中三那年忘不了的三個月: 26

好閒話講完，飯又食完，咁我地就行程去台北101大樓同誠品書店。 

咁我地上左旅遊巴士之後，我就冇乜同阿達阿義講野。我就留心望住窗外既風景。 

***如果你黎過台灣，你留心下街邊最多既係咩，有人估中我賜酒。*** 

如是者好快黎到101大樓同誠品書店，咁周SIR就講﹕「好，呢加就1:40分，咁我地就係到行到4點左右，係返呢到集合。」 

101大樓真係好高，不過入面賣既野好多都唔岩年輕人，全部都係來佬貨，遊客可以行既地方得7層，最低層係賣美食，基本上你唔係有錢人，101既野基本上你買唔起。 





所以我轉左去行誠品書店，101同誠品書店其實都係差一條街左右，而且街上我仲好記得有一個自行租用單車既設施，我覺得幾有趣，所以都有啲印象。 

全程我就好似獨行俠咁，獨自走去誠品書店。我入到去遊走左一圈，我只能夠說，旗艦店不槐是旗艦店，咩種類既書都有，雜誌，圖集，寫真，好多古靈精怪既書。 

而我咁岩見到有間CAFE，咁我就冇乜野做，我就去左叫左杯Cappuccino，我係台灣做得最多既野就係係咁飲咖啡，而且我從此愛上咖啡呢樣野。 


我就飲左杯咖啡，呆下呆下HEA到4點等集隊。 

如是者到左4點，我離開左間CAFE，慢慢步行到集隊既地方。周SIR就講﹕「接下來大家都應該好累，咁我地呢加返去酒店到食晚飯。等大家有個好既休息。」 





之後我發現阿達阿義大抽細抽咁行埋黎集隊，我就問﹕「嘩你兩條友買咩黎，買到大包細包咁。」 

阿達就講﹕「啦你自己睇下。」說罷我就往佢個袋到望下， 

 

我心諗﹕「咪又係爆谷，但係個外型又幾特別下啵。」 

阿達又講﹕「你試下呢個原味，頭先我同阿義食左一半，真係好正。」 





說罷我就隨手拎左粒放入口，個味道我只能夠說﹕「屌你正呀喂!!」 

「正呀呢，頭先我買左好多種味。朱古力呀，焦糖，今晚返房慢慢食!!!」 

「個價錢幾錢到呀。」我一邊講，一邊再拎多粒食。 

「台幣一桶就120，對返港幣就30蚊左右啦。」阿達拍打著個袋咁樣講。 

我心裡暗罵左自己一句﹕頭先做乜HEA下HEA下呢.......浪費哂時間。 

「咁阿義你買左啲咩呀??」我將目光轉移到去阿義袋到。 

說罷佢從袋中拎左一本漫畫書出黎，講﹕ 





「嘿嘿，龍珠第30集去到34集，已經比我買哂。」佢講完之後一邊邪笑，一邊收返埋本漫畫落個袋到。不過阿義係一個頂級龍珠迷，我諗佢已經中哂毒。 

如是者我地就上左車，去返酒店，個陣時己經6:00左右，所以食埋個晚飯都係7點多少少，周SIR就講﹕「啦，咁我就比2個鐘頭你地自由活動下，但係唔好走太遠，係酒店附近行下就好啦。我地會係11點CHECK房，如果我地發現有人11點打後唔係間房到。我地會有兩個選擇比你地，第一就係第二日全程跟住我，第二就全日留係酒店既保安房到。收唔收到??」