《易容師 II 模仿犯》: 第六章-人生矛盾

　　前無去路？
　　路，應該係由人行出黎。
 
　　依家要我諗點捉原兇出黎，都只係有心無力。
　　可以做既，就係盡我本能，捉得一個得一個。
 
　　就算要我再次入局既話，亦奉陪到底！


 




　　2015年10月15日，晚上7點20分。屯門警署，重案組。
 
　　我首先要做野係，搵人幫我起一起楊成坤同Dr.Chan個底，結果有Ｄ令人
出乎意料。
　　楊成坤，23歲，某某報社既見習記者。佢係汪震「易容師」一案發生既
時候，岩岩係大學中文系畢業，八月先開始加入報社從事見習記者。
　　Dr.Chan，全名陳志明，40歲，現為屯門某私家醫院外科醫生。三個月前
收到高薪招攬，由屯門醫院轉到某私家醫院工作。但由於Dr.Chan一直負責帶
領一班實習外科醫生，因此就算轉左工作地點，依舊定時返到屯門醫院主理實
習事項。




 
　　兩人背景資料，驟眼睇毫無異常。
　　對比埋呢半年內既失蹤人口，除左何秀麗之外，同區以及全港多區失蹤人
士，共七人都無一同Dr.Chan或楊成坤有關。
 
　　抑或係，依家只係個序幕？
　　咁同況倩宜既逃走、歐陽美琪依然失蹤，又有冇關連？
 
　　我翻開個櫃，拎返出用膠袋載著既兩樣證物。
　　橙皮書，以及一堆缺頁。




 
　　我開始思索返，呢一切既事件，會唔會真係如同橙皮書內容一樣？
　　唔係，依家我手上既缺頁，都只係去到「易容師」做事前功夫既章次。
　　真正詳細內容、後話，或者會有點唔一樣......
 
　　叩叩。
 
　　「入黎。」
　　「天哥，好夜啦啵！仲未走呀？」係陳仔，未講完就打左個喊路。
　　「唉，點走呀？」我拎起缺頁問：「係啵！呢幾日有冇再搵到相關既缺頁，
或者相近既內容？」
　　「冇呀.....唔係啵，天哥你唔係約左阿嫂撐枱腳咩？真係仲唔走呀？」
　　「仆街！」好彩呢個衰仔提一提我，今朝我自己仲同佢哂命話約左Fish食
大餐，勸佢都快Ｄ識個女朋友。估唔到反而係自己差Ｄ唔記得！
 






　　2015年10月15日，晚上8點12分。屯門黃金海岸，黃金海岸酒店。
 
　　大件事！約左8點同Fish食飯，依家遲哂大到，實比佢鬧死！
 
　　我一泊好車，即係衝入酒店入面。
　　呀！好死唔好死，個侍應攔住我去路啵！
 
　　「Sir？Are you......」
　　「屌！大家香港人講乜野英文姐？訂左兩位，姓劉架！」
　　「唔......唔好意思，我依家幫你去查下。」
 
　　查快Ｄ啦！唔係一陣要叫伙計收屍架啦！
 




　　「劉生？係兩位既。不過岩岩有位小姐已經到左，我地請左佢入去坐著先
架啦！」侍應好有禮物咁解答。
　　「係係係，唔該哂！」但唔該快Ｄ帶路！
 
　　「劉生，前面個張就係。」係呀，我見到。
　　短髮既Fish，今夜著住有點隆重既紫色晚裝裙，手執著一杯清水放係嘴
邊，似飲非飲咁款。
　　佢雙眼既視線，好似早就放棄等待我既來臨，一直死死地咁望著遠處窗外
既景色。
 
　　「哈哈哈，你幻想緊我係窗邊飛入黎？」一手拉開張椅，坐左落：「Sorry，
警署個邊又有新案件，所以遲左到......」
　　Fish冇出聲，視線繼續望向外面，一眼都冇正視過我。
　　「Fish，Fish！你叫左野食未呀？呢到Ｄ龍蝦意大利飯聽聞幾好食架啵！」
　　一樣，佢都係冇理過我。唯一唔同既，只係放低左杯水。唔通，佢嬲我岩




先出場個爛GAG太爛？
 
　　緊係唔係啦！我知佢嬲咩。

　　「Winter！」唔理咁多著，女人始終唔餓得：「黎兩SET唔同既，除左第三
款要一個龍蝦意大利飯，其他隨你點搭配，總之餐牌入面Ｄ野唔好重複就得。」
　　「好既，先生。」個侍應一走，我即刻捉著Fish隻手，摸著佢：「真係對
唔住呀！我知你好重視每一次約會食飯，我保證唔會有下次。」
　　「唔會有下次？」Fish終於擰返轉臉同我講野，但係惡夢開始啦！
　　「你都知我好重視每一次約會，但你幾乎每一次都遲到。仲記唔記得五月
個陣呀？明明約左同你慶祝生日，你拋低句『要救人』，就留低左我同個生日
蛋糕。唔好話你心目中有冇我，你連自己都冇呀......」
　　唔係Fish講返，我都差Ｄ忘記，當日仲未醒覺既汪震比人型蜈蚣追殺個一
晚，正正係我既生日。
 




　　「對唔住，但人命關天......」
　　「人命關天？係上天個天，唔係你劉孝天個天啵！」
　　「Fish你冷靜Ｄ。」
　　「我好冷靜，我仲好記得我自己係唔鍾意警察。但係因為遇到你，係你行
動令我知道，做警察都有好人。但係作為一個好警察既你，有冇諗過自己做得
過哂龍？點解好似咩事都關你事，就連自己女朋友同自己既野都可以唔理？」
 
　　到底咩事呀？我又唔係做黑警，做得好都有錯？
 
　　「好好好，我今日開始盡量去改善。」真話，唔講得。
　　「真係既......就好啦！」Fish縮返隻手落枱底，而我再冇講Ｄ咩。
　　因為我知道，錯既唔係佢，只係情義兩難存。
 
　　只係，自小以做個好警察為志願，想做一個救人既英雄，除暴安良既警
察，犧牲身邊既人同事，又值唔值得？
　　相反，想擁有一個有能力有地位，又愛惜自己既好男人，但就要呢個男人
上進同時，唔好對公事太上心，又係咪正確？
 
　　矛盾，令本應可以從案件中抽身，作少許休息既我，再度陷入頭痛既領
域.....
 


　　2015年10月15日，晚上10點04分。屯門黃金海岸，黃金海岸酒店。
 
　　成餐飯，食左差唔多兩個鐘。係食物黎之前，我地冇再講過野。
　　到Ｄ野食黎到，我只係講左句：「隨便啵，鐘意既溝埋食都OK。」期間
就冇再有任何交流。
 
　　只係一直食，一直食。
　　就連中途電話響，我都較左震機，由佢震唔接聽著。
　　之後成程除左交換下Ｄ食物，就好似佰生人咁。
 
　　直到最後飲埋個湯，Fish終於肯打破沉默。
　　「不如我地結婚咯。」
 


　　吓？
 


　　「我話，不如......我地結婚啦！」

　　Fish再次重複，而我聽得非常清楚。
　　只係，有Ｄ唔敢相信。
 
　　　　　　　　　　　　　　　　　　　　　　　　　　　(to be continued...)