異塵餘生香港2277: 30 星辰
逃出了戰區後，因為流主重傷昏迷，孖根和鎖匙萱把他留在一個安全的小屋內，便出外尋找食物和有輻射的地方去治療孖根的傷勢。
「然後，星辰姐姐就收養左我．．．」鎖匙萱說
．．．．．．．．．
「妳點可以救人架！」一個貓頭鷹的成員責罵著星辰
「嗰幾個土匪無背景架！」星辰反駁
「咁如果有呢？我地嘅規條就係唔殺人亦唔救人，就係大家都嚴格遵守，所以先可以安然無恙咁生活喺戰區咋！」他繼續責備說
「嗰個係細路女嚟架！」星辰激動起來
「咁仲衰！為左個細路女而樹敵！？」他說
「總之唔會搞到組織！個細路女我會照顧！」星辰說
後來，聽說因為那幾個土匪並非任何組織成員，星辰也把她自己的所有財產奉獻給組織，才得以保住她和我的性命。
「嗱，妳試下啦，用姐姐教妳嘅方法打開個鎖。」星辰教導著我怎樣開鎖
「嗯．．．唏！」我嘗試著，意想不到這比看起來簡單：「好嘢！開到啦！」
星辰高興地摸著我的頭：「萱萱好有天份喎！以後就叫妳鎖匙萱啦！」
也試過有一次．．．
「嗰度有支12.7mm手槍呀！」我躲在瓦礫後說
星辰探頭看了一下：「．．．．．．唔好搏啦。」由於有兩批人正在開戰，她為了安全起見，反對冒險回收這支罕有的手槍
「嘻嘻嘻，唔怕怕喎，以我身手唔會咁易比人發現嘅！」我自信滿滿，踏著我的滾軸溜冰鞋溜出去
「鎖匙萱！」星辰來不及阻止我
我既安靜，但又快捷地撿起手槍。豈料，那些人就在我轉身離開之際發現了我！
「有人喺後面呀！！」他們立即回頭向我開火
星辰立即掉出一個煙霧彈，然後便拉著我從秘道逃走。
我們確認安全後，便停下來休息。
我雖然踏著滾軸溜冰鞋，但還是喘著氣：「呼．．．呼．．．好險險呀．．．」
豈料星辰竟然括了我一記耳光：「妳有無搞錯呀！！」
我一時間呆住了。
「妳有無衡量過自己得唔得架？？」星辰疼心得發抖：「我講過幾多次，唔好高估自己！如果頭先我唔喺度，妳點算！？」
我無言以對：「我．．．」
星辰眼有淚水：「頭先嗰度有成十幾廿人呀！十幾廿支槍呀！！要死唔使多，一粒子彈就夠我以後再見唔返妳呀！！！」
我們出生入死，一起快樂，一起傷心，就這樣情同姊妹般生活著．．．．．．
「唔好過去呀！！」一個男成員拉著我
「嗚．．．嗚．．．」我的嘴巴也被他掩著
「唔好出聲呀！！如果比佢地發現，連我地都會比佢地殺埋架！！」他緊張地說
一次行動中，我們不慎被發現，那班MR想都沒想便向我們開火。我們當然立即逃跑，但是星辰因為走在我的後面而被子彈擊中大腿倒地！就在我回頭打算救她時，卻被另一個男成員拉住．．．．．．
就這樣，我只可以無能為力地看著星辰被MR分屍．．．他們如何活生生地扯斷她的四肢，如何玩弄她的殘肢，如何吃她的肉，如何喝她的血．．．到了現在我還歷歷在目．．．
最後，我只有用淚水送別她．．．
．．．．．．．．．
鎖匙萱一邊說一邊哭著：「我到宜家．．．都仲諗．．．我係咪真係無能力．．．殺死嗰幾個MR．．．救返星辰姐姐．．．」
孖根沒有說話，只是默默地聆聽。
