異塵餘生香港2277: 76 新仇舊賬

經歷一番苦戰，流主他們總算成功擊倒死亡爪首領，而身受重傷的他們，也接受了汪的提議，跟他們到青衣城。
 
由於流主他們停泊在山丘上的坐駕已經被死亡爪破壞得體無完膚，進行了一些應急的急救包紮後，他們便乘坐U記的裝甲車向青衣城出發。幸好他們距離青衣城並不算遙遠，天黑前總算趕到目的地。
 
流主他們在U記成員的扶持下慢慢下車，數個青衣城的守衛立即走上前．．．
 
 
守衛緊張問道：「U記？？你地．．．咁多人嚟有咩事？」
 
汪接著下車上前說：「我幾位朋友受左傷，希望嚟搵醫生啫。」




 
守衛看了一看說：「．．．你地咁多人．．．我地唔可以就咁樣比你地入去．．．」
 
汪點起香煙說：「咁淨係我同我幾位朋友入去，其他人就喺城外面等，咁樣你會唔會舒服啲？」
 
守衛為難說：「但係．．．」
 
「流主！？」這時，一個老人從遠處跑過來
 
「他伯．．．！」流主一眼便把他認出來




 
「好耐無見啦！身體好嗎．．．．．．」他伯打量了一下流主滿身的繃帶瘀傷，續愕然問：「你搞咩搞到得返半條命咁呀？？」
 
流主苦笑說：「一匹布咁長．．．」
 
「快啲叫人嚟帶佢地入去商場嘅醫療室！」他伯馬上命令守衛
 
「係！」守衛立即調派人手
 
汪把煙蒂掉在地上說：「咁之後嘅嘢就交比你地啦，佢地嘅醫療費用你到時聯絡我地Ultimate Unit嘅人收啦。」




 
「你係U記嘅人？．．．你做咩要幫流主？」他伯語氣並不友善
 
汪笑說：「我係Ultimate Unit嘅老闆，我同流主有啲生意來往，宜家只係找返條數比佢啫。」
 
他伯諷刺說：「哼！你地依啲收錢殺人嘅人都信得過嘅咩！」
 
汪說：「點話點好啦，老實唔呃你，依啲全部都只不過係生意，無感情牽涉嘅。」
 
「．．．流主佢地嘅醫療費用我地青衣城會負責，唔使你咁好心！」他伯對早前阿麥被追殺的事依然懷恨在心
 
「隨便你啦，數我就預左出嚟架啦，你想收嘅時候就聯絡我地啦。」汪說著，便轉身隨手下一同離開
 
 
然後，流主他們在青衣城接受了一晚的治療，身體狀況總算回復得七七八八。




 
 
「流主！你無事就太好啦！」緊張得淚眼汪汪的維琪說
 
 
接受治療後，流主他們都在醫療室中休息。不過，還需要包紮得滿身繃帶的就只有流主和阿寶，孖根和豆的傷勢很輕易便痊癒了，而鎖匙萱和狗肉倒是沒有受到太嚴重的傷害。
 
 
他伯汗顏說：「孖根已經將成件事話晒比我知．．．你地真係好嘢．．．」
 
流主摸摸頭笑說：「唔好咁講．．．．．．你地呢？青衣城宜家點呀？」
 
「多得你嗰陣嘅幫忙，輻射洩漏嘅問題已經解決左啦。宜家青衣城由我同維琪一齊打理。」他伯說
 
「咁就太好啦。」流主大感欣慰




 
「都係多得維琪，佢數口好叻，諗嘢又清晰。青衣城可以發展得好，佢佔好大功勞。」他伯笑說
 
維琪害羞得滿臉通紅．．．
 
他伯續說：「聽講正勢力諗住向政府軍開戰，你地宜家四圍去說服各方勢力加入你地．．．係真架？」
 
流主點頭說：「係呀，所以我地都唔方便留太耐．．．我地都要趕路去鄉土。」
 
維琪失望地說：「咁快又要走．．．」
 
流主微笑說：「事情解決晒之後，我一定會返嚟探妳地。」
 
維琪誠懇地說：「無論你係咩嘢立場，我地青衣城都一定會盡力幫你！」
 




阿寶搭話說：「流主係黃金小子，當然係企喺正勢力嗰邊啦。」
 
「呃．．．嗯。」流主有點結巴起來
 
他伯說：「總之你開句聲，我地青衣城一定撐你！」
 
 
流主他們並沒有在青衣城逗留太久，傷勢即使並未痊癒，他們也已經急不及待出發了。而意料之外，輕型貨車被摧毀了的他們萬萬沒想到，汪居然給他們留下了一輛裝甲車，流主他們當然樂意收下好意。在購買了一些補給後，他們便駕車向欣澳出發。
 
 
．．．．．．．．．
 
 
「我真係無做過呀！唔係我殺佢地架！！」一個被數個食屍鬼守衛押在地上的女人哭喊著
 




一個食屍鬼守衛恕喝：「現場就得妳同佢地，妳當時亦揸住用嚟行兇嘅手槍，妳仲想狡辯！？」
 
「真係唔關我事架！我只係出於自衛先執起把槍架咋！！」女人解釋著
 
「自衛妳阿媽！當初我地幫妳地欣澳，宜家妳地就恩將仇報謀殺我地啲兄弟姊妹！就等我打撚死妳條八婆！！」食屍鬼怒不可遏，舉手便用警棍猛力揮下去
 
女人無力反抗，被打得頭破血流倒地！
 
「喂！你地有無過份啲呀！！」「咪係囉！查都未查就郁手！！」「守衛大撚晒呀！」圍觀的人類開始起哄
 
一眾食屍鬼守衛也都拔出警棍指嚇圍觀的人類：「你地再嘈就連你地都打埋呀！！」
 
「你地濫用私刑！！」圍觀的人類繼續指罵
 
「咁撚多嘢講！同我捉晒出嚟！」食屍鬼守衛大喝，他的同伴立即上前把叫罵的人類強行從人群中拉出來，可是圍觀的其他人類群眾也拉著同伴不放
 
「夠膽反抗！？」食屍鬼守衛勃然大怒，用警棍毆打反抗他們的人類
 
這時，一個食屍鬼突然上前放聲喝止：「停手！！！」
 
食屍鬼守衛知道是誰人喝住他們，便馬上停手：「發．．．發哥！」
 
豈料，發哥二話不說便揮拳打向食屍鬼守衛，把他打得跌在地上！食屍鬼守衛頓時茫然起來呆眼看著發哥．．．
 
發哥破口大罵：「邊個比你地喺度亂咁打人架？？」
 
食屍鬼守衛無奈說：「嗰條八婆謀殺我地啲兄弟姊妹呀！！」
 
「證據呢？」發哥反斥：「你地查清楚啦咩？？」
 
「我．．．」食屍鬼守衛無話反駁
 
發哥回頭對其他食屍鬼守衛下令：「帶個女疑犯去醫療室，其他人封鎖現場。」
 
「．．．係。」其他的食屍鬼守衛雖心有不甘，但仍然遵從命令
 
發哥續對圍觀起哄的人類說：「大家放心，我會仔細調查今次事件，如果個女人係無辜嘅，我一定會還佢清白。」
 
圍觀起哄的人類聞言也心服散去，只有一個年紀老邁的老婆婆，拉著發哥的衣袖，哭成淚人地說：「我個女一定唔會殺人架．．．佢連槍都未掂過．．．無可能會殺守衛架．．．」
 
發哥對著老婆婆說：「放心，我一定會還大家一個公道。」