誰能逼我將就: Ch.87

「阿媽，妳講咩話？」我跑到二人面前，阿媽看到我的出現，有點惶恐。

「純…點解你突然間會走出嚟？」阿媽問我，但我沒有理由，轉向子俊叔叔的一方問道：

「子俊叔叔，我阿爸都幫你食咗隻死貓咁多年。就算你宜家有病都好，都唔可以逼我阿媽咁樣做。」

子俊叔叔的身體狀態不可能跟我爭辯，他只是虛弱的看著我，就好像告訴我，他對這個死前的願望有多渴求。

「阿純，你聽阿媽講先。」阿媽拉著我，我知道她害怕我接受不了子俊叔叔剛才那個請求。





「阿媽，我知道哂，大哥唔係阿爸個仔。」我垂頭，說出這個很難受的事實。

「點解你會知？」

「阿爸…講咗俾英琦知，英琦再打電話俾我向我講。」

「韋信…」阿媽聽到這個消息，兩眼更加淚崩。我們都很心痛，阿爸一直以來所受的壓力。

病重的罪魁禍首就在眼前，但我們又可以做些什麼？





「子俊叔叔，我地唔可以應承你，對唔住。」我斬釘截鐵的說，然後扶著阿媽，轉身離去。

「純…唔好掉低子俊一個，佢身體唔係太好。你送佢去車站，上埋的士先。」

「哦。」

我回頭，走到子俊叔叔面前：

「子俊叔叔，阿媽叫我送埋你去坐車。」





子俊叔叔仍是同一個表情看著我，然後指指身後不遠處。這時我才看到，原來那裡有一張輪椅。

我把子俊叔叔扶到輪椅上，然後慢慢的開始推動。我再看看阿媽會否同行，阿媽只是揚揚手，吩咐我自己一個就好。

我推著子俊叔叔，走到往車站的路上。

「純仔…你哥哥個女今年幾歲呀？」子俊叔叔突然問我。

「我…都唔係好記得。」我有點抗拒，也不想子俊叔叔有太多幻想空間。

「你地啲細路仔，一眨下眼就咁話做人老豆。你大哥幾歲嗰時，阿蓉都有帶過佢嚟見我。」

大哥有說過，佢小時侯有見過子俊叔叔。

子俊叔叔有意無意的將這事告訴我，我不知道有什麼用意。反正當是一場心理戰去看待，為了阿爸我不能心軟。





「一日都係我自己唔好，以前耐唔耐見下你哥哥，俾幾千蚊阿蓉，就當自己做咗本份。日日都花天酒地，最後得到個病出嚟。」

我沒有回應，只是讓子俊叔叔一直的說。

「早兩個月我伯爺死咗，佢出殯嗰時我諗，到自己死嗰時，冇人冇物，唔通真係搵個侄仔擔幡買水咩…人有咩好求，咪求自己死嗰時，最親嘅人都喺身邊囉。」

子俊叔叔說到重點，但我仍然是一言不發。

「我都知自己對唔住韋信，我好細個就識你阿爸，佢由細到大都係咁為人著想。我地做過一年同學，佢成日借功課俾我抄。不過次次都冇分，因為原來佢啲功課都係做錯哂，哈哈哈哈。」

「子俊叔叔，你要去新界定九龍，我要幫你搵紅色的士定係綠色？」我冷漠的說。

「純仔…你嚟丫。」子俊叔叔向我揚手，我不太願意地蹲在他的身前。





「子俊叔叔唔擺得耐…你睇下想要乜嘢。只要你幫我勸服媽咪，子俊叔叔可以俾啲錢你去發展下自己事業。」

子俊叔叔挪開外套，露出一個載著鎮痛嗎啡的醫療藥包。只有癌症走到最末期的病人，才會用得上的東西。