異塵餘生香港2277: 02 來自過去

看著灰色的天空，破爛的大廈和建築物，雖然流主失去了記憶，但是他仍然知道，這個地方以前一定不是這樣的。
 
離開了小叢林，他沿著崩裂的道路繼續前進，來到了一個已經損毀得體無完膚的商場。為了尋找可以果腹的食物，他決定進去一探究竟。
 
商場內混亂不堪、漆黑一片，只有微弱的日光從破爛的屋頂滲透進來。流主向深處前進，但是除了一些鐵罐和垃圾，這裡甚麼都沒有。由於愈走進深處，環境便愈漆黑，流主只有把嗶嗶小子屏幕的亮度調至最高，作照明之用。
 
 
「嘶．．．嘶．．．」
 
 




此時，流主聽到一些奇怪的聲音從背後傳來．．．他慢慢轉身，用嗶嗶小子照看著，才發現身後不知何時來了很多巨型的蟑螂！它們的體型大得有如人類的大腿般，而且看來並沒有善意．．．流主慢慢後退，生怕會刺激到它們．．．
 
 
「．．．唔好搞我呀．．．．．．」流主心裡期盼著
 
 
可惜事與願違，它們不單止沒有離開，更群起向流主衝過去！
 
 
「哇！！」流主嚇得面容失色，立即轉身拔腿逃命




 
 
但是一眾蟑螂仍然窮追不捨，流主只有不顧一切捨命狂奔！
 
 
「啪啪啪啪啪啪．．．」一些讓人不寒而慄得發麻的聲音伴隨緊張的氣氛傳來
 
 
流主不禁回頭一看，其中一隻蟑螂竟然拍翼高速向他飛過去！流主慌亂中隨手在地上撿起一支木棒便向它揮擊，成功把它擊退。然而，後方仍然有很多它的同伴不斷追上來！
 




 
此時，前方突然冒出一台頭部像個電燈泡的機械人：「爬低！」
 
 
流主想都沒想便立即伏在地上，這台機械人馬上抬起雙手，從手中不停向蟑螂群射出激光！蟑螂們都被激光打出一個個冒煙的小洞．．．不消一刻，蟑螂群都被機械人消滅了。
 
 
「你無事呀嗎？」一個咬著香煙的男人從機械人的背後走出來扶起流主
 
流主心有餘悸地看著那群蟑螂的屍體：「．．．．．．唔該晒．．．」
 
男人上下打量了流主一下，笑說：「武器都唔帶把就走嚟依啲地方，你唔係超人嘅話就一定係白痴。」
 
「．．．．．．」流主一時間不知如何應對
 




「不過你都係白痴多架啦，開住棧燈走嚟走去，淨係比變種甴曱襲擊已經要偷笑啦。」男人續說
 
「變種．．．甴曱？」流主對這個名詞感到很陌生
 
男人若無其事地用手撿起一隻噁心的巨型蟑螂說：「依啲咪變種甴曱囉。」
 
「咁大隻．．．？」流主對男人的冷靜感到十分驚訝
 
男人皺起眉頭：「不嬲都咁大隻架啦．．．」他笑了一下，續問：「你第二個星球嚟架？」
 
「我．．．我都唔知呀．．．我好似失左憶．．．．．．」流主眉頭深鎖說
 
男人看著流主徬徨的表情，想了一下說：「．．．依度唔方便傾偈，我地搵個安全啲嘅地方先。」
 
 




於是，流主一臉不願意地替男人拿著數隻變種甴曱的屍骸，跟著他走到商場一個較隱密的位置。
 
 
「嗯，依度唔錯。」男人放下他的行李，讓他的機械人把風，然後便在地上隨便用一些可燃燒的雜物生火：「不如你講下你發生左咩事？」
 
 
流主坐在營火前，一邊喝著男人給他喝的飲料，一邊把自己目前所知的事情告訴男人。
 
 
「啊．．．所以你就咩都唔知．．．」男人一邊烤著變種甴曱肉一邊說
 
「我唯一有嘅線索，就係依封信．．．」流主把從奇怪裝置找到的信給男人看
 
男人看了一看，點一點頭說：「．．．如果封信唔係假，又唔係玩嘢．．．應該就係一個叫做尚嘅人喺200年前寫落嘅．．．」
 




「200年前！？」流主驚訝得雙眼都睜大，一時間不懂如何反應：「咁．．．吓．．．」
 
「封信寫住2077年，宜家係2277年．．．我估，你可能係200年前嘅人。」男人大膽假設
 
「我．．．係200年前嘅人．．．？」流主不敢相信
 
男人把信還給流主，說：「你所講嘅奇怪裝置，如果我無估錯，應該係一部雪藏裝置。起碼．．．我唔信係時光機囉。」
 
流主想了一下：「即係我喺2077年比人雪藏左，然後200年後嘅今日先醒返？」
 
男人笑說：「你都唔蠢喎，一點就明。」他接著看著流主的嗶嗶小子說：「嗱，封信講嘅伊甸園創造器我就未聽過，但係嗶嗶小子我就聽過啦。英文名Pip-Boy，Pip即係Personal Information Processor，亦即係個人資訊處理器，係美國200年前一間科技公司嘅產品。因為我家族傳落嚟都係電子工程師，所以略知一二。」
 
「咁．．．究竟個世界發生左咩事？依200年發生左咩事？」流主問
 
「歷史嘅嘢我無咩研究．．．不過我可以話，平時出嚟行走要小心啲，唔係個個都好似我咁咁好人救你架．．．外面咩人都有，殺人放火、偷呃拐騙都唔係咩新鮮嘢。」男人喝一口水續說：「但係最要小心係有組織嘅人，你永遠唔會知佢地背後有幾多同黨同有啲咩嘢撐腰。」




 
流主看一看四周問：「即係依度．．．宜家係無政府狀態？」
 
男人搖頭說：「又唔係嘅．．．政府係有，不過同無都無咩分別。佢地口講係政府，但係根本咩都無做過．．．唔知係做唔到定無心做啦．．．總之，都係靠自己啦。」
 
「．．．．．．」流主沒有回應，一時間太多資訊需要消化
 
「如果你想知多啲嘅，我諗你去「葵芳」睇睇啦。一直向北行，天黑前就到。嗰度都唔算少人住，而且有唔少商人來往，佢地可能知道多啲。」男人說
 
「．．．嗯，多謝你講咁多嘢比我知。」流主向男人致謝說
 
「其他嘢我就幫唔到你啦，最多我教下你點用你部嗶嗶小子啦。當係多謝你「帶」咁多嘢食比我！」男人笑說，並遞給流主一塊烤好了的變種甴曱肉．．．
 
 
因為流主實在是太饑餓了，他接過了這塊既油膩又噁心的變種甴曱肉，雖然一臉勉強，但仍然閉起眼咬下去．．．
 
 
「．．．咦！又幾好食喎！」流主接著多咬幾口：「．．．幾爽脆喎！又多汁！」
 
「哈哈哈！係咪好正呢！燒變種甴甲係我至愛！」男人也大口大口地吃著
 
「係呢，最後，我想問．．．邊度係「香港」呀？」流主問
 
男人聽了，輕輕笑了一下，說：「依個爛鬼城市，咪就係香港囉。」