異塵餘生香港2277: 03 旅程開始

離開商場後，流主便跟那個善良的男人分道揚鑣。流主依照他所說向北方前進，尋找一個名為「葵芳」的地方。幸好得到他的指點，流主學會了一些嗶嗶小子的基本功能。例如脫下它的方法、時間設定、記事等等，最重要是原來這個嗶嗶小子的前端位置附有一個可以調較方向的小電筒，比起依靠屏幕照明有效得多。那個男人還給了流主一片儲存了香港地圖的全息磁片。雖然只有地形，但總比沒有好。
 
經過數小時的步行，果然，流主來到了一個有數十人聚集的市集。這個被倒塌建築物包圍著的市集，有著各式各樣的人。有些人在銷售擺滿地上的雜物，有些人則百無聊賴地遊蕩。從他們的衣著，也能簡單分辨到他們大概是甚麼人。
 
 
「喂！哥仔！埋嚟望下有無嘢啱使啦！」一位中年婦人坐在她的地攤前說
 
「唔好意思，請問依度係咪「葵芳」？」流主點一點頭，有禮地問
 
「係呀係呀！睇你身光頸靚，實係有錢人啦！唔多唔少都買啲嘢啦！」婦人說




 
「吓．．．」流主尷尬地說：「我無錢呀．．．．．．」
 
婦人的態度頓變：「嘖．．．咁你過主啦！唔好阻住我做生意呀！」
 
流主想了一下，尷尬地問：「請問妳．．．知唔知香港嘅歷史．．．？」
 
婦人聽後，眉頭一皺說：「你講咩呀．．．無啦啦歷咩史呀．．．？」
 
「咁．．．妳有無聽過伊甸園創造器？」流主續問




 
「嗱嗱嗱．．．阿哥仔，我完全唔知你喺樹講緊乜嘢。我未聽過乜鬼嘢甸咩園，我淨係知你未癲完，好心你啪小啲丸啦！」婦人不耐煩說
 
「呃．．．對唔住，唔好意思．．．」流主有點喪氣說
 
婦人看到流主，卻又有點於心不忍「．．．唉，阿哥仔．．．唔好話阿霞姨唔幫你。．．．平時呢，我賣啲嘢都係我個仔執返嚟嘅，佢識嘅嘢多我好多。我諗佢可以幫到你嘅．．．不過，首先你要幫我一樣嘢。」
 
「無問題呀，請講。」流主說
 
「我個仔兩個鐘頭前入左嗰邊個爛鬼商場度執嘢嚟賣。」婦人指著不處的建築物：「佢好少可搞咁耐都唔返嚟，我開始有啲擔心，你幫我入去搵搵佢，順便睇下佢幫唔幫到你啦。」婦人說




 
 
如是者，流主只有硬著頭皮進入這個漆黑的爛商場．．．經過先前的教訓，流主都不敢再掉以輕心了。他手執木棒，並用嗶嗶小子的電筒照明，小心翼翼地搜索著。但是明顯地，入口附近的地方早已被搜括一空，流主只有無奈地走進更深處。
 
來到了商場的三樓，流主突然聽到從哪裡傳來了數下槍聲！他立即向聲音的來源看過去，果然有一個拿著電筒、背著一個大背包的人在對著甚麼開槍，這個人很有可能是霞姨的兒子。流主沒有多想，便跑過去幫忙。
 
