異塵餘生香港2277: 68 機械人之亂
離開了Bitch Kingdom前往到九龍灣的流主他們，意外發現九龍灣正受襲擊！
孖根一如以往，氣勢旺盛，舉槍向迎面而來的數台守衛機械人開火。在孖根的天使.50槍下，移動速度緩慢的守衛機械人根本還未及作出反應便已經報銷。可是，孖根的攻擊即使再準確再快，也應付不了太多的敵人。在大量迎面襲來的擊光包圍下，她也只能被迫續步後退。
就在孖根節節敗退之時，破壞力驚人的豆突然加入戰團，以他的拳擊格鬥技瞬間把數台守衛機械人擊破！在豆裝備了加大碼動力拳套的奪命鐵拳下，這些機械人也只不過是玩具而已。然而，就在此時，在數台守衛機械人的後方，一台哨兵機械人以極高速度溜到豆的背後，並以它的雷射多管機槍對豆施以猛攻！豆一時間也只能轉身舉手擋格，雖然哨兵機械人的攻擊還未足以致命，但卻足夠讓豆無還擊之力！哨兵機械人見已經佔得上風，便打算乘勝追擊，高舉裝置在另一隻手上的飛彈發射器向豆瞄準！
即使豆是銅皮鐵骨的超級變種人，但要是被飛彈擊中，相信也必定重傷。然而，幸運地，飛彈還未發射，哨兵機械人卻突然停止運作．．．只見阿寶一手持著電漿手槍，另一手拿著一把螺絲起子，鬆容不迫地從哨兵機械人的身後步出來，而他的背後也已經躺住了數台停止了運作的機械人。解救豆後，阿寶便迅速跑到另一台機械人的後背並嘗試將其關掉。可是，要關閉一台機械人，再快也至少需要數秒時間，就在阿寶關上了另一台機械人的同時，數束激光剛好打在他的身旁！
僥倖沒有被擊中的阿寶回頭只見一台守衛機械人正對他攻擊，不過它還未及擊中阿寶，便已經被使用小太刀星辰的鎖匙萱一分為二！能夠輕易剖開動力裝甲的小太刀星辰在鎖匙萱敏捷的身手配合下，其威脅程度更上一層樓！她踏著滾軸溜冰鞋遊走於數台機械人之中，勢如破竹地把它們的首級統統砍下！
「．．．鎖匙萱．．．．．．」
這時，一把聲音突然從後傳到鎖匙萱耳邊！鎖匙萱嚇得猛地回頭，卻發現只不過是一台便利先生。可是．．．它卻隱約散發著一股奇怪的氣息．．．
不過，這台便利先生明顯並不仁慈，也不是站在鎖匙萱的一方，它趁鎖匙萱愣住了的一剎那用它觸手上的圓鋸狠狠地向她砍下去！！幸好再一次被遺忘了的狗肉又再及時出現，一口咬住了便利先生的觸手，然後一顆以接近光速飛馳的2mm子彈，乾淨俐落地把便利先生貫穿了。
「鎖匙萱！妳無事呀嗎？」流主跑過來說
「無．．．無事．．．」鎖匙萱有點茫然
雖然機械人的數量不少，但流主他們也非等閒之輩，片刻的驚險戰鬥，總算暫時把現場的機械人都處理了。
「原來係你地呀！！」一個男人看到情況受到了控制，便馬上從其中一個小屋走出來：「今次真係唔知點報答你地啦．．．啲機械人發晒癲見人就殺！你知啦，我地科學嘢就叻啫，戰鬥嘅嘢我地識條鐵咩．．．呀點知就喺啲機械人殺呀殺嘅時候，唔知邊度突然整個超級變種人出嚟．．．我心諗，呢舖玩完啦．．．十死無生啦．．．但係原來．．．」
「依條友好煩喎．．．」阿寶不勝其煩說
孖根說：「佢係電子民，九龍灣嘅居民。」
流主上前打斷電子民的說話：「究竟依度發生左咩事？？」
