異塵餘生香港2277: 77 無辜的兇手

沿著龜裂的混凝土道路，在已經褪色變形了的路牌指引下，流主他們駕駛著U記贈送的裝甲車來到久違了的欣澳。
 
他們把坐駕停在村外，便鬆容不迫下車。
 
「老細你好呀！」一個男子笑容滿面，熱情地招待流主他們
 
流主回頭看看，發現原來是那個早前替他們介紹欣澳的乞丐：「啊，又係你呀。」
 
「咦喂！又係你呀！乜咁錯蕩呀！」乞丐笑說
 




流主問：「欣澳近排好嗎？有無咩大事發生呀？」
 
「．．．．．．」乞丐沒有說話，只是向流主打開手掌
 
「．．．咁睇嚟都無咩變化。」流主苦笑說，然後給了乞丐一塊硬幣
 
乞丐接過硬幣笑說：「都係全靠哥仔你當初關照大家啫！宜家欣澳嘅疫病又好左，醫院又可以繼續用，仲有一班食屍鬼守衛保護大家，真係一次過滿足晒三個願望呀！」
 
「咁就好啦。」流主說
 




「不過．．．」乞丐突然收起笑容，一臉凝重說
 
「不過？」流主也馬上凝重起來
 
「．．．．．．」乞丐沒有說話，但又再打開手掌
 
這時，孖根一語不發走過去，在乞丐的手上放下一個破片手榴彈．．．
 
「哇！！！乜乜乜咁大整蠱呀！！」乞丐頓時嚇得面如死灰，但仍然逞強：「我我我係唔會向強權屈服架！！」
 




「流主，發生咩事呀？有無嘢要幫手？？」好奇的豆也忍不住下車走向他們
 
乞丐看到身形龐大魁梧的豆，口齒突然變得伶俐：「其實阿主哥你唔响樹依段日子呢，出現左幾宗人類謀殺食屍鬼嘅案件．．．宜家大部份食屍鬼同人類都水火不容，一邊就話對方恩將仇報，另一邊就話對方執行私刑．．．」
 
流主不解：「謀殺！？執行私刑！？．．．到底發生左咩事？」
 
乞丐看看手上的手榴彈，再看看豆，無可奈何說：「事情就係有幾個欣澳嘅人類居民殺左幾個食屍鬼守衛，令到啲食屍鬼非常咁憤怒．．．由於謀殺事件一而再再而三咁發生，搞到兩邊啲關係愈嚟愈差．．．無耐之前啲守衛仲當眾毆打一個謀殺食屍鬼嘅女疑犯添呀。」
 
「竟然有啲咁嘅事．．．」流主一臉憂心：「我地即刻去搵搵村長先。」
 
「喂喂喂！！咁個手榴彈點呀．．．」乞丐緊張問道
 
流主笑說：「個保險制又無拉開．．．其實你唔使驚喎．．．」
 
「咦！係嘅咩！？」乞丐愣了一下




 
「個手榴彈送比你啦，都賣到下錢嘅。」流主說
 
乞丐大喜：「都話阿主哥你好人架啦！謝主隆恩！！」
 
流主沒好氣笑說：「好啦好啦．．．係咁啦．．．」說畢，他們一行人便離開了
 
 
為了了解事情的來龍去脈，流主他們來到了村長程天打理的旅館。誰料他們剛推門進去，待在櫃台前的程天見著便馬上歡喜若狂。
 
 
「哎呀！你地返嚟就真係太好啦！」程天十分高興，然後向身旁的老婆婆介紹說：「依個後生仔就係嗰陣幫左我地欣澳嘅流主啦！」
 
老婆婆頓時激動起來：「你一定要救我個女呀！！」
 




「婆婆，有事慢慢講．．．」流主扶著老婆婆說：「你個女發生左咩事？」
 
「啲食屍鬼守衛話我個女殺左佢地啲人呀！但係我個女成世都未掂過槍．．．又點可能殺死佢地啲守衛呀．．．我個女一定係比人冤枉架．．．」老婆婆哭訴
 
「咁妳個女宜家喺邊呀？」流主問
 
程天搭話：「守衛將所有犯罪嘅人都捉晒去鄉土收監．．．你地要盡快過去．．．一旦發哥證明唔到婆婆個女係無辜，佢地就會將佢處決架啦．．．」
 
 
因為事態緊急，流主他們也不作拖延，馬上駕車向鄉土出發，不消片刻，他們便來到鄉土的城門前。由於鄉土與欣澳仍然處於同盟關係，往來兩地之間的道路也有一些守衛駐守，因此城門現在是長期打開，城門守衛也沒有查問流主他們的意圖，只要求他把車停泊在城門外。
 
