異塵餘生香港2277: 34 超能力

來到了地下排污設施的流主他們，終於找到了變種蛇的源頭。然而，事情並不如他們想像中般簡單．．．
 
 
蛇小姐笑說：「蛇神將會為人類帶嚟死亡，為地球帶嚟重生。就算你地殺左我，都阻止唔到佢。」她說著，突然轉身瞪著流主他們續說：「更何況，你地根本對付唔到我！」
 
「．．．睇下點。」孖根說
 
 
孖根對自己神乎奇技的槍法甚有自信，可是，她這次失算了。就在孖根打算開火之時，蛇小姐的雙眼突然發出紅光！流主他們頓感一道無形的力量極速迎面撲至，一時間竟然全身不能動彈！！
 




 
流主大感驚訝：「咩．．．咩事！？點解．．．」
 
孖根也十分意外：「超．．．能力！？」
 
鎖匙萱說：「咩．．．真係有．．．超能力嘅咩！？」
 
「哈哈哈．．．」蛇小姐慢慢走近流主：「我幾欣賞你，有愛心又鍾意動物嘅男性係最有魅力。」
 
流主驚慌說：「妳．．．妳想點呀！？」




 
蛇小姐目露兇光，然後雙手抱著流主，把他的臉頰埋入自己的雙胸之中：「就由你開始！」
 
 
她頭上的蛇群開始活躍起來，牠們不斷伸展蠕動，在屏幕的光線下猶如不斷擴張的惡魔剪影，散發著讓人發麻的死亡氣息！
 
 
孖根不斷掙扎，但也擺脫不了蛇小姐的超能力：「仆街．．．妳快啲停手！！」
 
蛇小姐露出詭異的笑容：「哈哈哈．．．等我吸乾左佢之後就輪到妳！！」




 
抱著狗肉動彈不得的鎖匙萱也無可奈何：「流主！！」
 
 
蛇小姐頭上的小蛇已經如霧霾般籠罩了大半個控制室，一張張對著流主垂涎三尺的血盆大口，看來已經準備好隨時把他撕成碎片、撕皮拆骨！
 
 
「受死啦！！」蛇小姐大喝一聲，滿天蠕動著的小蛇立即統統向著流主撲去！
 
 
就在萬事休矣、塵埃落定的電光石火之間，一張圓鋸狠狠地從後面砍向蛇小姐的頸項！鮮紅色的血液猶如噴泉般四處飛散！！
 
「咩話！？」蛇小姐大驚，赫然發現砍她的竟然是便利先生！
 
 