電子民搖搖頭說：「唉，講起真係一匹布咁長．．．」
「講重點得架啦。」流主說
「啊，又得呀。」電子民續說：「成件事就係咁嘅，你走左無幾耐之後，我地咪拉大隊去地下排污設施搞掂埋啲變種蛇嘅手尾囉。成壇嘢都好順利架！咁搞掂晒，我地咪順手執啲變種蛇返去，攞嚟食又好，攞嚟浸酒又好，咩都好啦。咁嗰陣其實都無咩奇怪嘢發生，嗰晚我地仲不知幾過癮，又飲酒又食蛇羹．．．到左第二日啦，我同幾個朋友食完早餐，咁啱就有人經過九龍灣，想話買部機械人，咁我地緊係嗱嗱聲帶佢去車廠嗰邊睇貨啦。呀點鬼知條磨碌又話無咩錢又剩，問我地可唔可以平啲賣部二手嘅比佢，唉咁你知我地九龍灣以客為本架嘛，二手咪二手囉有咩所謂。咁我地就帶佢去睇早一日用完嗰啲機械人囉，見又未維修又未清潔，夠晒二手啦掛？咁我地同佢揀呀揀，條粉皮又依樣又嗰樣，又話殘得滯但係又要嫌貴．．．好彩，最後佢都揀啱部守衛機械人，咁我就循例開著比佢試下啦，點鬼知部守衛機械人一著左就一槍打瓜左件蛋散．．．我地幾個即刻呆左企左喺度，都唔知應該比咩反應佢。不過我就醒目呀，即刻熄鬼左部機械人先。之後就續部機械人檢查啦．．．呀但係啲線路呀剩呀嗰啲又無問題喎，咁我又開返部機械人，點知佢又係咁，即刻就發癲向我地開槍，我地嚇得鼻哥窿都無肉。但係咁我就即刻知咩事呀，唔使審，肯定係程式出錯啦。之後好彩我又反應快呀，撬開佢背脊個控制板，一鳩剪鬼斷佢條電源線，咁先至無事咋。不過雖然話無事，但係咁落去始終都唔掂架嘛，我地估呀，唔知會唔會係比啲變種蛇整壞左呀．．．但係又無可能呀，變種蛇又點搞得到啲程式，牛頭都唔搭馬嘴係咪先？不過我地唔理啦，順手入去車廠，諗住抽樣試下啲機械人啦。哇點知呀，一入到去呀，原來啲機械人全部都著撚晒，仲係咁向我地開火！我地咪係咁跑係咁跑，呀仆街班機械人竟然好死唔死追埋出嚟見人就殺見人就打！之後我地咪唯有匿埋先囉．．．好彩你地嚟得合時，如果唔係呀，我都唔知仲要匿多幾多日呀陰公．．．大佬你都知啦，困喺間屋度咁多日，有嘢食都死啦．．．你話係唔係先？仲有呀．．．」
「得架啦，明白晒，非常感謝你嘅幫忙。」流主終於撐不下去了
電子民笑說：「唏唔好咁講．．．不過今次又要麻煩你啦，你知我地無左啲機械人真係唔掂架．．．都唔知今年咩事．．．咁鬼死黑仔！你知唔知呀，無耐之前呀，我先．．．」
「之後嘅嘢交比我地得架啦，你快啲去睇下其他居民有無嘢要你幫手。」流主說
「咁好啦，你地都小心啲呀，啲機械人唔係人咁品架，特別佢地宜家好似連左線．．．」電子民還未說完，流主便離開了
除了流主和豆外，其他人甚至是狗肉也早已經吃不消，走到遠處回避．．．
阿寶看到流主和豆回來便問：「究竟依度發生咩事？」
流主把電子民的說話簡化：「機械人暴走。」
鎖匙萱讚嘆：「你地好勁勁呀，可以頂到咁耐耐。」
流主無奈說：「仲好講，你地無義氣．．．」
孖根說：「我都係唔想殺人啫。」
豆卻笑說：「都唔係咁差啫．．．佢講到好似講故仔咁，幾有趣呀．．．」
阿寶說：「咁咪証明你係痴線個囉。」
「．．．係嘅咩？」豆摸著頭說
「緊係．．．」阿寶沒好氣說：「唉無嘢啦。」