那年由耶撚變成hehe，然後…: 前言 - 那年由耶撚變成hehe

中學時，我跟死黨阿峰friend過打band，他帶我返教會，認識了耶穌，從此每日都過得心安、快樂。

直到高考前夕，某晚凌晨，阿峰哭著打電給我訴說，他的母親剛剛走了。

這段時間，我知道他難熬，晚上我會和幾個女同學到阿峰的家陪伴他。


「考埋英文痾佬就考完喇，諗下去邊到玩啦？」這晚，我覺得會出事，到了凌晨一時只有我還在阿峰的家。

「我覺得神係仆街黎，以後我唔會返教會。」從他的語氣，我看到悲憤。





「咪咁啦，每件事，都係神既安排，或者呢個係神俾你既考驗……」

話未說完，阿峰一手揪起我的衣領道：「神考驗世人就要整死人地老母，仲講咩愛世人？痴撚線！我去整死神個老母，然後話我愛神呀，咁得唔得？你答我，得唔得呀？」

這並不是第一次見阿峰憤怒得青筋暴現的臉容，我想他冷靜下來，所以依舊看著他不說話。

四目交投，空氣像停止流動，我看到他額頭上的汗珠流到臉頰上，不，那是眼淚？是汗水？

他鬆開我的衣領說：「SOR，我唔係想發你脾氣，我訓先啦，聽日唔返教會，你走啦。」





「我留係到啦，一陣你係20樓跳左落去點算？」

「痴線，我仲想報仇，點會咁快死？你同我定。」阿峰拭乾眼淚，嘴角輕輕上揚。

「下？你想搵Ｄ醫生報仇？伯母係肝癌走架喎……」好像講多錯多，我一臉疑惑看著他。

「中五果年，我識得一個人，開頭覺得佢好COOL，但識落覺得佢好低B。同佢一齊，我覺得好舒服自在，有時我對佢好惡咁發脾氣，佢都唔介意。我唔知咁樣係咪叫鐘意，因為，有條仆街唔鐘意世人搞同性戀，我信左呢條仆街，就催眠自己同何文輝只係兄弟、死黨。依家，我唔會再信呢條仆街，我……」

「喂，唔好講。」我最害怕的事情要發生了嗎？





我知道「能成為密友大概總帶著愛」，早在認識李志峰時我已經有這種感覺，他是特別的，尤其像我這種沒有男性朋友的男孩。

「得，唔講，如果你驚我跳落去，你今晚一定要留係度，我老豆聽朝先返。」

「得，你乜都唔好講，訓。」

「得，一齊訓？」

「得，一齊訓！」

墮入無盡深淵的輪迥，是離群的羊的下場嗎？