唔好玩啦，我係月老個助手？: 4.3

我轉左去尖沙咀the one個到，諗住shopping下咁，話就話女人唔開心可以起勢買野黎忘記負能量，但真係冇咩心情買，加上豆零都冇個買鬼咩！
不過其實唔係話嬲佢既，只係第一次見佢唔夠膽同我講佢想講既野，絲絲縮縮咁到最後又唔講咩事，個種感覺就好似係有條女幫你打打下飛機，佢突然幫你拉返好褲鏈咁呀！
（我唔知係咪真係呢種感覺，原諒我粗魯左啲咁去形容）

佢不嬲都好直接架嘛，做咩今次口窒窒，係咪有野唔話得我知姐依家！

妖！咁我即係嬲定唔嬲佢呀！點架你，伍沚緣！！點解我會變成咁架！！！好矛盾呀我依家！

「嘩個女仔咁勁揪既？」





「殘天腳呀屌！哈哈……」

「拿拿林影低先啦喂！」

「影衰哂我地啲男人啦…on9仔！」

我嬲嬲地咁諗住從the one到行返出去既時候，竟然有一大班人圍住對男女。

個女既仲好凶狠咁用腳起勢伸個男仔，搞到我都想伸埋一份，不過係伸落個死人洛賢到。





後尾我淨係見到有第二個男仔黎接個女仔，比人打個條友就走左，十成十一係箍煲唔成啦，踩到咁都唔反抗，你樽鹽去左邊呀大佬？

「問世間情是何物，直教人生死相許～！」我扮到好有呢個文學人既feel，跟住我又聽到有人話我痴線！

「別人笑我太瘋癲～……」我梗係覺得自己差把大既扇係到撥下撥下咁。

「我笑他人看不穿。」又係呢把乞人憎既聲。

我扮聽唔到咁繼續行。