便利先生的機械觸手強而有力，蛇小姐毫無反抗餘地，被圓鋸活生生地砍下了頭顱！！隨著她人頭落地，那些小蛇也都跟著死去，超能力也隨之消失．．．
 
 
「點解．．．你．．．．．．無事．．．」蛇小姐呼出了最後一口氣，一副難以置信的表情死去
 
便利先生帶著尷尬的語氣說：「其實．．．我都唔知點解係得我無事．．．」
 
「呼．．．」流主雙腳乏力跌坐在地上：「．．．嚇撚死．．．．．．以為真係就咁玩完．．．」
 
孖根也捏一把冷汗：「生存左200幾年．．．第一次遇到咁嘅對手．．．」
 
流主走到屏幕前：「點都好啦，宜家我地要諗下點對付蛇神．．．」
 
孖根說：「我地連子彈都無，而且外面仲迫滿晒變種蛇，我諗蛇神唔係依一刻最要擔心嘅嘢。」
 




流主拼命思考：「依舖真係腦爆．．．」
 
「通風槽。」鎖匙萱說：「依啲設施通常都係用中央空氣調節系統，如果我地爬通風槽出去，就算去唔到排污倉，都起碼可以避開外面啲變種蛇蛇。」
 
「有道理喎！果然係專家！！」流主讚嘆
 
孖根說：「咁狗肉同便利先生呢？」
 
「係喎．．．」鎖匙萱摸著頭說
 
「．．．各位，其實我可以留低。」便利先生說
 
「點可以．．．」流主認真說：「我唔想犧牲任何一個同伴．．．」
 
便利先生語氣忽然變得緊張地說：「咪住咪住！我話留低．．．無話要犧牲喎！你地出左去之後要諗辦法返嚟救我架！．．．咩你地人類咁殘忍架，郁啲就聯想到要犧牲人．．．」




 
「．．．噗．．．哈哈哈哈．．．」鎖匙萱忍不住大笑起來
 
流主尷尬說：「呃．．．因為你係機械人．．．所以先諗．．．」
 
便利先生搶著說：「因為係機械人你就諗住可以犧牲．．．？先生你好殘忍喎！我開始擔心你地會唔會返嚟救我．．．」
 
「哈哈哈哈．．．」冷靜的孖根也忍不住笑了
 
「對唔住囉．．．」流主尷尬地道歉，續對便利先生和狗肉說：「．．．好啦，唔玩啦。既然係咁，狗肉都留低啦，我地出左去再諗辦法返嚟救你地。」
 
虛弱的狗肉有點不願意：「嗚．．．」
 
鎖匙萱摸著狗肉的頭：「乖啦，好快快架咋！」
 




 
他們坐言起行，馬上爬上通風槽離開。因為害怕中途會遇上變種蛇，所以他們讓不怕輻射的孖根爬最前；看著結構圖確認方向的鎖匙萱在中間。
 
 
「前面有分岔路，應該爬邊邊？」孖根停下來問
 
「唔．．．」鎖匙萱嘗試在沒有通風槽路線的結構圖上尋找自己的位置：「．．．左邊啦。」
 
 
片刻後，他們來到了一個通風口。
 
 
孖根看下去說：「．．．睇唔清楚，咩都無。不過唔係走廊，應該係一間房嚟。」
 
「咁繼續向前啦。」鎖匙萱說
 
 
然後，她們再前進了一小段距離，又再遇到一個分岔路。
 
 
孖根問：「今次呢？左定右？」
 
鎖匙萱說：「右啦，走廊應該係喺我地右手邊。」
 
「好啦。」孖根才剛探頭看了一下，便立即退回來說：「返轉頭，快！！」
 
 
他們甚麼都沒有問便立即向後爬，因為他們心裡都很清楚原因。但是由於通風槽內十分狹窄，他們根本沒有轉身的空間，縱使心裡十分焦急，也只能盡快向後爬。
 
 
鎖匙萱緊張地說：「快啲啦！！」
 
在鎖匙萱後面的流主說：「快緊囉！．．．睇住妳對Roller．．．唔好再．．．踢．．．．．．喂！！」
 
 
他們不斷後退，不知不覺回到了剛才的通風口。
 
 
「麻煩！」孖根忍不住向追來的小變種蛇開火，即使她手上的衝鋒槍已餘下沒多少的子彈
 
 
豈料，天意弄人。一群小變種蛇竟然在此時從後夾擊！
 
 
「屌！後面都有呀！！」流主大驚，立即翻身用只剩下數顆子彈的戰鬥霰彈槍攻擊
 
 
然而，面對源源不絕的小變種蛇，一切的攻擊都是徒然。
 
 
「哇！！埋到嚟啦！流主！！」鎖匙萱嚇得繼續向流主迫過去
 
「後面都有呀！！唔好．．．唔好迫．．．．．．妳個屎忽呀！！．．．喂！！」流主被鎖匙萱迫得喘不過氣
 
 
鎖匙萱因為孖根早已沒有子彈，只能用小刀勉強應戰而害怕得不斷退後。她的臀部更擠向了流主的臉，流主只得一邊推著鎖匙萱，一邊用腳踢開後面追來的小變種蛇！
 
 
「唔好迫．．．好迫呀！！」流主向前推著，著急的他卻不慎一手推向孖根的臀部
 
「．．．宜家唔係時候．．．唔好捏．．．」孖根用小刀向面前的小變種蛇猛刺著說