中三那年忘不了的三個月: 28

不消一會兒，我就見到本莉係收銀處比緊錢，準備出黎，但係我又冇注意到佢買左啲咩神秘野。 

咁佢出到黎，我眼甘甘望住本莉，佢一邊行過黎又一邊望住我。我就緊定升降機等佢，佢行到過黎同我講﹕「你做乜眼甘甘望住我呀??」 

「我...覺得你好似一個人，所以望得太入神。」我有點唔好意思咁講。 

佢個樣出現左一瞬疑惑既表情，講﹕「咁我似邊個呀??」 

我呆左呆，我腦海又浮現出欣恩既樣，我突然又沉醉係個三小時既回憶入面。 





可能本莉見到我遲遲未答佢，佢就露出道歉既樣講﹕「唔好意思呀，係唔係唔講得呀。」 

比本莉講左句，我又從回憶中醒返。我呆左呆，先答﹕「唔係...你好似我一個舊情人....但又唔可以用情人黎形容，唉好難解釋，總之你真好好似樣。」 

「係呀，咁佢靚唔靚女家?」本莉笑住口問我。 

本莉呢條問題真係問黎都多餘，唔通我話唔靚咩，不過我真係好似頂心杉咁，同佢講﹕ 

「唔係呀，佢就大肥婆黎既，又醜樣，又多暗倉，真係幾似你!!」 





當然呢個係玩笑啦，其實本莉同欣恩一樣，都係咁可愛，咁純真。 

不過佢好似當左我講既野係真，耳仔都紅哂，又露出一副扮哂嬲既表情，指住我講﹕ 

「哼，你好野，唔理你了。哼。」 

「喂喂，講笑咋，你唔係咁認真呀...」我扮到楚楚可憐咁款同佢講。 

但係佢又真係唔理我，入到電梯之後我全程望住佢側臉，因為佢一直擰轉個頭，唔比我望到佢正面。 





如是者去到12樓，升降機發出「叮」既一聲，對門又徐徐打開。佢又急急腳就出就去，我就跟住係佢後面。 

佢企左係屋門前面按門鐘，等零姐幫佢開門。我都做同樣既野，等入面個3條友幫我開門。 

如是者零姐好快就幫佢開門，佢入再後之後，當然第一時間閂門啦。我就係佢閂門最後一刻頂住左對門，令到露出左一個空隙，好讓我同本莉講﹕ 

「GOOD NIGHT。」 

不過我以為佢嬲左我就唔會答返我，點答佢開返對門，笑笑口同我一邊揮手一邊講﹕ 

「你都係呀，GOOD NIGHT。」之後佢就怕怕羞羞咁閂左門。 


我心入裡突然覺得好幸福........