中三那年忘不了的三個月: 34

「啦，相機比你先，我去整整野食先，你自己睇住先。」說罷佢將部相機交左比我，之後佢走左去廚房整左啲野食。 

我就慢慢緊部相機，睇下本莉影既貓貓相，咁我好快說睇完貓貓相，咁我就當然順勢慢慢睇埋其他相啦。咁就有之前我同本莉係忠烈祠一齊影既相，我ZOOM大左自己個樣，發現自己真係成個傻仔咁，睇完我個樣，當然睇本莉個樣啦，真係百看不厭。 

本莉係廚房走左出黎問我﹕「喂，孖撚，我煮左啲烏冬，你食唔食呀??」 

「好呀，洗唔洗幫手呀??」 

「唔洗啦，你慢慢睇相啦!!」說罷佢又入返廚房。我係到諗﹕一個女仔，脾氣又好，入得廚房出得廳堂，真係夫復何求呀!!!!!! 





但係我又衰細膽，我地粗粗先識左2個月，好似又發展得太快，我驚我表白之後衰左，連FRD都冇得做，就要扮到陌生人咁去面對埋高中，真係如果係過來人一定明白我講乜。所以我都係等到時機成熟先再出手。 

如是者本莉好快煮完烏冬，我就入去幫佢手拎碗野出黎，咁我地就一邊講下貓貓，一邊食。姐唔多就食完個陣，零姐冇啦啦行左出黎，望住我同本莉碗烏冬講﹕「你好野本莉，重色輕友，有野食都唔叫我，哼!!!」之後佢就好似啲大小姐咁走返入房到。 

我呆左咁樣望住本莉，本莉似乎知我諗咩，說講﹕「佢扮下野既姐，唔洗擔心啵!」 

跟住我就拿拿淋食埋碗麵就諗住走人，廢事零姐又唔知痴乜線。我幫本莉洗埋碗，之後諗住走人個時，本莉突然拖住我隻手，個樣好似唔願我走。 

我就扮傻問下佢﹕「做咩呀....你唔開心呀??」 





佢就好似有野卡住係喉嚨到，張開了口，卻說不出話來。 

我就握緊本莉隻手，好溫柔同佢講﹕「有咩心事，講出來。」 

但係我點都估唔到，佢竟然喊，眼淚好快就由眼框流出來，佢用另一隻手揞住口，我見到佢突然咁樣我真係比佢嚇一跳。 

我即刻去返廳拎張紙巾幫佢拭去眼淚，佢講﹕ 

「唔好意思呀...我控制唔到我既情緒...對唔住．..」說罷佢就收返起眼淚，但係個樣仲係一面憂愁。 





我就繼續問佢﹕「有咩心事，唔怕講。」 

佢用疲憊而帶有紅絲的眼睛望住我，又想講野，又講唔出口。最後佢講左句﹕「算啦，冇野啦，我攰啦，你比我休息下。」 

我握緊佢隻手問佢﹕「真係冇野?唔好死頂...」 

本莉點點頭回應我佢冇事。 

「咁你早啲休息啦，記得有咩事即刻搵我，我盡量幫你。」 

本莉亦沒把話說出來，只是微微點頭回應。 

「咁我呢加走啦，拜拜。」說罷我就把手放開，轉身往門口走。在關上門的一刻，我見到本莉又默默地落淚。但她明顯有心事不想告訴我，所以我沒有再加以理會，只好讓她冷一冷靜。 

我返到自己間房到，見到阿泰，瘦陳同阿峰又玩棒球，阿泰一見到我就講﹕「喂，孖撚，一齊玩啦。」 





但係頭先見到本莉咁樣，我都冇心情玩，就同阿泰講﹕「我唔係幾舒服，我想訓先。」說罷我就冇將任何既聲音放在耳內，我腦海不斷浮現本莉喊既情景，呢個情景，一直困擾，直到我熟睡後。