(青春極少甜)原來曖昧真係最好既階段: 16-謝曉霜
Lunch食飯個陣，我木口木面咁，希望自己可以快D分清楚自己既感情，唔好再咁自私拖住佢地兩個……但其實，而家呢一種互相有好感既階段，真係令人個心好甜，只係甜既時候，同時都會有酸澀。
Tina坐低，平時開朗既佢竟然皺皺地眉，又冇出聲講野。
我諗緊原因既時候，楊紫晴同麥葵都坐低左。
「咦，Tina做乜死老豆咁既樣？」楊紫晴問。
「係喎……侑淇咁既樣我地就話慣姐，Tina妳做咩呀？」
……躺著也中槍。
「佢……番左黎。」Tina低住頭答。
呢個「佢」，我地三個都知係邊個。
呢個「佢」，係Tina既青梅竹馬。
佢叫何夏言，一個好陽光既男仔。係比起魏天培更加陽光既人。其本上一講佢，就會諗到佢有幾黑同見到棚牙有幾白既笑容，第二就會諗到佢D肌肉同諗起做運動，係一個咁樣既人。
佢地爸爸媽媽識左好耐，成日約去大家屋企見面，所以佢地兩個由細玩到大。細個個陣，佢地都係當對方係自己最好既朋友。小學雞既時候，大家都會覺得一個男仔同一個女仔出街、或者痴得埋就係有路，但佢兩個就係經常性去邊都一齊。
何夏言細個生得好細粒，而本身就高大既Tina當然盡自己做「大」既責任，睇住何夏言。
何夏言仆親，Tina咩佢番屋企；何夏言俾人鬧，Tina鬧番鬧佢既人；何夏言默書低分俾爸爸媽媽鬧，Tina求情，然後再幫何夏言溫書。
自細照顧人、又同男仔玩埋一齊就造就左而家Tina爽朗又細心既性格。
去到中二，Tina發現個個比佢細粒又易喊既何夏言，原來係不知不覺中，已經高過佢。
Tina整親，何夏言公主抱起佢去醫療室；Tina病左，何夏言上佢屋企溫書做功課，順便照顧佢。
大部份人眼中都會覺得佢地咁close係因為佢地係好朋友、係青梅竹馬。
但只有佢地兩個知道，友情一早偷偷變左做愛情。
呢種情愫不斷係兩個人心入面發酵。
佢地兩個都好清楚自己鍾意對方，但唔知點解，兩個都冇開口，但就默默守護大家。
直到中三既一次。
「Ennis琴日同我表白。」何夏言係Tina間房到做緊功課既時候，無啦啦咁講。
Tina震左震。
Ennis係我地既同級同學。
「哦……係咩。Ennis幾好?，係你鍾意個type喎，細細粒，弱質纖纖咁。」
「乜妳咁唔了解我架咩。」何夏言個樣有D失望。
「下？」Tina一頭霧水。
「我不嬲鍾意既type，都係sporty型，高高瘦瘦。」
Tina面紅。
「佢同我表白，妳覺得點。」
「咩點呀……」Tina講野變得細聲。
「妳冇唔開心咩？」
「冇、冇呀，點解要唔開心呀。」Tina口窒窒咁講。
「因為妳鍾意我，而妳都知，
我鍾意妳。」
Tina塊面已經紅卜卜。
「咁你做乜仲特登同我講Ennis……」
「我想睇下妳係咪仲係咁唔坦率。」 何夏言既眼神好似陽光咁直射Tina，而Tina就只可以不斷逃避視線。
「我地……一齊啦，好冇？」
何夏言既呢一句，深深咁傳入Tina既心，引起一陣又一陣既迴響。
然而Tina冇回應到，因為佢唔知道，到底佢係真係鍾意何夏言，定純粹因為自己身邊得呢一個男仔。
佢唔想亂咁開始。
「傻妹，等妳準備好先再答我。」何夏言摸一摸Tina個頭，就行出房間。
以前俾Tina摸住頭安慰既個個細粒仔，而家已經足夠安撫番Tina既心。
呢日之後，佢地依然係咁樣相處，不過心入面有D野就唔同左。
以前會互相吱大家，攬埋一舊，而家玩埋左會有D尷尬而退開。
大家對對方既關懷，都多左一份溫柔。
但係呢段關係並冇持續太耐，
半年之後，
何夏言突然消失左。
佢幾日冇番學，電話停止左服務，Tina心急如焚。
去到星期日，Tina同屋企人上何夏言屋企食飯。
「霜霜，妳有冇同?同學幫夏言搞farewell呀？」何媽媽問。
Tina沉默，但個心跳得好快好快。
「曉霜？Auntie問妳野呀。」Tina媽媽用手爭頂一頂Tina。
