回到初戀時: EP24

閒談間，原來巴士已經到達總站，凌子峰這時高興地唱著:

[ 燒雞翼，我自細鍾意食，  燒乳鴿，好過食筵席……
甘香，可口，我最恨食！   日日辛勞原為了搵食，雞鴨魚蝦應該多進食……]

[明哥仔……落車啦！你望住個窗發咩呆呀？？]

[哦……我十幾年冇燒野食啦……今日一定玩過盡興！]偉明笑著說。

[吹水呀？十幾年？？你老兄今年貴庾呀？不如你吹大D話係你媽咪個肚就已經食過啦……]子峰大聲說。





[你唔知我係未來人咩？]偉明笑著說。

[係啦……未來人先生……咁我求你話我聽下星期數學會測D乜啦？……上次周Sir咋唒型話我如果再唔合格就要見家長啦……]子峰說。

[我鬼知咩！講吓你就信……我話穿越時空嚟打救你呀！傻仔，落車啦……咦……咪住先！你睇下前面邊個嚟左！]偉明指著前面說。

只見他們前方不遠處有一個瘦削男孩的背影，正拿著兩袋燒烤用的碳緩慢地走著，這時鬼馬的凌子峰衝上前拍一拍那瘦削男孩的背部，然後迅速走到男孩的前方大叫一聲:

[哇…………哇！]





[喂！死仔峰……人嚇人冇藥醫架……]那瘦削男孩說。

[醫返都變低B嘛……陳輝揚小朋友……！咦？唔見你老死肥賓嘅？]子峰笑著說。

[條友仔話晏D到！方唔係要我地準備晒D野食，透埋過爐先施施然嚟咩？喂！唔好講咁多住……幫手拎住啦！]陳輝揚說。

[冇問題！俾包我……係呢，知唔知邊個到左？]子峰說。

[盧旺達話早D嚟罷爐，我諗佢已經到咗啦……]陳輝揚回應。





果然他們很快在左邊燒烤場看見一個男孩向著他們三人揮手……

[有冇攪錯呀？你地呢家先嚟？講好咗9點半……你地班大帝差唔多成11點先到？？你地知唔知我等到好無奈呀？幾驚你地班友放我飛機呀！]盧旺達氣憤地說。

[唔好嬲啦……為人民服務你應該覺得光榮！大家一齊鞠躬向盧司令敬禮……]子峰發揮笑匠的本色說。

[最多一陣叫兩位大美人燒雞翼孝敬你老人家啦……]陳輝揚笑著說。

[咪啦……正所謂朋友妻，“咪走雞”！哦！唔係……係“不可窺”先啱！陳可兒係偉明嘅女朋友……我唔會亂嚟嘅……至於嗰隻殘雞妮……你地食埋我嗰份啦……唔該！]旺達搖著頭說。

這時盧旺達背後突然殺氣騰騰……

[盧……旺……達！！你話邊個係殘雞妮話！]





[一講曹操， 曹操就到！真係日頭唔好講人呀！]盧旺達抱著頭躲在凌子峰背後說。

[盧旺達……我一陣先教訓你！]汪子妮兩手叉著腰說。

這時子妮突然望著偉明，然後開口說:

[我有D野想同你單獨講，麻煩你過一過嚟……]

偉明此刻呆著不懂反應……