異塵餘生香港2277: 67 鬧翻

來到了Bitch Kingdom的流主得知原來一眾BK都因為生理需要未能滿足而士氣低下，於是流主便遊說女皇尋找九龍灣協助，豈料，兩人卻竟然吵起上來．．．
 
 
流主嘆了口氣說：「咁妳地Bitch Kingdom都虐待過唔少男人啫，成個香港廢土都憎妳地，咁樣好咩？依啲就係妳地想要嘅嘢？Bitch Kingdom唔係為左保護女性而存在嘅咩？」
 
女皇冷笑道：「嘿，我地Bitch Kingdom係為左虐待男人而存在，為左報復你地啲男人而存在。比你地啲男人知道你地根本只有做奴隸嘅價值！」
 
流主沉著氣說：「其實講到尾，妳地都係想男人對妳地好啲，先捉佢地做奴隸，迫佢地好好咁服侍妳地同愛惜妳地啫．．．但係妳自己都知，妳地愈係咁，就只會愈憤怒，自己就愈痛苦．．．然後變成惡性循環．．．」
 
「唔係喎！」女皇自暴自棄說：「我地Bitch Kingdom係最惡毒最無良心嘅一班賤女人，虐待你地我地不知幾咁痛快！我地Bitch Kingdom先唔希罕你地啲臭男人對我地好呀！！」




 
流主眉頭皺起，不耐煩說：「妳又何必係都要口是心非喺度死撐啫！」
 
「你話我死撐！？」女皇憤怒喝道
 
流主續解釋：「妳話覺得鬱悶空虛，其實就係因為妳地缺乏左愛！妳地想受到重視、受到尊重、受到寵愛、得到珍惜，先會捉人做奴隸迫佢地愛妳！！妳地只係因為渴望同怨恨而扭曲左，以為解決性慾就係適當嘅慰藉．．．」
 
「你收聲！！」女皇氣得面紅耳熱，大聲喝住流主
 
 




由於女皇高聲大喝驚動了房外的守衛，十數個BK馬上破門進來！
 
 
安祖蓮大為緊張：「發生咩事呀女皇！？」
 
不過流主並無理會，續鏗鏘說道：「女皇，如果妳唔肯面對妳心入面真正嘅自己，妳就永遠都得唔到真正嘅快樂！」
 
「我唔使你教！！你唔好以為當初我放過你，施捨一個機會比你去服侍我就喺度自以為是！你只係一個稍為高級少少嘅奴隸咋！你．．．你只係路邊一堆踩到都覺得整污糟我對鞋嘅屎咋！！」女皇怒不可遏得眼泛淚光
 
「妳唔好咁野蠻得唔得呀！？」流主也動起肝火來




 
「我野蠻！！？」女皇大喝：「守衛！！！」
 
 
女皇一聲喝令，在場的守衛也立即舉槍指著流主！即使是安祖蓮和安祖娜也不敢抗命，無奈地對流主拔槍相向．．．
 
 
「你再講，我就殺左你！！」女皇喝罵
 
「．．．咁妳殺左我。」流主說
 
女皇憤怒得咬牙切齒．．．說話已經放在嘴裡邊，但卻偏偏說不出口．．．
 
流主失望地搖頭說：「我重視妳，先拎個心出嚟，希望可以幫到妳解決煩惱．．．而妳就話我係屎．．．」
 




「我．．．．．．」女皇看著流主那失望又傷心的表情，心裡不禁劇烈地抽痛著．．．對自己衝口而出的說話大感後悔．．．
 
流主無奈地看著女皇哽咽說：「妳係我見過最差嘅女人！」
 
 
流主的說話就如狙擊槍般瞬間打穿了女皇的心，同時又像一個小型核爆般在她的內心深處翻起了巨浪，顛覆了女皇的感情，摧毀了她的意志，在她的胸口掏出了一個大洞．．．
 
 
「你走呀！！！我唔要再見到你呀！！！！」
 
 
女皇用盡力氣，聲嘶力竭地喝走流主．．．然後一陣酸酸的感覺隨即從喉嚨猛然湧至眼底．．．她的淚腺失控，眼簾也告缺堤．．．淚水一息間如瀑布傾倒．．．．．．看著流主黯然地轉身離去，女皇也乏力跌跪在地上．．．哇哇痛哭．．．．．．
 