「……我唔知道……佢走左……」Tina耷低頭。
「下！佢竟然冇講？佢要去英國讀書喎……都唔知幾時先番，咁都唔同妳講？」何媽媽好詫異。
Tina都覺得不可置信，個心瘋狂咁跳。
「係呀，佢冇同我……講……」
本身想扮到唔介意既Tina，講到一半已經哽咽，眼淚一滴滴咁滴向台面。
「霜霜……妳……唔好喊啦……」何爸何媽急忙安慰。
「曉霜……妳入廁所平靜下啦……」Tina媽咪都好擔心。
Tina行入廁所，放縱咁喊，喊左佢既驚訝、不解、失望同不捨出黎。
最後係Tina記憶中，呢餐飯，食得好尷尬。
何媽媽俾左何夏言既聯絡電話Tina，但Tina就冇搵過何夏言，佢唔明點解何夏言可以不辭而別。
何夏言既Facebook都冇再更新過，Tina基本上只會係何爸何媽口中聽到何夏言既近況。
何夏言高左肥左，係個邊涷唔涷，讀書辛唔辛苦。每次聽到，Tina都好想對佢漠不關心，但埋怨佢粒聲唔出就走左既同時，共存既係掛念同愛。
亦都因為咁，呢兩年黎，Tina都冇拍過拖。
「佢番左黎，係咪唔會再走？」我問。
「好似係……話已經係個邊讀完，會番黎讀大學……」Tina答。
「咁……妳有冇問佢當年點解冇通知妳就走左去？」我再問。
「嗯……」
何夏言係琴日番黎香港，佢一落機就上左Tina屋企。
放學番到屋企之後，Tina就見到一個既陌生又熟悉既面孔，佢坐左係客廳。
Tina個心用力又快速咁跳動。
呢個就係佢等左兩年既人，佢憎左兩年又掛住左兩年既人。
即使好想仔細望清楚呢個人既變化，Tina都係忍唔住眼淚，然後衝左入房。
何夏言即刻跟左上去，及時推開爭D閂上既門。
Tina坐係地下，久別重逢既掛念、喜悅同埋怨全部化為眼淚，一串串滴落。
「對唔住……」何夏言都坐係地上面，望住Tina。
「點解……」Tina吐出兩隻字。
何夏言好清楚佢問點解D咩，緩緩開口。
「兩年半前，妳話妳會俾答覆我，但我等左半年，妳一D回應都冇……我好難受，但我既生活全部都充滿住妳，我唔知點捱落去……咁o岩，呀爸呀媽問我有冇興趣去外國讀書，我就答應左，以為離開妳，我就冇咁痛苦……而且，如果真係鍾意大家，我諗即使過左兩年，感情都係會一樣……我諗唔到點樣講呢個理由妳知，所以先粒聲唔出走左……」
何夏言隻眼慢慢變紅。
「但我走左幾日，已經好後悔……之後呀媽鬧左我一餐，話妳喊得好犀利……對唔住……真係好對唔住…」
「咁點解……你走左之後唔搵我……」Tina滿面眼淚咁抬高望何夏言。
「我覺得我冇資格……再打擾妳……我知係我錯……」到何夏言耷低頭。
「你個白痴！你知唔知你唔搵我，我更加嬲更加唔開心呀！你有乜可能兩年都唔搵我呀！衰人衰人衰人！」Tina係咁打何夏言。
「對唔住……」何夏言絲毫冇反抗。
Tina打到攰，望一望何夏言個樣。
佢輪廓深左好多，五官好清晰，冇左稚氣，變左少少男人味。
Tina既眼淚一湧而出，原來兩年過去，分別真係可以好大。
佢再亦都忍唔住，攬住何夏言係咁喊。
何夏言都默默忍住眼淚，輕輕摸住Tina既頭髮。
Tina喊完，就鬆番開何夏言。
「咁……妳……仲鍾唔鍾意我？」何夏言小心翼翼咁問。
Tina又紅唒面。
「你掉低我兩年，唔係諗住咁易得米下話，至少都追番我兩年啦。」Tina扮惡。
「好！我一定會追番你！」
何夏言笑得好燦爛。
「咁即係happy ending啦，咁妳做乜拿埋口面？」楊紫晴冇咁擔心Tina，就開始食飯。
「佢話今日會黎接我放學……好樣衰架嘛個個都見到……」Tina好似好難為情咁。
平時爽直Tina冇啦啦咁既樣，真係睇到我同麥葵打唒冷震。
「屌妳發唒姣咁！」楊紫晴更加係諗都冇諗就起飛腳踢Tina。
對於楊紫晴條黑色打底褲，我地都已經非常熟悉，事關因為佢主人太粗魯所以經常曝露於人前。
「成日都話呢個樣放係楊紫暗到真係浪費。」我搖搖頭。
「豪邁呢D野妳識條春！」