【突發】有個巴打PM我，話我聽佢死左。: 伍

睇黎pm我既人係呀鋒，又多左一樣証明。
先係死訊係真，
再黎係只有Sharon同佢兩個人知道既事係真。

至於呀朗……算啦，頭先搞到咁尷尬
反正証明到鋒哥pm講乜就夠。


「喂～呀妹！」身後突然傳來一把豪邁既女人聲！
我有種不祥既預感，諗住行快兩步閃人。





「喂妳咪走住啦！愈叫愈走！」突然有人上前拉住我書包。

唉冇估錯，係肥師奶，以及比佢拉住個仔，呀朗。


「噢……Hello……又見到妳。」我扮曬冇事咁打招呼。

「呀仔，呢個咪頭先讚你靚仔個妹妹仔囉！」
啊朗雖然黑黑實實，但睇黎有d怕羞咁望第二度。






冤枉呀大人！件事唔係你諗既咁架！


「喂，難得畢業咁高興，我幫你地影張合照啦！」
肥師奶強行迫個仔同我合照一張。
為免尷尬，我決定企係棵樹隔離。

所以幅相個構圖係：




我 / 樹 / 呀朗


「呀仔！我地要send返幅相比人架！禮貌！」

「咳……咁妳手機係咩……我whatsapp返比你……」


咦？將錯就錯！


「拿，我電話。」唉，我都唔知開心定唔開心好。
唯有等今晚pm鋒哥柄佢一鑊，完全係比人跣既感覺。






「講唔該啦，呀仔！」

「唔該……」


於是我當晚就whatsapp呀朗
為免佢繼續ff落去，以為我真係對佢有意思
我決定直截了當同佢講鋒哥既事。


「成件事就係上面寫既咁，唔信既，你可以睇下呢張Cap圖。我本人真係唔識佢，我亦唔係搞惡作劇既人。唔知你有冇頭緒呢？」

呀朗藍tick左，跟住在線上左成20分鐘
我估佢可能一時間嚇親，唔識比反應。






點知再隔左陣，佢直接打電話比我。

「喂，艾莉嘉，妳得唔得閒講兩句？」

「我Okay呀。」

「件事係真既，佢係有幫我地足球隊手設計件衫，而且件事得我地兩個知。」

「哦，咁即係真架啦……不過又會淨係得你地兩個知咁奇怪既？其他隊員冇問咩？」

「就係因為咁，我先至開始驚佢係因為我……」


又黎料？！




呢個反應咁似頭先Sharon個反應既？！


「其實件事係因為呀鋒有讀視覺藝術，佢對衣服設計個d都幾有天份。我同佢小學時期曾經係老死，但呀鋒運動唔好，中學之後我有足球隊班朋友，漸漸就冇理佢……」

「咁……呢d事都好常見姐？佢應該唔會因為咁……」

「你聽我講埋先……中六既時候，係我最後一年做隊長，我決定要整新隊tee比大家，我想班新仔都記得我。」呀朗深呼吸，繼續講，「於是我刻意接近呀鋒，仲同佢講當年唔理佢好對唔住，然後當呀鋒設計好件衫之後，我偷偷地同隊員以及負責老師講係我設計既，亦開始以各種藉口疏遠呀鋒。其實我當初冇諗過佢會知道我冒認係原創人，只係班人都覺得件衫設計得好靚，覺得好驚訝我運動好既同時有藝術細胞，開始傳出去，令呀鋒都知道左……」

「所以佢嬲左你？」

「錯，啊鋒佢冇嬲我，反而仲同我講對唔住，問我係咪佢做錯左咩令我討厭佢。其實我唔係討厭佢，只係我利用左佢，諗住順便令新仔記住我，我從來都唔諗住傷害佢既。」

「咁點解你頭先話……？」





「因為我個日發脾氣鬧佢。我個日好驚佢會爆件事出去，加上比佢當面對質，我好淆好怯，個人好不知所措，我竟然突然燥起上黎……」



「你咁Q廢柴我唔想用你個名影衰我呀！你唔好再痴埋黎我度添啊！」



「其實我只係一時火遮眼先先衝口而出，我冇諗過佢會記係心度。我之後都有想同佢道歉，但次次最後都係擺唔低尊嚴，錯過左……」