 
這個男子不斷扣下扳機，但他手上的手槍卻沒有打出子彈：「屌！無子彈！」
 
 
此時，流主走上前才發現男子一直攻擊的，竟然是數具腐爛不堪但卻能走動的人類屍體！流主雖然不知底裡，但在公在私，他也不可能見死不救。
 
 
「嗚．．．死就死啦！」流主咬緊牙關跑上前用力揮舞木棒攻擊
 




男子一臉茫然：「你係．．．？」
 
「走先啦！」流主不敢戀戰，立即和男子一起逃跑，而那些行走的屍體也以讓人驚嚇的速度追逐著他們
 
 
然而，流主他們看來是走錯方向了．．．他們竟然跑到一個死胡同！
 
 
「你識唔識用槍？我隻手扭傷左．．．上唔到子彈．．．」男子把手槍遞給流主
 
 
流主眼見那些屍體不斷接近，只有放手一搏。他接過手槍和彈匣，意外地好像與生俱來便會使用手槍般，純熟地為手槍重新上膛。
 
已經沒有細想的時間，流主立即舉槍瞄準。就在此時，一股微弱的電流從嗶嗶小子傳到他的腦袋，眼前的一切和自己的身體好像突然稍微變慢了。同時他的腦海也浮現了一些數據．．．他竟然清楚地知道射擊目標不同部位的命中機會，甚至是與目標的距離也都完全掌握！
 




 
「開．．．槍．．．啦．．．」連男子的說話都好像變慢了
 
流主瞄準著屍體的頭部：「5公尺．．．命中率84%．．．」他毫不猶豫地開火，在這些奇怪的數據協助下，流主總算把那數具屍體變成真正的屍體了。然後，時間也自己回復正常。
 
「呼．．．你槍法唔錯喎．．．唔該晒。」男子鬆了一口氣說
 
「唔．．．呃．．．．．．嗯。」流主還在思考剛剛所發生的事．．．而且他感到腦袋有點疲倦
 
「估唔到依度會有喪屍，明明下面兩層都係得啲變種老鼠同昆蟲．．．」男子搜括著那數具屍體
 
「喪屍？」流主問
 
「係呀，佢地其實係食屍鬼嚟嘅。不過輻射已經嚴重破壞左佢地嘅腦部，令佢地淨係識得攻擊人類．．．所以大家都叫佢地做喪屍。．．．你未聽過咩？」男子一臉奇怪反問
 




「食屍鬼？輻射？？」流主完全聽不明白
 
男子對流主的反應感到十分意外：「吓？？你第二個星球嚟架？」
 
「其實我失左憶．．．咩都唔記得晒．．．霞姨話你可以幫到我，話到比我知香港嘅歷史．．．所以我就嚟搵你啦。」流主說
 
「原來係阿媽叫你嚟嘅，我都奇怪點解會有人咁啱嚟救我．．．」男子看著流主手上的手槍笑說：「哈哈，你嚟搵我幫你，結果反而係你幫左我。」
 
「呃．．．唔好意思．．．」流主把手槍交還說
 
「哈哈，由佢啦，你仲用得好過我，把槍比左你當係報答你救命之恩啦。」男子客氣地說：「有個地方我自己一個唔敢去，宜家既然有你喺度，不如一齊去啦，我相信嗰度亦都可以幫到你。」
 
「無問題呀！」流主喜說
 
「咁大家互相照應啦，我叫杰仔。」男子笑著說




 
 
把手槍送了給流主的杰仔拿著一把消防斧頭，他們一邊互相掩護一邊前進，來到了四樓。
 
 
「詳細嘅歷史我就唔清楚，我淨係知個世界以前唔係咁嘅。好似話喺好耐之前，一次核戰摧毀左成個世界，大量人類死亡。雖然倖存嘅人都唔係少，但係有啲因為吸收左太多輻射，異變變成左食屍鬼。雖然當時核戰香港無直接比核彈攻擊，但係有部份地方宜家都仲殘留左好多輻射。」杰仔小心翼翼地前進
 
流主掩護著杰仔，說：「原來發生左啲咁嘅事．．．咁你知唔知咩嘢係伊甸園創造器？」
 
「伊甸園創造器？未聽過，要嚟做咩架？」杰仔問
 
「我都唔係好肯定，好似係用嚟重建香港．．．」流主說
 
「重建香港？有啲咁好嘅嘢？」杰仔說著，突然停了下來：「小心，前面有條屍體．．．」