(青春極少甜)原來曖昧真係最好既階段: 17-認清

我以為，只要我決定要好好諗清楚要選擇邊一個，個天就會比時間我諗。

但係，事實永遠唔會好似想像中咁美好。

放學番屋企個陣，我見到魏天培同一個女仔一齊。

佢個樣好寵溺咁摸個女仔既頭發。

個女仔個樣，好似我；個女仔既身形，都好似我。



我既眼眶突然之間就變濕左。

我從來都唔知，原來眼淚可以係情緒一出現既瞬間就流落黎。
直到呢一刻。

我唔想俾魏天培發現到，好似係我做錯事、係我唔應該撞見佢地咁，我低住頭快步行番屋企。

一路行番到屋企，我個腦都不受控制咁係咁諗，個女仔係邊個，同魏天培係咩關係，會唔會係魏天培既前女朋友，魏天培會唔會係因為我同佢前女朋友好似樣所以先對我咁好。

呢段思維好熟悉，係上次我見到呀逸同張倩泳係書局個陣諗過既野。


分別在於，上次既我係有少少嬲同唔忿氣，而今次，我個心好痛好痛，好似用冰一下一下撞擊個心咁。

感受住面上暖笠笠既眼淚，我諗我終於都清楚咁知道，我鍾意既，



係魏天培。






第二日番學，台面有個袋。我打開，見到預期中既士多啤梨鬆餅同十字奶。
我個鼻一酸，又唔小心流左一滴眼淚出黎。
我抹走眼淚，將個袋掉落垃圾筒，然後番埋位僕係台。有人輕輕掂我膊頭，

我好希望好希望係魏天培，

但我一抬頭，映入眼中既，

係呀逸擔心既樣。

佢一見到我喊緊，個樣由擔心變左做詫異。

我好唔想係呀逸面前喊，但無奈我真係忍唔到D眼淚。



「呀逸，你俾我自己冷靜下，我好快冇事。」我搶先係佢講出安慰說話之前咁樣講。

呀逸個樣依然驚訝，但都點頭，然後番埋自己位。


我僕番低繼續唔出聲咁喊。

去到Lunch，我冇去飯堂，自己一個坐係班房，保持僕低既姿勢。

有人拍一拍我膊頭，應該係呀逸擔心我。

「我唔肚餓呀，我想休息下。」我趴住講。





「咩呀，終於知自己肥，想減呀？」



呢把帶住笑既聲，

係魏天培。

一聽到佢把聲，我個心就痛一痛，又開始喊。
我繼續趴係台，唔打算俾佢見到我個樣。

「喂o靚妹，洗唔洗唔應人呀。」魏天培拍左我個頭一下。

我腦入面頓時浮現琴日佢好溫柔咁樣摸個個女仔個頭既畫面，瞬間崩潰大喊，跑左出課室。



學校天台係唔俾上既地方，雖然我唔係D咁聽話既學生，但我都覺得冇乜必要上，所以六年黎一次都冇上過。
但而家，我因為唔知哩去邊到好，所以一支箭咁向天台跑。
後面傳黎魏天培既叫聲，但我唔諗住回頭。

直到上天台既個層樓梯，有野封住左，我先被逼停係到。
而魏天培都係我身後停低左。
因為跑左一段路同樓梯，我地都不斷喘住氣。

 「喂！妳跑夠未呀！到底發生咩事呀！」
魏天培捉住我膊頭將我轉向佢。

 我又喊住又喘唒氣一定好樣衰，我真係唔想俾佢望到呀……

我冇應佢，耷住個頭。



「到底做咩呀！妳講唔講呀！」佢搖左幾下我膊頭。

我又冇做錯野！做乜咁惡對我喎！買早餐俾我就大唒呀？咪又係因為個個女仔……

「我唔係個個女仔……你唔好捉住我……」

「咩女仔呀？妳講咩……妳……琴日係咪見到……」
魏天培講到一半突然細聲左。

「係呀……我見到呀……我見到你點樣摸佢個頭點樣對住佢笑呀！我見到佢同我有幾似呀！」我抬番起頭望住佢講。

我feel到我對眼已經腫唒，頭髮亦痴住佈滿淚水既面上，我而家個樣一定好狼狽。

「咁點解妳唔問我佢係邊個、點解我會同佢一齊？」

「點問呀？唔通直接問佢係唔係你女朋友？」

我既眼淚已經多到一條線咁沿住下巴滴落。

「佢唔係我女朋友，但佢係我曾經好鍾意既女仔。」



魏天培既呢句說話，好似死刑一樣判落我身上。



「你對我好，係咪因為佢……」我已經喊到冇力講野。


「一開始係，但妳可唔可以聽下我講，坐低先，好冇？」

我諗傷心到一個位係真係會冇唒力。 

我慢慢坐低係樓梯級，而魏天培坐低左係地下，對住我，

開始訴說佢既故事。