「係咪真係．．．為左自己嘅安全．．．為左自己社區嘅安寧．．．就可以對其他嘅生命都置之不理？．．．連自己人都見死不救？」鎖匙萱哭著說
孖根摸摸鎖匙萱的頭說：「妳有個好勇敢嘅姐姐，佢同其他成員唔同，佢一啲都唔懦弱。．．．妳都一樣。」
鎖匙萱默默低下頭。
孖根續說：「逃避唔去面對人地對你嘅侵犯同欺壓，仲一味以為自己係和平理性，依啲根本就係自欺欺人。咁樣唔單只解決唔到問題，仲只會令人地更加得寸進尺，將自己迫入死角。」
．．．．．．．．．
「記得．．．唔好憎恨任何人．．．．．．」科學家裝束的男子說
「尚！！！」流主在一台圓柱形的裝置裡不斷呼叫
「你係香港最後嘅希望．．．未來．．．．．．靠你啦．．．」男子哭著說
流主淚流滿面，無能為力地看著男子被湧進來的海水淹沒．．．
．．．．．．．．．
「尚！！！」流主大叫
「流主！？」孖根立即放下手上的東西走向流主
「．．．孖根？？依度．．．？」流主環顧四周，發現自己躺在一個昏暗的房間
「哎呀呀！你終於起身啦！」鎖匙萱也走向流主
「發生咩事？．．．超級變種人呢？」流主坐起來問
孖根笑了一下說：「你醒返就好啦，我去煮嘢食。」說完她便回去繼續好手上的事情
鎖匙萱笑著說：「我地離開左戰區啦，不過你傷得太重重，所以暈左。」
「咁．．．之後呢？依度係咩地方？」流主問
「依度我都唔肯肯定係邊度，總之就係戰區東邊啦。」鎖匙萱說
「唔．．．我暈左幾耐啦？」流主感到有點頭痛
孖根端上一碗糊狀的東西：「差唔多兩日啦，食啲嘢先啦。」
「哇．．．咩嚟架．．．？」流主看到這碗糊狀食物，頓感噁心
「雙頭牛奶煲變種老鼠肉。」孖根若無其事說
「．．．．．．我想食燒變種甴曱．．．」流主連看都不想看這碗雙頭牛奶煲變種老鼠肉
「你兩日無食嘢，一食返嘢就食啲咁肥膩嘅嘢會好傷胃。如果你係食屍鬼就無所謂，但係你只係一個人類。所以嚟緊幾餐你都淨係可以食流質食物。」孖根說
流主一臉失落：「．．．我想食啲有咬口嘅嘢．．．．．．」
「煮埋比你仲咁多嘢講，同我食左佢呀！」孖根態度強硬
流主迫於無奈只有就犯：「．．．係呢，妳嘅傷勢好似好好多喎。」流主問孖根
孖根坐下來，拿起一塊燒變種甴曱肉大口大口地吃著：「係呀，咁啱附近有輻射好高嘅化學廢料回收站，我入去坐左陣已經好得七七八八。」
流主看著孖根的燒變種甴曱肉說：「妳就好啦．．．」
鎖匙萱說：「咁我地之後去邊呀？主主本身有咩計劃？」說著，鎖匙萱也開始吃著燒變種甴曱肉
流主無奈說：「乜鬼嘢主主．．．我地繼續向東行啦。我仲要盡快去Bitch Kingdom拆在個狗帶，之後去搵伊甸園創造器．．．係喎，鎖匙萱有無聽過伊甸園創造器？」
「無喎．．．點解個狗帶一定要去Bitch Kingdom拆嘅？」鎖匙萱問
「因為係BK裝嘅．．．條狗帶係炸彈嚟，雖然個控制器喺我度．．．但係一日唔拆一日都唔安落．．．」流主無奈說
「依度向東行，經九龍灣去Bitch Kingdom，如無意外大概兩三日路程。」孖根說
「唉．．．仲有幾日先到．．．．．．希望條狗帶唔會爆啦．．．」流主垂頭喪氣說