《易容師 II 模仿犯》: 第五章-三個假設
「前面個四眼仔同我企係到！」
唔會係咁橋架，唔會係咁橋架！
我不斷催眠自己，同自己講只係事有巧合。
只係，答案往往同人既想像有出入。
「喂喂喂！阿SIR冷靜Ｄ......」
「你，頭先講咩呀？」我雙手搭係個o靚仔雙肩上面，捉著佢問。
「阿SIR，你冷靜Ｄ先......」
「你係咪玩野呀！我問你頭先講乜撚短髮女仔呀？」
「我話Ｄ短髮女仔犯賤，關阿SIR你咩事喎？」個o靚仔驚到變埋聲。
我知道我再咁衝動都無補於事，冷靜左落黎再問佢野。
「話我知道，點解你會講頭先Ｄ野？」
「岩岩比個短髮MK妹鬧，又諗起個夢境......」
「有個短髮M女？」我大概估到，搶先接話。
「阿SIR......你......你點解......會知道架？知道我夢見既係個M女？」
依家既我，已經比唔出任何反應。
我唔敢講下一句說話，做下一步行動。
因為我知道接下黎既行動同對白，就好似早已經比人設計好，十足一名演
員跟著一個故事，或者一個劇本去做。
然後，我耳邊徘徊著汪震既一句話：
「計謀既第一步，就係比對方先算多步。」
無話可說，早已成局中之人。
頭，又開始痛起黎，比起第一次遇上「易容師」事情，更加劇痛百倍！
到底，我仲可以點做？
我既下一步又係咪犯人計算之中？
眼前既呢一個o靚仔，又係咪所謂既「犯人」？
假設，呢一切都跟著同一套劇本咁去做既話。眼前呢個o靚仔就係汪震，
而Dr.Chan就係熊教授？
咁Dr.Chan係咪同呢件事有關？
係啦，呢個o靚仔頭先都係咁岩去搵Dr.Chan。就好似我第一次去搵熊德倫
了解案情時候一樣！
好亂呀......
屌你老尾，完全好似比人玩緊咁！
「阿SIR，阿SIR！」個o靚仔係咁叫我：「唔好意思呀，冇咩既話，我可
以走未呀？」
「未，跟我上車！」既然無得避，唯有直入主題。我拉著個o靚仔上我架
GTR，關埋Ｄ車門車窗，開始盤問有關佢事。
「你同Dr.Chan咩關係？」
「朋友介紹我......我黎問佢有關夢境既問題囉！」
「夢境？Dr.Chan唔係外科專家咩？對呢Ｄ夢境佢都熟悉？」
「我搵Dr.Chan唔係解咩夢，主要想請教佢，有關我係夢中見到既野，現
實係咪會有機會發生......」
咩鳩呀？九唔搭八既？
o靚仔你拎錯劇本呀？
「咩有冇機會發生？」我不自然咁皺眉，一臉疑惑。
「咪就係阿SIR你問過既野囉！」我問過Ｄ咩？
「你問Dr.Chan個一個問題......」o靚仔R下頭，吞吞吐吐咁：「咪就係問
有關『人被扭曲哂手腳之後，仲可唔可以活動自如』。嗱，事先聲明，我唔係
有心偷聽架！只係我早到左，見你同Dr.Chan傾緊計，先坐埋一邊......見你走我
先埋黎架！」
「點解你要問呢個問題？」有Ｄ唔對路啵。
「咪話我係夢境到.....」講到一半，個o靚仔忽然又停止左唔再講。
「又咩事幹？講Ｄ唔講Ｄ既？依家阿SIR問你野呀！」
「阿SIR，講左你係咪同我保守祕密先？」不祥既預感又黎了。
「你唔好話我知.....你係個夢入面，見到Dr.Chan呀？」
o靚仔冇出聲，只係掹大個口同雙死人眼，好驚訝咁望實我。
然後，隨便咁自我介紹左句：「係啦，我係劉孝天督察，點稱呼？」
「楊成坤。」
「冇咩架啦，之後有咩再搵你。」呢一刻，我亦諗唔到有咩好講，打開車
門放楊成坤走。
望著楊成坤驚慌失措既背影，我就連進一步思索接下黎呢單案，我都唔敢
再去諗。
點解？
如果再追查落去，結果又會唔會只係好似汪震一事咁？
所謂既犯人，先會係Dr.Chan，然後就到眼前呢個楊成坤.....
所有野，將會跟著本書咁去做？咁我諗黎做咩？
好頭痛......
我又點起支煙，將煙霧吐出車外，手放到窗邊，職業病發作下開始重新整
合案情。
依家假設真相有三個。
一：汪震確實係「易容師」，然而有著社會人格障礙既人，發現到汪震既事
件，開始模仿汪震既犯罪模式。
而犯罪過程，就如同書本中。而另外剛出現既楊成坤，同埋Dr.Chan為最
大嫌疑人。
二：依家呢單案件既犯人，先係原罪犯。佢將佢既計劃寫成一本書，交到
汪震手上，令到潛意式有人格分裂既汪震，跟隨書中既內容行事。
同樣，楊成坤同Dr.Chan亦逃唔過大嫌疑人。
三：不論汪震，抑或依家呢單案既犯人，都只係模仿犯罪。兩者都只係跟
著書中既知識去行事，只係後者係今次犯案當中，或多或少會進一步改良呢個
變態犯罪過程。
言而，第三個假設係我最唔想實現既真相。
因為如果真係如我推測既話，就算捉多一個汪震，又會好似今次咁再走出
多一個黎。
所謂「易容師」，就算冇左一個，仲有千千萬萬個做代替。
易容師，唔再係一個單純擁有多重身份既人......而係數之不盡，混入人群充
當唔同角色既一個「組織」。
(to be continued...)