誰能逼我將就: Ch.94

開了空頭支票的約會，最後還是需要結帳的。第二晚，我立即補回跟真頁的飯局。

「恭喜你，入到香港隊。」

「多謝。」

「我喺廣島嗰時，都話咗你同小春有前途啦。」

「你又點呀？轉咗新工之後慣唔慣，不過點都應該好過，以前喺球隊扮軍醫啦，哈哈。」





「我唔錯呀，做呢類社工可以接觸好多我以前見唔到嘅事。」

「咁咪幾好。」

我們乾了幾杯，互訴近況之後，真頁突然說起一些奇怪的東西。

「你女朋友冇事嘛？」

「吓？」我錯愕地給了一個直接反應。





「你唔會唔知道啩？」真頁意識到我的態度，向我追問。

「分咗手，冇咩點搵。」

「噢……原來係咁……」

真頁好像怕我有什麼不高興，把話停住後，一直的低頭食飯。

「我冇事呀，有咩想講就講啦。」我故作輕鬆的說





「真係講得？」真頁問。

「講啦八婆。」

「唐爾墨脾氣係怪咗少少，但個人都幾好呀，點解咁快會分開？」

真頁說到了這個話題，我也不妨多說一點；這段時間來的壓力，老早就想找個人陪我抒發一下。

我把前因後果，所有人的關係圖，都一併轉告真頁後，佢驚訝的看著我：

「唐爾墨結過婚喇？」

「其實呢樣又好小事，只係我覺得，如果佢生命入面永遠都同呢個男人有牽連，做佢老公嘅點會唔介意？」

「其實我喺公司聽到一啲佢嘅事，我一直都冇同你講。」





「咩事？」

「上次世伯咪去咗我地個會度，搞咗個分享會。」

「係呀。」

「我事後先知，原來唐爾墨冇向公司申請。佢只係同公司講佢要借嗰個房用，公司所有事都唔知。」

「你公司唔知？但嗰日仲有茶點，我阿媽仲話阿爸有車馬費。」

「我都覺得奇怪。」

如果真頁說的都是準確，但代表阿爸到神託會開分享會一事，統統都是墨自己安排的，包括那些費用和車馬費。





這個動機其實很簡單，她為了幫我，或者是阿爸。這個真相令我糾結，一個內心善良，但每到情緒不穩便會變成另外一個極端性格的人，到底是可愛還是可惡？

「好多同事仲話，唐爾墨一向都幫好多man。好多時搞活動，佢都會私下用自己錢去買禮物俾大家，希望佢地都開開心心。」

真頁說的話我都相信，我眼中的墨都曾經有過這一面。突然間，我眼前像是出現兩個墨。一個是一路走來，對我和阿爸也很好的那一個她；而另一個，就是那一晚狂情大發，追著我要我不好過的那一個唐爾墨。

這條路應該怎麼走下去？