 
「事情就係咁啦。」流主側著臉看著車窗外的景色說




 
其他人一時間也不知道應該說甚麼．．．
 
鎖匙萱一臉沒趣地說：「所以主主根本無同女皇做過啲咩？」
 
阿寶立刻用力拍打鎖匙萱的腦袋：「頂妳講嘢識唔識揀時候架！」
 
鎖匙萱無奈說：「我諗住搞下笑笑啫．．．」
 
阿寶不耐煩說：「搞笑笑唔係依啲時候囉！」
 
「．．．係嘅咩？」鎖匙萱摸著頭說
 
坐在前座的孖根說：「流主。」
 




「我無問題，放心。」流主強顏歡笑說
 
孖根說：「咁你唔好側住個頭好似好唏噓咁望風景．．．好好地睇住條路揸車。」
 
「呃．．．對唔住．．．」正在駕駛的流主無奈說
 
鎖匙萱問：「咁我地宜家點好呀？Bitch Kingdom又唔肯肯幫我地．．．」
 
流主嘆氣：「都無辦法啦．．．我地唯有照原定計劃去招攬九龍灣啦。」
 
 
雖然出師不利，不小心與Bitch Kingdom鬧翻了，但計劃還是需要如期進行。於是流主他們便馬上出發，在晚上趕到九龍灣。然而，相距還有些許距離的他們，卻驚見城內火光四起、煙火不斷．．．看來九龍灣正發生著滿大規模的戰鬥！
 
 
鎖匙萱愕然：「點解會有火光嘅？唔通又係變種蛇？？」




 
「唔係掛．．．」孖根回想起蛇小姐，不禁心裡發寒．．．
 
 
流主他們把車停在城外，小心翼翼地走近牢牢關著的城門．．．
 
「道門開唔到．．．應該係有嘢喺後面頂住．．．」鎖匙萱嘗試開鎖
 
流主試著強行推門：「哇．．．完全推唔郁．．．」城門絲毫不動．．．
 
阿寶說：「豆，你咁鬼好力，你嚟試試。」
 
「好呀。」豆說
 
 
豆慢慢走到城門前，深呼吸了一口氣，然後使勁一拳轟向城門，整道城門隨即被他一拳轟飛！然而，此舉卻鬧起了極大的響聲，大量射燈強光隨即照向流主他們．．．
 
 
「豆豆你做咩呀．．．」鎖匙萱目瞪口呆
 
豆不解問：「．．．唔係開門咩？」
 
「開門都可以靜靜地咁開架嘛．．．宜家我地咪比全世界發現晒囉．．．」阿寶無奈說
 
「．．．係嘅咩？」豆摸著頭說
 
眾人異口同聲說：「緊係啦！！」
 
 
流主他們說著，大量激光、電光球和火球隨即向他們蜂擁而至！他們嚇得馬上各自躲到附近的掩護物後！
 
 
阿寶拔出電漿手槍不耐煩說：「使唔使咁重手呀大佬．．．」
 
「鎖匙萱睇唔睇到係咩人？」流主問
 
鎖匙萱小心地探頭看了一下：「．．．全部部都係機械人嚟．．．」
 
「機械人？？」流主疑惑：「啲居民呢？？」
 
鎖匙萱再探頭窺看：「．．．唔見有人，不過地上面係有死屍．．．唔肯肯定係咪居民．．．」
 
「佢地埋緊嚟啦！有決定未呀？」阿寶不耐煩問
 
流主拔出M72高斯步槍說：「唔好理咁多啦，破壞所有機械人，如果見到有活人，一定要問清楚發生咩事。」
 
 
眾人清楚任務便馬上出擊！！