誰能逼我將就: Ch.103

墨這一個消息，有如魔障般把我的腳步停住。我很想問個究竟，但最後還是忍住。

「喂，妳幾時得閒，我地去飲嘢啦。」稍稍停步後，我很快便回復狀態。

「我今日要返澳門…你係唔係身邊有人，唔方便講說話？」

「哈哈，係呀係呀。」真笨，現在才知道。

「咁好啦，我約你去信德等啦，我一陣再覆你時間。」





「好啦，哈哈，再見。」

我掛線後，旁邊的大哥立即問我：「新女朋友呀？」

「朋友之嘛。」

「朋友之嘛？但你笑得好淫喎細佬。」

「係呀，我就嚟見人就強姦呀。」





三個小時後，我跟墨在信德中心見面。跟上一次在神託會比較下，這一次大家的情緒已經大大不同。我坦白的把家中的所有事跟她說，因為我需要墨的幫助。

「世伯打電話俾我，同我傾咗一陣就收線；佢叫我唔好話你知，所以我冇提。如果唔係我見到真頁，我向佢問關於你嘅事，我根本唔知道發生咁大件事。」

「阿爸有冇講，佢宜家喺邊？」

「冇，我仲以為…你又同佢鬧交，所以佢先…打電話俾我。阿純…對唔住，我上次真係唔知你屋企有咁大件事。」墨想解釋，我把她的說話停住：

「唔好再講上次喇，墨。」





「哦…」墨有點愕然我的冷漠，把說話收回嘴巴中。

「阿爸同妳講咩？妳可唔可以話俾我知？」

「世伯同我講對唔住…」聽到墨這句說話，我腦內已經想像阿爸的神態是如何的落寞。他向墨說對不起只有一個原因，佢覺得自己影響了我跟墨之間的一段感情。

阿爸像一個要極力贖罪的人，就好像走遍世界，贖回了每一條自己認可的罪名後，便可以了卻心願。

「佢同我講，係佢令到我地分開。果然…我好坦白咁同佢講，我同你已經分開咗。」

「跟住呢？」

「跟住佢就收咗線喇。」

「收咗線…」





我失望極了，我把頭垂下，沮喪地苦思阿爸到底身處何方，他下一步會再做什麼？

突然我發現，墨在抽泣。

「墨，妳做咩事？」其實我不應該問這個問題，墨應該是擔心阿爸所以落淚，畢竟她們還是曾經熟悉過的關係。

但還未至於要抽泣吧，他兒子我還沒有哭呀。

「我以前做過一個man，佢因為破產，一夜之間冇咗好多錢。後來佢去咗做保安，一家四口由麥當勞道搬到落西環二百呎劏房，由日日坐Benz變到朝朝坐巴士。

佢好內疚點解會令到一家人受苦，佢退休之後成日都放唔低破產呢件事，佢有跟朋友嚟過神託會，但最後佢都係好固執。直到有一次，佢選擇自殺，因為佢面對唔到自己，佢諗唔到方法令自己走出呢個困局

雖然最後都係救得返，不過個人已經冇哂鬥志。」





「墨，妳老實話我知，阿爸同妳所講嗰個人，情況係咪好似？」

「我唔識睇…不過嗰位man都有試過打電話俾好多位，佢以前從來唔會打電話俾佢嘅人。佢講咗好多幾十年前嘅事，最後都係為咗向對方講一句對唔住。

佢揀自殺嗰晚，警察睇過佢部電話，足足打咗六十幾個電話出去；警察再搵返呢班人問話，全部都係話呢位man打電話俾佢地，只係為咗啲雞毛蒜皮嘅事道歉…

我好擔心世伯都有係咁呀…嗚…」

墨掩著面痛哭，而我則為了她的說話而不知所惜。我拍拍她的肩膀，她抱著我後哭得更厲害。

這個時候，我發現了；自己抱著墨的感覺，已經不同了。