下車後，流主他們沿路慢慢步行，不難發現與欣澳結盟後，這裡的建築都有比以往更好的修葺，而且在穩定的水電供應下，居民的生活質素也有著顯著的提升。
 
數分鐘的步行，他們來到了鄉土的城堡，在守衛引領下晉見食屍鬼之父。
 




 
「老豆。」孖根點一點頭說
 
「一段時間無見，今次為咩事返嚟？」食屍鬼之父鬆容問道
 
經過上次來鄉土時的教訓，這次流主決定先保持沉默，由孖根代言。
 
孖根說：「我地想了解一下謀殺食屍鬼依件事。」
 
食屍鬼之父依舊用火柴點起一口香煙，說：「咁直接明確進入主題，睇嚟係欣澳嘅居民拜託妳地嚟。」
 
孖根也不否認：「無錯。」
 
食屍鬼之父呼了一口煙問：「妳地知道啲咩？」
 




孖根說：「有人類殺左食屍鬼守衛，然後比你地拉左。」
 
「嗯，成件事就係咁。」食屍鬼之父點一點頭說
 
「．．．咁你地查到啲咩？」孖根問
 
這時，一把男人的聲音插話說：「睇嚟妳宜家信人類都唔信鄉土嘅兄弟姊妹。」
 
孖根當然知道這是誰人的聲音：「．．．發哥。」孖根續說：「我信嘅係自己。」
 
發哥說：「鄉土同欣澳結盟之後，已經出現左幾次人類謀殺我地啲兄弟姊妹嘅案件。而最近一次係一個人類女人殺左我地幾個守衛。當然，我地已經拘捕左佢。」
 
孖根回頭看著流主，流主則默默點一點頭，然後孖根續說：「我地想見下個疑犯。」
 
發哥回頭問食屍鬼之父：「老豆，可唔可以？」
 
食屍鬼之父冷道：「隨你地鍾意，但係記住，如果你地無辦法證明佢係無辜，我地就會將佢處決。」
 
 
於是，流主他們便跟著發哥來到監禁囚犯的城堡地牢。這裡雖然燈火通明，但是卻空無一物，只有被鐵鍊綁著雙腳的女疑犯無助地坐在地上哭泣．．．相信她便是那個老婆婆的女兒．．．
 
 
豈料，她一看到發哥便激動起來：「發哥！我無辜架！！佢地真係唔係我殺架！！真係唔關我事架！」
 
流主上前說：「妳放心，我地係嚟幫妳嘅。」
 
女人茫然問：「你地係．．．？」
 
流主說：「我係流主，係妳阿媽叫我地嚟嘅，妳詳細話我知究竟發生左咩事啦。」
 
女人憶述：「．．．嗰日大概係黃昏時間，我沿路由市集離開返緊屋企．．．途經擺放建築材料嘅貨倉，聽到有人喺入面爭執緊，我咪入去睇下發生咩事．．．點知我就睇到幾個食屍鬼守衛好驚咁四圍望．．．仲不時舉起槍想開槍．．．但係，我睇嚟睇去．．．成個貨倉除左佢地，根本就無其他人．．．」
 
流主仔細聆聽著：「．．．然後呢？」
 
女人吞了吞口水續說：「然後突然有人唔知喺邊度開槍．．．幾個食屍鬼守衛就續個比人射死．．．我當時好驚好驚．．．即刻拎轉面想走，點知個貨倉大門突然間自己閂左．．．我嚇到跌左喺地下．．．然後咁啱地下有一支手槍，我就即刻執起身自衛．．．之後其他食屍鬼守衛就衝入嚟．．．我就變左殺人犯．．．」