誰能逼我將就: Ch.92

大哥在這裡，我不能第一時間跟阿媽套取什麼情報。

我繼續看著電視，就是要等一個機會。過了一會之後，阿爸換了衣服，又準備出外。

「韋信你今晚返唔返嚟食飯？」阿媽緊張的問。

「返…點會唔返嚟食？」阿爸看著阿媽說，然後續道：「一家人整整齊齊食下飯啦。」

我跟阿媽，就這樣眼睜睜的看著阿爸離開。而同一時間，大哥正好在洗手間中，我急不及待地向阿媽查問剛才的情況。





「好在我返得切嚟，如果唔係子俊都唔知會同你大哥講咩。」阿媽心有餘悸的說。

「咁妳地去到茶餐廳之後，子俊叔叔同阿爸有冇講啲咩？」

「子俊向你阿爸道歉，你阿爸冇咩反應，只係一路望住子俊唔出聲。後來子俊話有啲事想同你阿爸傾，就叫我行開一陣。」

「妳走開咗呀？」

「你阿爸都同意，所以我行開咗十五分鐘。十五分鐘之後我返到去，子俊已經自己一個走咗。」





「咁佢同阿爸講咗咩？」

「你阿爸唔肯講，我點問佢都係唔肯講。」

阿爸剛才給我的態度，是我的意料之外。比起之前的固執，阿爸現在更像一個漏了氣的皮球；你不會感覺到他有什麼朝氣，就像能過一天就是一天的感覺。

到了這個時候，我也不瞞阿媽，把之前子俊叔叔用錢利誘我的事說出。

「點算好？不如同公公講，可能佢會有方法。」阿媽六神無主的說。





「同公公講都冇用，佢太主觀。如果俾佢知道自己怪錯阿爸咁多年，公公都唔會好過。」

「咦，阿爸又走咗出去呀？」大哥這時辦完工，在洗手間走出來問。

「係呀。」

「阿媽，個子俊叔咩事？又會無端端嚟搵你同阿爸，阿爸冇事呀？」

「冇事。」

阿媽敷衍幾句之後，便托詞回房間休息。阿爸直到晚上回來，我們一家人簡簡單單的吃下一頓平靜的晚飯。

我跟阿媽已經商量好，要盡快知道，那十五分鐘裡面，子俊叔叔跟阿爸說了些什麼。

南華會





「純，交波啦交波啦，今日你啲波太慢喇。」
「陳七你打最前就得喇，唔使返太後呀。」
「小春你做多小小一二嘛，成日自己一個去做咩呀？」
「偉豪去到禁區頂有位就射，唔使你自己執波唔使怕喎。」

海Sir在場邊大叫著，但我今天的狀態不太好，很多平時輕易做到的事，今天也只是勉強捱過。

練習後。

「有份入港隊嗰幾個埋嚟。」海Sir向我招手。

「你地好快就會去港隊嗰邊練波，阿七同偉豪係老大哥，盡量帶下阿純同小春呢啲新人啦。」

「知道。」





「係喎，我入咗香港隊喎。」我衝口而出向陳七說。

「純，呢排好多場外事要理呀？」海Sir問我，我點點頭，他報上一個體諒的表情：「不過點都好，企喺球場入面，就專心做返你應該要做嘅事呀。」

「知道。」

練習過後，我一個人離開。他們有向我發出午餐的邀請，但我還是比較想盡快回家。

回家途中，在電話裡我又收到另一個不知是好是壞的消息；阿媽說，阿爸的工作拍檔權叔回港了。