那年由耶撚變成hehe，然後…: 第三章

「我明啦，我地係朋友，係咪？」
 
「咪就係，朋友既野唔洗講咁多架，你話我婆媽，你自己都係啦，屎忽鬼。」
 
或者我只能以開玩笑的方式把我們之間的關係維持在朋友階段。
 
那時我天真以為，我們仍然可以跟以前一樣，不知道原來我的逃避，慢慢把我們的關係推向滅亡。
 
**************************************
 




「喂，聽日我收6點，一齊食飯呀？」某晚我致電阿峰。
 
「聽晚呀？聽晚約左人呀。」
 
「約左邊個呀？」我以為我們之間沒有秘密，不需要隱瞞什麼吧。
 
「約左教會班人呀。」
 
「下？冇返教會咁耐，做咩約佢地？」
 




「我想返番教會囉。」
 
我在回家的路上，停下來。
 
「點解？你之前話唔會再返，你玩野呀？」
 
「我返啫，你唔洗跟我返架啦。」
 
我講了一句拜就掛了電話，因為我知道他「我想返番教會囉」這句意思，是想跟我劃清界線。
 




回家後，我攤在床上，反覆思索著剛才阿峰說的話，我在想，cut了他線，是否向他道歉好呢。
 
這時我的sonyericsson發出收到sms的鈴聲，收到一段令我憤怒得想飛的士找李志峰打一身的sms：

「其實當初係我逼你返教會，後來我阿媽走左， 我好多謝你一直係身邊陪我支持我，我想感激你，我以為自己鐘意左你，仲講埋ｄ好on9既咩報仇，sorry，當時我亂咁講野，依家諗返起都覺得自己好傻，好對唔住神。亦都好對唔住你，你要做返你自己，god bless」

我握著電話，我該說什麼好？就以一句「上帝保佑」就結束嗎？
 
最後我沒有回覆他，無論我們之間是什麼關係，就到此為止罷。
 
**************************************
 
「嘿嘿！輝輝，恭喜你入到心儀大學喎，你好兄弟峰峰呢？」
 
這晚一行二十多人在一家酒家吃火鍋，席上都是7B的同學，女班長喝了幾罐啤酒，臉紅紅，說疊字，大概是醉了。




 
一向正經的女班長這樣放肆，也難怪她的。一向成績優異，今次卻名落孫山，只得副學士學位取錄。看見她這樣，似乎跟她把酒狂歡也算是一種安慰吧。
 
「女班長，你咪飲咁多啦。」阿峰從後拍拍女班長的肩膀。
 
「我飲好少咋，依家我都唔係女班長啦，放左學喇傻人！」
 
「你咪俾佢飲囉，呢度咁多人係度睇著佢。」這是自「分手短訊」以來第一次跟李志峰說話，我帶著晦氣，不直視他的雙眼。
 
「何文輝，你唔好咁自私啦，聽日我同女班長仲要返教會架，你自己唔洗返呢就……」
 
「咁又係，你地都唔好做啲神唔喜悅既野喇，飲咁多酒，罪孽好深呀。」
 
「我係有罪，我聽日會返教會，好過某啲人，明知自己有罪，仲一直遠離神。」
 




「哇，好笑喇，唔知邊個當時話要殺左神個老母……」
 
「何文輝！你唔好再講喇！」阿峰一手揪起我的衣領，這畫面似曾相識。
 
可是，我一手推開他，掏出錢包放下二百元，跟女班長說聲保重，慢慢步出酒樓。
 
而其他同學目睹這件事，只以為我們喝醉後吵架，而不知我們……分手了。