《易容師 II 模仿犯》: 第九章-綠帽疑雲
2015年10月16日，傍晚6點01分。九龍沙田，沙田鄉市會路。
「單案估唔到咁快完啵！」車上，我主動提及熊教授涉嫌非法禁錮同強姦
一案。
「係呀，有足夠證據既話，法律面前人人平等。」
哈！但願之前我係小欖聽到熊教授發癲講既野，真係一時痴左亂講啦！
「我都好奇，教授你邊到黎有力既證據？」
雖然我冇入去法庭聽判，不過從我警署人脈中，打聽到熊教授係12號個一
日，呈上左一份有力既短片，證明佢同程氏姐妹係自願性發生性行為，以及進
行虐戀性交。
就因為呢一段短片既出現，熊教授既律師，就著「疑點利益歸於被告」，幫
熊教授撤銷我地警方對佢既起訴。
「你搵得我，唔係問我單案掛？」教授轉移話題，直入我心中所想。
「易容師再次出現，呢單野你知唔知？」對方直接，我亦無謂轉彎沒角。
「咩話......汪震逃獄？」表情反應同回答好正常，似乎真係唔知。
「唔係，係有第二個人，模仿汪震既方式犯案。」
「點解你咁肯定？你地警方已經拉到人？」
然後個幾分鐘時間，我就將近日所發生既時，連埋橙皮書同缺頁，一一咁
講比熊教授聽。
比喻：楊成坤同Dr.Chan既事。缺頁經鑑證後，確實真係出自橙皮書中。
橙皮書同缺頁上，都無任何一人既指紋......等等。
「唔會係咁掛？有冇......缺頁係手？」熊教授好驚訝，完全唔敢相信。
「係車頭，你自己打開個箱拎出黎就係。」
手執缺頁既熊教授，將十幾張缺頁重睇左一次又一次，雙手都震埋：「個男
仔，真係......好似我地遇到汪震咁？」
「經我地警方調查得知，呢個楊成坤既成長背景，同汪震係大同小異。首
先，先天智商比一般人高；其次，擁有技術性既工作經驗，同唔少人生閱歷；
最後，雙方都係屋企入面既長子，唔係獨居而係同屋企人住。」
「以上種種，都美國FBI犯罪分類報告中提及，有組織犯罪性既犯人特
質。」熊教授摸摸下巴，分析緊我比佢既情報。
「係，如果缺頁冇錯，我懷疑係有人有心設局，同時又要提我地事件又再
次重複發生......」
「......目的，係要令我地再次陷入恐慌，比佢玩弄於棋局中。而我地愈去仔
細諗點解決，愈易跌入犯人一早已經佈局好既計劃當中。」熊教授接話，道出
犯人可能既想法。
熊教授分析得頭頭是道，我都無話可說。
「咁你......唔係就咁想我同你分析案情掛？」
「不愧教授，我搵你，其實仲有一個目的。想你幫楊成坤進行催......」
「唔得，無可能。」我都未講完，教授就一下拒絕左我。
「點解呀？照缺頁所寫，同埋之前既事件作鏡，楊成坤真係好大機會係第
二個汪震，第二個『易容師』啵！你自己都受『易容師』所害，你冇理由咁大
方放過佢呀？」
我咁樣一講，教授冇出聲，雙眼只係停留係窗外。
呢個時間，我地已經係大涌橋路轉入小瀝源路。紅燈位前，我架車都停低
落黎，教授先再講野：「正如你所講，我曾經受過『易容師』陷害。問題係......
你唔好忘記，『易容師』犯案既手法，係先將自己催眠，令自身都陷入局中。所
以就算我地當時點樣去查，點樣去搵證據都好，係我地身邊既係『汪震』，唔係
『易容師』......」
「明白。」教授所講，意思係就算楊成坤係「易容師」，依家都只不過係被
催眠後既局中人。要套佢吐出真相，除非......
「除非，好似當時密室入面，一個特定既條件。咁先可以喚醒個個人，內
心既另一個人格。重點係，我地並唔知道，個一個『特定條件』係咩野。」
咁即係話，線索又斷左？
「唔係冇線索既，搵到走甩左既況倩宜，甚至......你可以直接向汪震落手。」
聽到呢度，綠燈早就亮起，但我亦未黎得切反應。
「汪震？點向佢埋手？」呢個時候，我先反應過黎，踩油門繼續開車。
「如果......可以令佢『易容師』既人格再次覺醒，或者可以問到佢有關橙皮
書同犯案既細節位。咁就可以大大提高，你地警方可以從邊到著手查案。」
呢一層，我點會諗唔到？只係，作為警察做事有所規限。
更甚，先前汪震只係睇到橙皮書已經發哂癲。
試問真係有方法，可以重新催眠喚醒佢另一人格咩？
轉入又第一城，當我準備開口，同教授講多次汪震既情況時，我視線反而
被前面兩個人影吸引過去......
一男一女，撟手走入第一城。
而個女一瞬間，轉頭對男方好開心咁笑。
呢個笑容，呢個身影......
Fish！？
「劉SIR，我住前面，一陣轉彎放......」
「唔好意思呀！我突然有Ｄ野做！」唔得，一定要去睇下！
「O......OK，咁呢度放低我都可以。」好彩，教授都唔介意。
之後我將架車泊埋一邊，衝入去第一城入面。
我一直咁走下，又跑下。經過KFC、走到元氣，再走過酒家、越泰館，
最後又返到KFC門口......依舊搵唔返失去既蹤影。
失去既只係蹤影？抑制係整個人？
我個心，忽然酸痛起黎。
唔會既，我眼花姐！
Fish一直對我不離不棄，就算我顧住做野，唔理佢都......
係呀，我成日都顧住做野，冇點理到佢。
就連佢作為女仔人家，主動提到結婚，我都冇比到答覆佢。
但係，只係一日，Fish你竟然可以變得咁狠心？
唉！做好人難，做女人心目中既好男人......更難啊！
(to be continued...)