唔好玩啦，我係月老個助手？: 2.1

「這裡係月宮…」 月老正沾沾自喜咁介紹佢既住所。

「等我黎啦，啲廣東話仲好半桶水呀你，講到人地都唔明你講乜！」 洛賢打斷左月老既興致，轉身就同我講， 

「拿，呢到就係月宮，你呢就係我地新請返黎既助手，幫手將世上億億萬萬對既情侶交配…交往先岩。」

而我就見到月老係洛賢隔離整色整水，好似想打佢咁。

「咁點解會係我？？」 我向住月老問。





「因為…其實..」 唔知點解月老似係有野暪住我咁。

「因為我要令你明白愛情是一種很美好既事黎，唔可以再將自己困係間屋入面啦，係啦！就係因為咁！」 月老既眼神閃黎閃去，我仲以為佢隻眼抽筋。

「咁…呢份工有冇糧出既先？」 我望住後面都幾大下既月宮，心諗應該有啲咩長生不老藥呀，或者係變靚啲既藥掛。

「一份可觀既愛情收入。」 月老好認真咁講。

「下？！有冇得長生不老呀？」 我露出悄為惋惜既表情。





「睇太多電視劇啦你，邊有呢啲野呀！話時話，咁幾時收到先，係咪有得揀人架？」 睇黎洛賢仲心急過我。

「命中注定既野……係無得揀…架…架…」
……
……
聽完呢句之後我就再聽唔到有任何聲音，而係又慢慢咁…失去左…意..識
……
……

「醒啦靚女，喂，死啦佢會唔會第一次上去，落返黎就咩左架？」 點解好似有把男仔聲係到講野咁既…





死！訓過龍！唔記得要幫呀媽收衫！唔係喎，我唔係行緊返屋企架咩？

「發左個惡夢姐，發左個惡夢……我屌……」
我從床上坐返起身個陣，我見到夢入面個月老同叫洛賢既男仔都企係床邊望住我…

我跪起張床，好呆滯咁meet左一下個男仔塊面……
1秒…
2秒…

「嘩屌痛架大佬！你訓醒未？？」 洛賢拍開我隻手，連我都感覺到痛，即係唔係夢啦…

「頭先你地講啲野係咪真架？我仲係唔係咁相信到我頭先上左月宮…仲有你講比我聽個啲野，我究竟要點做，我依家可以做啲咩…我好..好亂。」 我又慣性咁摷我個頭，然後低下頭，沉默。

「我係咪刺激左佢，佢好似…」 洛賢稍微收細聲線咁同月老講，咁當然咁鬼靜，你實係覺得我聽唔到啦。





「你諗下你自己個陣個樣比呢位小姐仲激動啦，還好意思話人！」 月老語帶笑意咁窒返洛賢，洛賢細細聲咁妖左佢一下之後就從間房行左出去。

「爺爺～我打好左盆水啦。」 門口竟然傳來了一把年輕的女聲。

呀爺？！