛？」我唔敢相信自己見到既一切。
「冇呀。你生日嘛。」佢將啲忌廉抹響我塊面到﹐再好調皮咁伸脷。
我面帶呆滯。
過左幾秒先意識到佢抹左啲忌廉響我塊面﹐
正當我想反擊﹐
佢已經行到舖既另一個角落頭。
蛋糕就放左響枱面。
妹釘﹐受死啦！
我攞左少少忌廉﹐
再用長腿行過去。
「嘩！」佢即刻叫住跑走。
可惜佢隻腳係唔夠我長。
「肥妹。」我欄住佢﹐
順勢將啲邪惡既忌廉抹落佢白雪雪既面。
「好啦。我投降啦。」佢嘟嘴﹐
用雙手保護住個頭。
「一早應該咁做啦。」我彎腰摸下佢個頭「不過多謝肥妹仔同我過生日。」我錫左落佢塊面﹐將佢面上面既忌廉都食曬。
雖然有啲唔衛生﹐
但男女朋友又有乜所謂喎。
佢塊面紅曬「...我...我地食蛋糕啦！」
「咁易面紅既你。」我笑佢。
「邊個衰人做埋啲咁既野先架！」佢坐落開始食蛋糕。
「個蛋糕冇得許願架？」輪到我嘟嘴勁可惜咁講。
「你咁曳！冇呀！」雖然佢個樣好嬲咁。
但個嘴角就一直上揚。
「婷婷﹐添添唔敢啦。」我坐響佢隔離﹐
個頭響膞頭轉黎轉去。
「肉鬼麻！」佢笑住推開我個頭「買左件褸俾你呀。」佢唔知響邊到變左個袋出黎遞左俾我。
「個款好靚喎。」我攞左件衫出黎。
「啪-」有啲野跌左出黎
「呀！」當啊婷想執返﹐
我已經攞起左張卡。
「返屋企先睇啦！」佢想搶走張卡﹐
「給親愛既肥仔添。」我大聲讀張卡﹐
啊婷就捂住隻耳。
「一齊睇啦。」我捉住佢一隻手再拖實佢
------------------------------
肥仔寶生日快樂！
你一定估唔到我會俾呢個驚喜你啦！
呢個驚喜諗左成個星期架啦！
個蛋糕都係我試左好多次先成功架！
鍾唔鍾意先？
------------------------------
「鍾意！好鍾意㖭。」我同啊婷咁啱一齊望住對方。再同步笑「個蛋糕仲要自己整㖭呀。」
「係呀。你唔準唔食架！」佢餵左啖蛋糕俾我食。
「一定食曬佢。」我好自滿咁講。
「你呀！啱啱俾我見到你發個鐘脾氣呀。」佢用手指點左個鼻一下。
「咁佢真係嘈嘛。」我無奈笑左出黎。
因為我都覺得自己啱啱個行為好白痴。
我再揭後一頁。
------------------------------
同你一齊左一個月啦！
雖然我記性係差左啲啲咁多。
但我都記得既。
你個肥仔又唔講幾時先生日！
好彩陸運會果日啊雄同我講左你生日幾時啫。
如果唔係你想自己過呀？
我唔會俾一個世界上對我第二好既男仔自己過生日架！
------------------------------
「第一個係邊個？」唔好答我係表哥呀吓。
「我爸爸囉。」佢細聲笑左一下
「肥妹你笑咩呀？」我睇下張卡周圍既圖案。
畫得好靚。
果然係視藝人。
「笑你呷醋個樣囉。」佢挨左落我膞頭到「不如最後果頁你真係返屋企先睇啦。」佢合埋我張卡。
「好。應承你。」我將張卡放返入袋。
解決左個蛋糕之後﹐
我同佢影左張相各自放上Instagram放閃﹐
呢次都係我地第一次放有對方既相上去。
當然有人抽水係基本啦。
「你兩兄弟想謀殺？」「好夜架啦﹐熄燈啦。」啲人留言﹐
但點解啲人話兩兄弟既？
「你睇下希曈。」啊婷用手撞撞我﹐
再俾部電話我睇。
張相係希曈拉住吉仔條吠再錫左落去﹐
背景係迪士尼樂園。
再睇返自己部電話。
個Instagram都係停留響吉仔張相到。
但呢張唔同。
呢張係佢攬住希曈自拍。
「好曬呀。」我用手遮住部電話
「一早都睇得出佢地有野啦。」啊婷執埋枱面既殘局。
「唱K果陣？」我都幫手抹枱。
「之前經過你班房佢都會特登望吉仔架。」佢執好曬啲野﹐
就行返過黎著起件褸﹐
呢個時候﹐
我先發現原來佢買俾我果件褸同佢果件一樣款。
「估唔到咁快一齊。」我感嘆咁講。
話曬吉仔夢想係娶牛角包做老婆架嘛。
邊會諗到佢咁快有女朋友先得架？
「走啦！」啊婷主動翹住我隻手。
「等等先。有啲凍。」我著起佢送俾我果件褸。
因為我想同啊婷情侶裝囉。
而啊婷都好似意識到我既用意﹐
笑得好燦爛。
我地既身體被燈光照耀下更加甜蜜。
「我今日自己返去得啦。」啊婷眨下眼咁講。
「但你自己一個...」
「得啦！你唔通送我返天水圍再返屯門咩？傻！」真係一個善解人意既女孩子呀。
「真係唔洗？」我再問一次。
「係呀。成個啊媽咁。」佢真係好可愛。
最後我送左佢去搭車再送自己返屋企。
「返黎啦。同女朋友玩得好開心咁喎。」我娘親咁講。
「真係好開心架。你唔出街打牌既？ 」我除鞋坐左響佢隔離。
「啊添有女朋友咁開心呀。」老竇攞住碗麵出黎。
「係呀。」我幸福笑笑口對住我老竇。
「贏夠就收手啦。」娘親回答我既問題。
「你啱。我返房先。」我攞住放左生日卡既袋
入房。
我急不及待打開張卡既最後一頁。
------------------------------
多謝個天俾我遇見你。
多謝你留響我身邊。
我愛你。:)
由加入左愛的力量既肥婷寶送出
------------------------------
我都好多謝個天俾我遇見你。