誰能逼我將就: Ch.74

「你好。」唐爾棋背對著我，所以我先打招呼。我們前後打過兩次照面，但大家還是沒有正式介紹過大家。我有點戰戰兢兢，雖然我不認識他，但跟向松朗打架的事，他一定會知道。而且他跟向松朗的感情來看，我不認為他會喜歡我。

「喂，你好呀南華球星。」唐爾棋轉身，善意的對我說。

這稱號讓我有點尷尬，不知道是調侃還是玩笑，所以一律用微笑作回應就好。

「我阿妹成日提起你，我喺佢面前都係咁叫你，哈哈。」他好像看得出我的尷尬，換了個語氣來打打完場。

「佢有同你提起我？」我忍不住問。





「有呀，我地兩兄妹唔鬧交時，感情都幾好。」跟唐爾棋簡單的聊了幾句，我覺得他比我想像中友善，而且不是我所想的那個模樣。

「係，我見到你地感情其實都幾好。」

「頭先的士佬單嘢有冇嚇親你？」

「冇，個司機抵鬧。」

「我同阿朗慣咗，由細到大爾墨一有事，我地兩個就好緊張。你應該知道阿朗同爾墨關係，佢有同我講已經話咗你知。」





「我知道，我知道。」這話題我要特別小心，免得大家也有不快感覺。

「我個妹，脾氣係咪好怪？」

唐爾棋突然的問，然後氣氛變得不太明確。他所指古怪是那一方面，是男女之間的博弈，還是待人接物的態度？

「都唔係，我覺得佢性格好好。」我沒有選擇說出心裡感覺，因為沒有必要。

「我知你同阿朗打過交，不過你唔好怪佢，爾墨同佢分開咗之後，佢都仲係對我個妹一條心。佢成日怕爾墨俾人呃，所以每次爾墨拍拖，阿朗都會好緊張。」





我開始覺得有點奇怪，為什麼短短幾分鐘，唐爾棋一看到我就說出這麼的一堆話來？

「係咪覺得好奇怪，我會同你講咁多嘢？」唐爾棋也猜到我心裡想的事。

「有少少奇怪…」

「我個妹每次拍拖都好緊張，亦都好投入。佢同我講，你因為佢而同屋企人鬧大交。而你父母亦都同佢講明唔鐘意佢，呢幾個月爾墨都好唔開心，佢唔知點樣處理同你嘅感情。」

「佢…冇同我講…」我為唐爾棋的說話而驚訝，這數個月來，墨從來沒有向我表露過唐爾棋口中所說的感受。

「佢同我提過幾次之後就冇再講過，但我自己就一直心掛掛，所以趁住今日見到你，咪搵機會同你講。你唔好同爾墨講，我有向你提過呢啲事，無論點都好…」

唐爾棋拍拍我的手臂，續說：

「對我個妹好啲，佢唔係你眼見咁堅強。」





「知道。」

「喂，唐爾棋，點解你喺度嘅？」墨拿著兩罐汽水，突然出現在我們身後大叫。

「呢度我屋企，我點解釋妳聽我點解喺度呀？」

「你捉住阿純傾咩呀？唔好帶佢去賭錢呀我同你講。」墨擋在我跟唐爾棋中間，淘氣的說。

「我先唔得閒教壞妳男朋友，走先。」

唐爾棋又暗地向我打了個眼色，便轉身離去了。

「我阿哥同你講咩？」





「冇呀，話妳細個好醜樣，我問妳係咪整過容佢話唔係之嘛。」

「你係咪想死，戴哲純。」

晚飯後，我跟墨的家人逐一道別後，便和墨準備返回香港。在到碼頭的車途中，我的電話響起，我亮出電話，來電顯示在我和墨的視線內出現。

是李英琦的來電。